JEREMÍAS 42 - Quichua Imbabura Bible

Johanán shuti runaman villashcami

1Soldadocunata tucui mandajcunapash, Carea shuti runapaj churi Johanán shuti runapash, Osaías shuti runapaj churi Jezanías shuti runapash, tucui gentecunapashmi uchillacunamanda callarishpa, rucucunacaman shamunajurca.

2Paicunaca, profeta Jeremiastaca, cashnami ninajurca:

—Cunanga, imata ninanda cambaj ñaupajpi, ñucanchi mañashcatapash chasquipairi. Shinallata ñucanchimandapash, huaquinlla puchushca tucui cai gentecunamandapash, canda Mandaj Taita Diosta mañapairi. (Ñucanchica ashtacapacha cashcamandaca, cai huaquinllami puchushcanchi. Chaitaca, cambaj ñavihuanmi ricujungui).

3Canda Mandaj Taita Diosca, maijan ñanda ñucanchi catinatapash, imata ruranatapash yachachijuchun, chashna mañapairi— ninajurcami.

4Shina nijpimi, profeta Jeremiasca, cashna nirca:

—Canguna mañashcataca ña uyanimi. Ricuichi, cangunata Mandaj Taita Diostaca, canguna nishcashnallatami mañagrini. Tucui imatalla Mandaj Dios tigrachijpipash, imatapash na pacashpami cangunaman villasha— nircami.

5Shina nijpimi paicunaca, Jeremiastaca cashna ninajurca:

—Canda Mandaj Taita Dios, ñucanchiman imata chashnapachami nishpa villachun canda cachamujpipash, chaitapachami rurashun. Ñucanchi nishcashna imatapash na pactachishpa na rurajpica, na llullaj, imatapash pactachij Mandaj Diosllata ñucanchita ricuchun.

6Ali cajpipash, nali cajpipash, ñucanchimandaca can mañachunmi cachapanchi. Chai Mandaj Diostami cazushun. Mandaj Taita Dios rimashca shimicunata cazushpami, ali causaitaca japishun— ninajurcami.

7Chunga punlla jipami, cashna tucurca: Mandaj Diosca, cai shimicunatami Jeremiasman villarca.

8Shinamandami Jeremiasca, Carea shuti runapaj churi Johanán shuti runata, paihuan tandanajushca soldadocunata tucui mandajcunata, tucuilla gentecunata, uchillacunamanda callarishpa rucucunacaman cayashpa,

9cashna nijurca: “Ñucataca, israelcunata Mandaj Taita Diospaj ñaupajpi canguna mañashcata villachunmi cachahuarcanguichi. Mandaj Diosca, cashnami nirca:

10‘Cai llactapillata casilla tucujpica, llacta cachun cutin shayachishami. Cutinga na tucuchishachu. Ñuca tarpushcataca, na fitishpa shitashachu. Cangunata ñuca chashna llaquichishcamandaca llaquirinimi.

11Babilonia llactata jatun mandajpaj ñaupajpi ricurinataca, na manllanachu canguichi. Paitami cangunaca, ninanda manllanguichi. Paipaj maquimanda quishpichingapaj, cacharichingapaca ñucami cangunahuan cani. Paipaj ñaupajpi ricurinataca, na manllanachu canguichi. Mandaj Dios ñucami, chashna nini.

12Ñucaca, cangunataca llaquishami, cangunataca chai mandajpash llaquingami. Shina llaquishpami, cangunapaj llactaman cutin tigrachinga’ nircami.

13Ashtahuangarin cangunaca, cangunata Mandaj Taita Dios mandashcata na cazushpa: ‘Cai llactapica, na causashunllu’ ninguichipashchari.

14Cashnatapash ninguichipashchari: ‘Ashtahuangarin Egipto llactamanmi yaicugrishun. Chaipica, jatun macanajuitapash na ricushunllu, trompetata huacachishcatapash na uyashunllu. Chaipica, yarjaipash na tiangachu. Chaipimi aliguta causashun’ ninguichipashchari.

15Shina cashcamanda cunanga, huaquinlla puchushca Judá llactapi causajcunalla, Mandaj Dios rimashcata uyaichi: Tucuita Mandaj, israelcunapaj Taita Diosca, cashnami nin: ‘Egiptopi causagringapaj munashpa, chai llactapi causangapaj yaicushpaca,

16canguna manllashca espadahuanllatami, Egipto llactapi japijpi huañuchi tucunguichi. Yarjai japinata canguna manllashcapash, Egiptopimi yarjai japinga. Chaipillatami huañunguichi.

17Egiptoman tigrashpa ringapaj munashpa chaipi causagrijcunaca, tucuicunami espadahuan, yarjaihuan, jatun ung:uihuan huañunguichi. Shujllapash na causaj puchunguichica. Ñuca cangunaman cachamushca llaquimandaca, shujllapash napacha quishpiringuichica’ ninmi.

18Tucuita Mandaj Dios, israelcunapaj Taita Diosca, cashnatapashmi nin: ‘Imashnami ñuca ninanda fiñarishcata Jerusalenbi causajcunapaj jahuapi talinshna cachamurcani, chashnallatami Egipto llactaman canguna yaicujpica, ñuca ninanda fiñarishcata cangunapaj jahuapi talinshna cachamusha. Chaipimi cangunaca, ninanda millanayachi tucushcapash, manllaihuambash, ima llaquipash japishpaca alichari canman ni tucushcapash, rimashpa pingaichi tucushcapash causanguichi. Cai llactataca, cutinga napacha ricushpami causanguichi’ ninmi.

19Judá llactapi huaquin puchushca cangunataca, Mandaj Diosca: ‘Na Egiptoman cutin rinachu canguichi’ nircami. Caitaca aliguta yachaichi, cunanmi cangunaman alipacha villajuni.

20Cangunaca, ¿imamandata cangunapaj almatallata, cashna pandachinguichi? Cangunallatami, cangunata Mandaj Taita Diosta cashna nishpa tapuchun cachahuarcanguichi: ‘Ñucanchita Mandaj Taita Diosta ñucanchimanda mañapai. Ñucanchita Mandaj Taita Dios imata mandajpipash, chaitapacha yachangapaj villanguilla. Ñucanchica, pai mandashcatami rurapashun’ nihuarcanguichimi.

21Shina nishcamandami, cangunata Mandaj Taita Dios cangunaman imatalla villachun mandashcataca, cunanga tucuita villarcani. Ashtahuangarin pai imatalla rimashcataca, na cazushpami tianajunguichi.

22Chaimanda cunanga, caita alipacha yachaichi: Canguna causagringapaj munashca pushtupica, espadahuan, yarjaihuan, jatun ung:uihuanmi huañunguichi” nijurcami.