Psalms 105 - Quichua Imbabura Bible

Mandaj Diosca, israelcunapaj alipajmi juyaillacunata rurashca(1 Crón. 16:7-22)

1Mandaj Diostaca alicachinguichi.

Paipaj shutipi mañaichi.

Pai imatalla rurashcataca,

shuj gentecunaman villaichi.

2Paiman candaichi, Salmocunata paiman candaichi.

Tucui juyaillacunata pai rurashcataca parlaichi.

3Jucha illaj paipaj shutipi cushijuichi.

Mandaj Diosta mascajcunaca,

tucui shunguhuan cushijuichi.

4Mandaj Diostapash, paipaj ushaitapash mascaichi.

Paipaj ñavitaca, tucui causaipi mascaichi.

5Ima juyaillacunata, pai rurashcataca yarichi.

Jatun manllarinacunata rurashcatapash,

paipaj shimihuan rimashpa llaquichinatapash yarichi.

6Diosta servij Abrahambaj mirai cangunaca, yarichiyari.

Pai agllashca Jacobopaj miraicunalla, yarichiyari.

7Paimi, ñucanchita Mandaj Taita Dios.

Pai llaquichishcacunaca,

tucui cai pachapimi ricurin.

8Pai ari nishcataca, causaita

causaicaman yariajurcallami.

Huaranga huaranga miraicaman, pai mandashca

shimicunatapash yariajurcallami.

9Chaitaca, Abrahamhuanmi ari nirca,

Isaacmambashmi juramenturca.

10Chaitaca, Jacobomanmi mandashpa curca.

Israelcunamanmi, causaita causaicaman ari nirca.

11Paica cashnami nirca:

“Canaán llactatami, canman carasha.

Cangunapaj japinataca, cangunapaj

cachunmi carasha” nircami.

12Shuj llactamanda shamushpa chai llactapi

huaquinlla purinajujpimi, chashna nirca.

13Paicunaca, llactan llactanmi purinajurca.

Shuj llactamandaca, shuj gentecunapajman

yalishpami causanajurca.

14Paicunata llaquichinajuchunga, na saquircachu.

Ashtahuangarin paicunamandami,

jatun mandajcunataca llaquichijurca.

15“Aceiteta talishpa javishca ñuca

mandajcunataca, na tacarinachu canguichi.

Ñuca ima nishcata villajcunataca,

na llaquichinachu canguichi” ninmi carca.

16Paicunapaj llactapica, jatun yarjaitami cachamurca.

Micushpa shinlli tucuna tucui

granocunatapashmi chingachirca.

17Paicunata ñaupachishpaca, shuj runatami cacharca.

Paica, Josemi carca.

Paitaca, gañan cachunmi jatushca carca.

18Paipaj chaquipica, grillocunata

churachishpami llaquichirca.

Paica, prezuna huasipimi vichai tucushca carca.

19Pai villashca shimi pactangacamanmi, chaipi carca.

Mandaj Dios rimashcami Josetaca,

ali cajta nali cajta ricuchijurca.

20Jatun mandaj cachajpimi cacharirca.

Gentecunata mandaj cachajpimi, richun saquirca.

21Josetaca, jatun mandajpaj huasipi

mandaj cachunmi churarca.

Chai mandajpaj tucui ima tiashcacunata

ricushpa mandachumbashmi churarca.

22Pai churashca mandajcunatapash,

pai munashcashna cazuchijuchun,

mandaj rucucunatapash ali yachaita

yachachijuchunmi churarca.

23Chai jipami, Israel nishca taita Jacobopash,

Cam shuti chai Egipto llactaman yaicushpa,

chai llactapi causajurca.

24Chai llactapimi, pai agllashcacunataca,

ashtacatapacha mirachijurca.

Paicunata llaquichijcunataca, ashtahuan

yali ninan shinllicunatami rurarca.

25Chaipi causanajuj runacunapaj

shungutapash, pai agllashcacunata

na ricunayachina yuyaimanmi tigrachirca.

Paita servijcunata fiñashpa

nalicachishpa ricuna yuyaimanmi tigrachirca.

26Chai jipaca, paita servij Moisestami,

pai agllashca Aarondi cacharca.

27Paicunapica, imatalla rurashpa

ricuchinatami churarca.

Cam shuti llactapica, jatun

manllarinacunatami rurachirca.

28Yana yana tutata cachajpimi,

chai llactapica tucuilla amsayarca.

Paipaj Shimita na cazujcunaca, na carcachu.

29Chai llactapi yacucunataca,

yahuarman tigrachishpami,

pijicunatapash huañuchirca.

30Chai llactapica, sapocunatami jundachirca.

Jatun mandajcunapaj huasi ucucamanmi jundagrirca.

31Dios mandajpimi chuspicunapash,

usacunapash fuyushna shamushpa,

tucuilla llactapi jundarca.

32Yacuta tamiachinapaj randica,

rundu tamiatami curca.

Paicunapaj llactapica, rupajuj ninatami cacharca.

33Uvas chagracunatapash, jigos

yuracunatapashmi tucuchirca.

Paicunapaj llactapica, quirucunatapashmi

faquishpa tucuchirca.

34Pai mandajpi, langostacuna fahuashpa purij

jurucuna ninanda jundashpami,

35chai llactapica tucuilla jihuacunata micurca.

Chai llactapi fucushcacunatapashmi tucuchirca.

36Chai llactapi huacharishca, tucuilla

punda churicunatapashmi huañuchirca.

Shinlli runacuna cashpa, paicuna charishca

punda churicunatami huañuchirca.

37Pai agllashcacunataca culquindi,

orondimi llujchirca.

Paicunapaj aillucunapica, shujllapash

ung:uihuanga na tiarcachu.

38Egiptopi causajcunaca, israelcuna

llujshijpica, ninandami cushijurca.

Paicunaca, ninan manllaihuanmi causanajushca carca.

39Paicunata quilpachunga, jatun fuyutami churarca.

Ninatapash, tutata punchayachijuchunmi churarca.

40Paicuna mañajpica, codorniz nishcacunatami cachamurca.

Shinallata jahua pachamanda tandatami,

na ushangacaman cararca.

41Jatun rumita chaupijpimi, yacucunapash llujshirca.

Chaquishca pambacunatami, jatun

yacucunashnami calpanajurca.

42Paita servij Abrahamman, paipaj jucha illaj

Shimihuan nishcata yarishpami pactachijurca.

43Paipaj gentecunataca, cushijuihuanmi llujchirca.

Pai agllashcacunataca, ninan cushijuihuanmi llujchirca.

44Shuj llactacunapi causajcunapaj

alpacunatami, paicunaman cararca.

Chaipi runacuna tarpushcacunatapashmi cararca.

45Pactachinajuchun pai cushca shimicunatapash

cazunajuchun, mandashca shimicunatapash

pactachinajuchunmi, chashna curca.

Mandaj Diostami alicachina canguichi.