1 CRÓNICAS 16 - Quichua Imbabura Bible

1Chashnami, Taita Diospaj arcataca apamunajurca. Ña apamushpaca, chai arcata churangapajllata David shayachishca carpa chaupipimi churanajurca. Chai jipami, animalcunata Diosman cushpa, tucuillata rupachinajurca. Shinallata Dioshuan ali cangapajpash, animalcunata cushpami, Taita Diospaj ñaupajpi huañuchinajurca.

2Diosman animalta cushpa tucuillata rupachinatapash, Dioshuan ali cangapaj carashpa huañuchina animalcunatapash cushca jipami Davidca, Mandaj Diospaj shutipi tucui israelcunata bendiciarca.

3Chai jipaca, tucui israelcunamanmi jaricunamambash, huarmicunamambash, shuj mishqui tandahuan, asha aichahuan, chaquichishca uvasta rurashca tandahuan cararca.

4Davidca, Mandaj Diospaj arca ñaupajpi Diospajta ruranajuchunmi, levita puramanda agllashpa churarca. Paicunataca, Diosta yarinajuchun, juchacunata Diosman villanajuchun, israelcunata Mandaj Taita Diosta alicachinajuchunmi churarca.

5Paicunata mandajca, Asaf shuti runami carca. Paipaj catica, Zacariasmi mandajurca. Paicunapaj catica: Jeiel, Semiramot, Jehiel, Matatías, Eliab, Benaía, Obed-edom, Jeiel shuti levitacunami mandanajurca. Paicunami salteriota, arpata tocanajurca. Ashtahuangarin Asaf shuti runaca, platillocunatami huactajurca.

6Shinallata Benaía shuti, Jahaziel shuti curacunapashmi, Taita Dioshuan ari ninajushpa escribishcata alichishca arca ñaupajpi, trompetata punllandi huacachinajurca.

Diosta pashi nishpa candangapaj David rurashca Salmomi(Sal. 105:1-15; 96:1-13; 106:47-48)

7Shinamandami Davidca, chai punllallata Asaf shuti runahuambash, paipaj huauquicunahuambash, Mandaj Diosta caparishpa mañai callarirca:

8“Mandaj Diosta alicachipaichi, paipaj shutipi mañaichi.

Pai imatalla rurashcataca, shuj gentecunaman villaichi.

9Paiman candaichi, Salmocunata paiman candaichi.

Tucui juyaillacunata pai rurashcataca parlaichi.

10Jucha illaj paipaj shutipi ninanda cushijuichi.

Mandaj Diosta mascajcunaca, tucui shunguhuan cushijuichi.

11Mandaj Diostapash, paipaj ushaitapash mascaichi.

Paipaj ñavitaca, punllandi mascaichi.

12Ima juyaillacunata pai rurashcataca yarichi.

Jatun manllarinacunata rurashcatapash,

paipaj shimihuan rimashpa llaquichinatapash yarichi.

13Diosta servij Israelpaj mirai cangunaca, yarichiyari.

Pai agllashca Jacobopaj miraicunami canguichi.

14Mandaj Diosca, paimi ñucanchi Taita Dios.

Pai llaquichishcacunaca, tucui cai pachapimi ricurin.

15Pai ari nishcataca, causaita causaicaman yariajunllami.

Huaranga huaranga miraicunaman pai

mandashca shimicunatapash yariajunllami.

16Abrahamman pactachishapacha nishpa ari nishcatapash,

Isaacman juramentushca shimicunatapash yariajunmi.

17Chaitaca, pactachinajuchun cushca shimicuna

cachunmi, shinllitapacha churashpa Jacoboman curca.

Israelcunamanmi, causaita causaicaman ari nirca.

18Paica cashnami nirca: ‘Canaán

llactatami canman carasha.

Can japinataca, cambaj cachunmi carasha’ nircami.

19Shuj llactamanda huaquinlla shamushpa,

chai llactapi huaquinlla purinajujpimi, chashna nirca.

20Paicunaca, llactan llactanmi purinajurca,

shuj llactamandaca shuj gentecunapajman

yalishpami causanajurca.

21Paicunata llaquichishpa charichunga, na saquircachu.

Ashtahuangarin paicunata juyaimandami,

jatun mandajcunataca llaquichijurca.

22‘Aceiteta talishpa javishca ñuca mandajcunataca,

na tacarinachu canguichi.

Ñuca ima nishcata villajcunataca, na

llaquichinachu canguichi’ nircami.

23Mandaj Diostaca, tucui cai pachapi

causajcuna candaichi.

Pai quishpichij cajtaca, punllandi

punllandi villaichi.

24Pai punchapamba cajtaca,

gentecunapaj chaupipi candaichi.

Ima juyaillacunata rurashcatapash,

tucui llactacunapi villaichi.

25Mandaj Diosca jatunmari.

Paica, tucuita yali alicachi tucunamari.

Tucui dioscunatapash ashtahuan yali manllana Diosmari.

26Shuj gentecunapaj tucui

dioscunaca, yanga dioscunami.

Ashtahuangarin Mandaj Diosmi,

jahua pachataca rurarca.

27Paipaj ñaupajpica, alicachinajuipash

juyailla punchapambapashmi tian.

Pai causanapica tucui ushaipash,

cushijuipashmi tian.

28Gentecunamanda mirai familiacuna,

Mandaj Diosman cunataca cuichiyari.

Mandaj Diostaca, punchapambami cangui,

ninan ushaita charijmi cangui nichiyari.

29Mandaj Diostaca, paipaj shutita cazushpa

alicachina cashcamandallata alicachinajuichi.

Paiman caranacunatapash, paipaj ñaupajman

apamushpa shamuichi.

Mandaj Diostaca, jucha illaj, juyailla cashcamanda

paipaj ñaupajpi cumurichi.

30Paipaj ñaupajpica, tucui cai pachapi

causajcuna manllaichi.

Paimi, cai pachataca ama cuyurichun

shinllipacha cachun ruranga.

31Jahua pachapash cushijuichi,

cai pachapash ninanda cushijuichi.

‘Mandaj Diosmi mandajun’ nishpa,

tucui llactacunapi villaichi.

32Mama cuchapash, chaipi imalla tiajcunapash,

caparishpa cushijuichi.

Pambacunapash, chaipi tucui ima

tiajcunapash, cushijuichi.

33Shina cajpimi, cai pachapi mandangapaj

shamujpica, bosquepi shayanajuj quirucunapash,

Mandaj Diospaj ñaupajpi candanajunga.

Paica, cai pachata mandangapajmi shamunga.

34Mandaj Diostaca caparishpa mañaichi, paica alimari.

Paipaj juyaica, causaita causaicamanmi.

35Cashnatapash nichiyari: ‘Ñucanchita quishpichij

Taita Dioslla, ñucanchita quishpichihuayari.

Llacta chaupicunamanda cacharichishpa cushichihuayari.

Cambaj jucha illaj shutita villanajungapaj,

canda alicachishpa cushijunajungapaj,

chashna rurapairi.

36Israelcunata Mandaj Taita Diosca,

na tucurina causaita causaicaman alicachi

tucushca cachun’ nichiyari” nijurcami.

Shina nijpimi, tucui gentecuna: “Shina cachun” nishpa, Mandaj Diosta alicachinajurca.

Diospaj arcataca, levitacunami cuidanajushca

37Davidca, Mandaj Dioshuan ari ninajushpa escribishcata alichishca arca ñaupajpica, Asaf shuti runatami paipaj huauquicunandi saquirca. Punllandi imata rurana cashcashnallata, Diospajta rurashpa causanajuchunmi, chai arca ñaupajpi saquirca.

38Shinallata Obed-edom shuti runatapash, sucta chunga pusaj paipaj huauquicunatapash, Jedutún runapaj churi Obed-edom shuti runatapash, Hosa shuti runatapashmi, pungupi cuidachun saquirca.

39Sadoc shuti curataca, caishuj cumba curacunandimi, Mandaj Diospaj jatun carpapi Diosta servichun, Gabaón shuti lomapi tiaj altarpi saquirca.

40Mandaj Diosman punllandi animalcunata cushpa huañuchinajuchun, tucuillata rupachina altarpi chishipash, tutamandapash animalta Diosman cushpa tucuillata rupachinajuchunmi, chaipi saquirca. Israelcunata tucuita mandashpa Mandaj Dios escribichishcapi nishcashnallatami, rurana carca.

41Paicunahuanga, candachun agllashca Hemán shuti runatapash, Jedutún shuti runatapash, ña villashca caishujcunatapashmi chaipi saquirca. Mandaj Dios llaquinaca, causaita causaicaman cajpimi, paita ninanda alicachinajuchun chashna churarca.

42Chai candajcunahuanga Hemán shuti, Jedutún shuti runacunatami trompetata, platillota, Taita Diospajlla shuj tocanacunatapash tocachun saquirca. Jedutún runapaj churicunataca, Diospaj carpa pungupi cuidachunmi saquirca.

43Chai jipaca, tucui gentecunami paicunapaj huasiman tigranajurca. Davidpash, paipaj huasi ucu purata bendiciangapajmi, paipaj huasiman tigrarca.