JOB 19 - Quichua Imbabura Bible

Job runaguca, imatapash cashcatapacha rurashcatashnami, Taita Diosca ricuhuanga nishcami

1Chaimandami Job runaguca, cashna nishpa tigrachirca:

2“¿Ima horascamanda ñuca almata llaquichishpa rimashca shimicunahuan ñutunshna llaquichigringuichi?

3Ñucataca, ñamari chungacaman nalicachishpa rimanguichi. Nalicachishpa ñucata rimangapaca, ¿nachu pinganayan?

4Pandashpa nalita rurashcapacha cajpica, ñuca jahuapimi llaquicuna urmanman.

5Ashtahuangarin cangunaca jatun tucushpami, ñucataca rimanguichi. Ñucata fiñashpami, nalicachishpa rimahuanguichi.

6Cunanga, Taita Diosllata ñucata llaquichishcata yachaichi. Paipaj linllipimi pilluhuashca.

7Ricuichi, ñucataca llaquichihuanmi nishpa caparijpipash, napacha uyahuangachu. Ninanda caparijujpipash, ñucamandaca pipash na alita rurangachu.

8Ñuca purina ñambica, patata rurashpa jarcajpimi, na yali ushani. Ñuca purina ñangunatapash, yana yana tutatami rurarca.

9Ñuca juyailla cajtaca quichuhuarcami. Ñuca umamanda coronatapash anchuchircami.

10Tucui ladocunamanda llaquichijpimi, ña huañugrijuni. Ñuca shuyajushcataca, quirutashna fitishpami shitarca.

11Pai fiñarishpaca, ninahuanshnami llaquichihuarca. Paita fiñaj puracunatashnami, ñucataca ricuhuarca.

12Paipaj soldadocuna tandanajushpa shamushpami, muyundi jarcahuarca. Ñuca carpa muyundipimi, carpacunata shayachishpa tianajurca.

13Ñuca huauquicunatapash, ñucamanda caruyachircami. Ñuca cumbacunapash, na rijsishca runacunashnami ñuca ladomandaca caruyarca.

14Ñuca familiacunapash, na ricungapaj shamurcachu. Ñucata rijsijcunapash, ñucataca cungarcami.

15Ñuca huasipi causajcunapash, ñucata servij huarmicunapash, na rijsishca runatashnami ricuhuarca. Paicunapaj ñavipica, caru llactamanda shamushca runashnami carcani.

16Ñucata servij runata cayajpipash, na tigrachihuarcachu. Ñuca shimihuambachami, paitaca caparishpa ninanda mañajurcani.

17Ñucamanda llujshishca huahuacunamanda mañajujpipash, ñuca huarmipaca ñuca samaipash, millanayaimi carca.

18Chairalla viñaicunapash, ñucataca na ricunayachircachu. Ñuca jatarijpipash, fiñashpami rimahuarca.

19Ñuca ali cumbacunapash, tucuillami fiñahuarca. Ñuca juyashca cumbacunapashmi llaquichihuarca.

20Ñuca aichapash, ñuca carapash tullucunapimi llutarirca. Quiru ladopi tiaj aicha carahuanllami quishpirishcani.

21¡Ñuca cumbacunalla, ñucata llaquihuaichiyari! ¡Ñucata llaquihuaichiyari! Taita Diospaj maquimari, ñucataca tacarishca.

22¿Imashpata Taita Dios llaquichinshnallata catiriashpa llaquichihuanguichi? Cangunaca, ñuca aichata micunshna llaquichinajushpapash, na amishpami puringuichi.

23¡Cunanga, ñuca rimashca shimicunata maijambash escribishpachari, ali canman! ¡Chai shimicunataca, shuj libropi maijambash escribishpachari ali canman!

24¡Causaita causaipaj tiachun jirru cincelhuan, plomohuan rumipi escribishpachari ali canman!

25Ñucata Quishpichij Dios causajujtaca yachanimi. Tucuripica, paimi ñutu alpa jahuapi shayaringa.

26Ñuca carapash, ismushpa chingashca jipami, Taita Diostaca ñuca aichahuambacha ricujusha.

27Paitaca, ñucallatami ricujusha. Ñuca shungu ucupica, llaquihuan na ushajushpapash, ñuca ñavihuambachami ricujusha. Pipash shujca, na ricujungachu.

28Ashtahuangarin cangunaca: ‘¿Imashpata paitaca, catiriashpa llaquichinchiyari?’ ninami canguichi. Imamanda cashpapash, ñucami llaquita apajuni.

29Cangunaca espadapaj ñaupajpica, manllaichiyari. Imatapash cashcatapacha na rurashcamandami, cangunata llaquichingapaca, fiñarishpa espadahuan shamujun. Llaquichina tiashcata yachachunmi, chashna tucunga” nijurcami.