JOB 35 - Quichua Imbabura Bible

1Eliú shuti runaca ali yarishpami, cashna rimashpa catijurca:

2“Canga: ‘Ñucaca, Taita Diostapash yali, imatapash cashcatapacha rurajmi cani’ nishpaca, alitami nini ¿yanguichu?

3Canga, cashnami nijurcangui: ‘Paimandaca, ¿ima alitata japina caniyari? ¿Na cashpaca, juchata na rurashcamandaca, ima alitashi japisha?’ nijurcanguimi.

4Shinamandami aliguta ñuca yarijushcataca, canmambash, cambaj cumbacunamambash villangapaj munani.

5Jahua pachata ricuyari. Chaita ricushpaca, chaipi tiaj fuyutaca, candapash yali jahuaman tiajujta yariyari.

6Juchata can rurashpaca, ¿Diosta llaquichinimi yanguichu? Paita jariyashpa na cazushpapash, ¿paitaca imatashi rurai ushangui?

7Imatapash cashcatapacha ruraj cashpapash, ¿imatashi paiman cungui? ¿Na cashpaca, imatashi cambaj maquimandaca japinga?

8Diosta can na cazushcapash, canshnalla runatami llaquichinga. Imatapash cashcatapacha can rurashcapash, huañuna aichayu runapajllatami ali canga.

9Llaquichitalla ninanda llaquichijpimi, caparinajun. Ninan ushaita charijcuna llaquichijpimi, ninanda huacanajun.

10Llaquihuan cashpapash, shujllapash na cashna ninllu: ‘Ñucata Ruraj Taita Diosca, ¿maipitayari? Paica, tutacunapash candana cushijuitami cun.

11Paica ñucanchitaca, cai pachapi tiaj animalcunatapash ashtahuan yali yachajtami rurarca. Alasyu animalcunatapash yali alipacha yachajushcacunatami rurarca’ nitallapash, na ninllu.

12Nali runacunallata jariyashpa jatun tucushcamandami, paicuna chaipi caparinajujpipash, na uyanga.

13Yangalla shimicunataca, Taita Diosca na uyangachu. Tucui Ushaita Charij Diosca, ricuitallapash na ricungachu.

14Can, paita na cazunichu nijpicarin, ¿maitata llaquingayari? Can imatalla rurashcacunaca, paipaj ñaupajpimi. Shina cashcamanda, paita shuyailla.

15Ashtahuangarin cunanga, ninanda fiñarishca cashpapash nara llaquichinllu. Shinlli shimihuambash, nara tapuchinllu.

16Shinamandami Job runaca, shimita pascashpa yangata rimajun. Ima yuyaitapash na cuj shimicunatallami ninanda rimajun” nijurcami.