Psalms 102 - Quichua Imbabura Bible

Llaquihuan cashpa Diosta mañashcamiLlaquita apashpa causaj runa ninan llaquipi cashpa, Mandaj Diospaj ñaupajpi huacashpa mañashcami.

1Mandaj Dioslla, ñuca mañajujtaca uyahuayari.

Ñuca caparishpa mañashcapash,

cambajman chayapachun.

2Ñucata llaqui japijui punllapica,

ama ñucamanda cambaj ñavita anchuchipaichu,

ñucataca aliguta uyahuayari.

Ñuca mañajui punllapica, ucha tigrachihuayari.

3Ñuca causana punllacunaca, cushnishnami tucurishca.

Ñuca tullucunapash, yamda caspi

nali rupashpa puchushcashnami tucushca.

4Ñuca shungupash chugrishcami,

chaquishca jihuashnami.

Chaimandami, ñuca micunatapash cungani.

5Aij nishpa huacajujpillatami, ñuca

aichapash tullucunapi llutarishca.

6Jichushca pambapi tiaj pelícano nishca animalshnami cani.

Chulunlla pushtucunapi tiaj chushijshnami cani.

7Na puñushpami pacarini.

Huasi jahuapi pailla shayajuj alasyu animalshnami cani.

8Punllandimi ñucataca, rimashpa pingaichihuan.

Ñucata ninandapacha fiñajcunaca, ñucata

llaquichingapajmi, tandanajushpa yarinajun.

9Chaimandami uchufataca, tandatashna micuni.

Ñuca ufiana yacutapash, ñuca viquihuanllatami chapuni.

10Can ninanda fiñarishpami ñucataca,

jahuaman huandushpa shitahuarcangui.

11Ñuca causana punllacunaca, llandu yalinshnami.

Shinamandami jihuashna chaquishcani.

12Ashtahuangarin can Mandaj Diosca,

causaita causaicamanmi causajupangui.

Candaca, mirai miraicamanmi yarinajunga.

13Can jatarishpami, Sion pueblotaca llaquipangui.

Sion pueblota llaquina punllacunami capan.

Ayudashami nishca huatami chayamupashca.

14Canda servijcunaca, pueblo urmashca

rumicunatami juyanajun.

Chai pueblo ñutu alpagutapashmi llaquinajun.

15Mandaj Diospaj shutitaca, tucui

llactacunapi causajcunami manllanajunga.

Can punchapamba cajtaca, tucui cai pachapi

tiaj jatun mandajcunapashmi manllanajunga.

16Mandaj Diosmi, Siondaca shayachishca canga.

Paipaj punchapambapimi ricuringa.

Shinamandami chashna manllanajunga.

17Imatapash na rurai ushajcuna mañanajujtaca uyangami.

Paicuna ninanda mañanajujtaca, na yanga saquingachu.

18Chaitaca, jipa miraicunamambashmi escribinga.

Ña huacharinalla gentecunapashmi,

Mandaj Diostaca alicachinajunga.

19Mandaj Diosca, jahuapi tiajuj

paipajlla huasimandami ricujurca.

Jahua pachamandami, cai pachataca ricujurca.

20Prezu tiajcuna aij nishpa huacanajujta

uyangapaj, huañuchi tucunapacha nishcacunata

cacharichingapajmi, chashna ricujurca.

21Paicunata ña cacharichijpica, Mandaj

Diospaj shutita Sionbi villanajuchun,

Jerusalenbi paita alicachinajuchunmi ricujurca.

22Tucui gentecuna, llactacunata mandajcuna,

Mandaj Diosta servingapaj shujllashnalla tandanajushcapi

villanajuchun cachangapajmi ricujurca.

23Paimi, ñucataca chaupi ñambilla

ushai illajta saquihuarca.

Ñuca causana punllacunatapashmi quichijiyachirca.

24Chaimandami ñucaca, cashna nircani:

“Ñuca Taita Dioslla, ñucataca

ama chaupi causaipilla apahuaichu.

Canga, causaita causaicaman causajmari capangui.

25Cai pachataca, canmi

callarimandapacha rurarcangui.

Jahua pachapash, cambaj maquihuan rurashcami.

26Paicunaca tucuringami, ashtahuangarin

canga causajunguillami.

Chaicunaca, tucuillami churajunashna maucayanga.

Mushuj churajunatashnami churachingui.

Shina churachijpimi mushujyanga.

27Ashtahuangarin canga, canllatami capangui.

Cambaj huatacunaca, napacha tucuringachu.

28Canda servijcunapaj miraicunaca,

cambaj maquipimi ima manllaipash illaj causanajunga.

Chai miraicunapaj miraicunapash, cambaj

ñaupajpimi shinllipacha canga” nircanimi.