1Suctapaj cati sellashcata Llama fitijpica, chaupi horastashnami jahua pachapica chulunlla quedarca.
2Chai jipallami, canchis angelcuna Taita Diospaj ñaupajpi shayanajujta ricurcani. Paicunamanmi, canchis trompetacunata curca.
3Chai jipa shuj ángel shamushpaca, inciensota cushnichina oro copata apashpami, altar ñaupajpi shayarirca. Diospajlla causajcuna tucuicuna mañashcacunahuan mirachishpa, oro altar jahuapi cushnijuchun churachunmi, ashtaca inciensotapash chai angelman curca. Chai altarca, mandangapaj tiarina ñaupajpimi carca.
4Chai angelpaj maquimanda incienso cushnijuj cushni llujshishpaca, Diospajlla causajcuna mañashcacunahuan chapurishpami, Taita Diospaj ñaupajman vichai rirca.
5Chai angelca, inciensota cushnichij copata japishpami, altarpi rupajuj ninata jundachishpa, cai pachaman shitamurca. Shina shitamujpimi, ninanda culun nijpash, caparinajujpash uyarirca. Shinallata punchapamba shitajcunapashmi ricurirca. Alpa mamapash, ninanda cuyushpami tucuchijurca.
Cati catimi, trompetata huacachinajushca6Chai canchis angelcunaca, paicuna charinajuj trompetata huacachingapajmi alichirinajurca.
7Punda ángel trompetata huacachijpica runduhuan, ninahuan, yahuarhuan chapurishpami, ninaman tigrarca. Chaita cai pachaman shitamujpimi, cai pachata quimsapi chaupishpa churashca chai quimsamanda shuj chaupi cai pacha alpapi tiaj quirucunapash, verdella jihuacunapash tucuilla rupajurca.
8Jipa ángel trompetata huacachijpica, jatun urcuman rijchaj rupajuj ninatami, mama cuchaman shitamurca. Shina shitamujpimi, quimsapi shicanyachishca mama cuchaca, yahuarman tigrarca.
9Shina tucujpimi, quimsapi shicanyachishca caishuj mama cuchapi causanajuj animalcuna huañurca. Shinallatami quimsapi shicanyachishca chaishuj mama cuchapi purinajuj barcocunapash faquirishpa tucurirca.
10Ishcaipaj cati ángel trompetata huacachijpica, jahua pachamandami michun rupajunshna, jatun luzero urmamurca. Chai luzeromi, quimsapi shicanyachishca jatun yacucunapipash, pugyu yacu jahuacunapipash urmarca.
11Chai luzeroca, Jayaj shuti cashpami, quimsapi shicanyachishca caishuj yacucunata jayajyachirca. Chashna jayaj yacuta ufiashpami, ashtaca gentecuna huañurca.
12Quimsapaj cati ángel trompetata huacachijpica, quimsapi shicanyachishca indita, lunata, luzerocunatapashmi yanayachun huaglichirca. Shinamandami, quimsapi shicanyachishca chaupi punllapash, tutapash yana yana tucurca.
13Chai jipallami, shuj ángel jahuata rishpa, jahua pacha chaupita rijujta ricurcani. Chai angelca, cashna nishpami caparijurca: “¡Aij, aij, aij, cai pachapi causajcunaca, imachari tucunga! Caishuj quimsa angelcuna trompetata huacachijpica, ninan llaqui tiangarami” nijtami uyarcani.
Who We AreWhat We EelieveWhat We Do
2025 by iamachristian.org,Inc All rights reserved.
