1Maijan amohuan micungapaj tiarishpapash,
pipaj ñaupajpi tiajushcatapash aliguta yaringui.
2Ninanda micunayachijushpapash, cuchillota
cungapi churanshna jarcaringui.
3Chai munanayai micunacunataca,
ama ninandapacha munanguichu.
Chaicunaca, umachina micunami.
4Ama charij tucunatalla ninanda munashpa puringuichu.
Chai munaita saquishpa, aligutapacha yarishpa puringui.
5¿Charij tucunaca yangallata cajpitachu,
chaita ricuriajlla causagringui?
Chaicunaca, alas viñajpi jatun anga jatarishpa,
jahuata rinshna ñapash chingangallami.
6Mitsa runahuanga, ama micungapaj tiaringuichu.
Paipaj munanayai micunatapash,
ama ninandapacha munanguichu.
7Paipaj shungupi imashna yarijushpapash, paipash
chashnallata: “Micuilla, ufiailla” nijushpapash,
tucui shungumandaca na ningachu.
8Chai micushcataca, shungu tigrachinguimi.
Can aliguta pashi nishcapash, yangami canga.
9Shinlli shungu runa uyajtaca,
ama imatapash ninguichu.
Aligutapacha yarishpa ali yuyaita can
cushcataca, yangapimi churanga.
10Cambaj ñaupa taitacuna churashca mujundaca,
ama suchuchinguichu.
Taita mama illaj huahuacunapaj alpacunamambash,
ama suchuchishpa yaicunguichu.
11Paicunamanda shayarishpa mitsaj
Diosca, ninan shinllipachami.
Paimi, paicunamanda shayarishpa candaca llaquichinga.
12Yachachishca shimicunataca, tucui
shunguhuan pactachingui.
Ali yachajta ruraj cai shimicunataca,
rinrita mañachishpa uyangui.
13Huahuata llaquichinataca, ama saquinguichu.
Jamzi varahuan astijllapica, na huañungachu.
14Jamzi varahuan llaquichishpami paipaj alma,
Seolman rinamandaca cacharichingui.
15Ñuca huahualla, cambaj shungupi alipacha
yachajushca cajpica, ñuca shungupash cushijungami.
16Cambaj shimihuanga, imatapash aligutalla
rimajpica, ñuca shungupash cushijungami.
17Juchasapacunata ricushpaca, ama ñucapash
chashna cashcaiman yanguichu.
Ashtahuangarin tucui cambaj causaipi,
Mandaj Diostalla manllashpa causangui.
18Tucurimui punlla tianapacha cashcamandami,
chashna causana cangui.
Shinallata can shuyajushca punllacunaca, na tucuringachu.
19Ñuca huahualla, ñucata uyashpa ali
yachajushpaca alimi canguiman.
Ali ñanda catingapaj, cambaj shunguta alichiringui.
20Vinota ufiajcunahuanga, ama tandanajunguichu.
Aichatalla micujcunahuambash, ama tandanajunguichu.
21Machaj runapash, yapata micuj runapash,
imatapash na charijmi tucunga.
Yapata puñuj runaca, liqui churajunatami churajunga.
22Cambaj huachaj taitataca, ali uyangui.
Cambaj mama ña payayajpipash, ama yangapi churanguichu.
23Na llullaj shimita, ali yachaita, ali yuyaita yachachishcatapash
randishpaca, ama cutinga jatunguichu.
24Imatapash cashcatapacha ruraj runapaj
taitaca ninandami cushijunga.
Alipacha yachajushca churipaj huachaj
taitapash, paihuanga cushijungami.
25Cambaj taitapash, cambaj mamapash cushijushca cachun.
Canda unguj mamaca, ninanda cushijuchun.
26Ñuca huahualla, cambaj shungutaca ñucaman cuhuayari.
Cambaj ñavihuanga, ñuca imashna causajujta ricuhuayari.
27Culquimanda huainayaj huarmica,
manllanayai ucu ucu yacushnami.
Na rijsishca huarmipash, yacuta llujchingapaj
allashca quichiji quichiji jatun utujushnami.
28Chai huarmipash, shuhua runashnami pacalla chapajun.
Paimandami, yachashpata na cazuj runacunapash,
ashtaca miranajun.
29¿Aij nishpa purinaca pipajta?
¿Nanaihuan purinaca pipajta?
¿Fiñanajushpa purinaca pipajta?
¿Aij nishpa huacanaca pipajta?
¿Yangamanda chugrichi tucushpa purinaca pipajta?
¿Ñavi verdeyashca purinaca pipajta?
30Chai llaquicunaca, yapata machashpa purijcunapaj,
chapushca ufianacunata mascashpa purijcunapajmi.
31Copapi punchapamba pucalla vino
tiajujpipash, ama ricunguichu.
Cungataca mishquillami langaringa.
32Ashtahuangarin chai jipaca, culebrashnami caninga.
Millai culebra canishcashnami nanachinga.
33Cambaj ñavipica, na ricushcacunami ricuringa.
Cambaj shungumandapash, jatun nali
shimicunami llujshinga.
34Mama cucha chaupipi sirijunshnami cangui.
Jatun barco chaupipi shayajuj caspi
pundapi tiajunshnapashmi cangui.
35Cashnapashmi ningui: “Chugrichi
tucushpapash, napacha nanarcachu.
Macai tucushcatapash na yarinichu.
Rijcharishpaca, ufianata mascagrisharami” ninguimi.
Who We AreWhat We EelieveWhat We Do
2025 by iamachristian.org,Inc All rights reserved.