ESDRAS 6 - Quichua Imbabura Bible

1Shina nijpimi, jatun mandaj Darío shuti runaca, escribishcacunata alichishca tiajuj huasipi mascachun mandarca. Babilonia llactapica, chai huasipimi imapash ninan valishcacunata alichin carca.

2Chashna mascachijpica, Media shuti llactapi tiaj Acmeta shuti pueblopi mandashpa tiajuna huasipimi: “Ama cungangapaj” nishca shuj librota tarirca. Chai libropica, cashnami escribishca tiajurca:

3“Jatun mandaj Ciro shuti runa, Babilonia llactata mandai callarijui punda huatapica, pai jatun mandaj Ciro shuti runallatami, Jerusalenbi Taita Diospaj huasita cutin shayachinajuchun, cashna mandarca: ‘Diospaj huasita cutin shayachigrichi. Chai huasimi, Diosman animalta cushpa huañuchina pushtu canga. Chai huasi pircacunataca, shinllitapacha shayachinguichi. Jatundaca, ishcai chunga canchis metrota, anchotapash ishcai chunga canchis metrotallata ruranguichi.

4Pircapica, quimsa fila jatun rumicunata, shuj fila mushuj caspicunata churanguichi. Chai huasipaj randinacunapaca, jatun mandaj ñuca huasipi tiaj imapash ninan valishcacunatami cunga.

5Shinallata Taita Diospaj huasimandaca orota, culquita rurashca imalla tiashcacunatapash apanguichilla. Chaicunataca Nabucodonosor shuti runami, Jerusalenbi Diospaj huasimanda llujchishpa, Babilonia llactaman apamurca. Chaicunataca chai pushtumanllata apaichilla. Jerusalenbi Taita Diospaj huasimanllata tigrashpa apaichilla. Chaita apashpaca, Taita Diospaj huasipi churagringuichi’ nishpami mandarca” nishpa escribishcami tiajurca.

6“Cunanga, jatun yacu chimba lado llactacunata mandaj Tatnai shuti, Setar-boznai shuti runacunapash, jatun yacu chimba lado llactacunatallata mandaj cangunapaj cumbacunapash, Jerusalenmanda anchurichi.

7Taita Diospaj chai huasita shayachinajuchunga saquichilla. Judá llactapi causajcunata mandajpash, mandaj rucucunapash, Taita Diospaj huasitaca, punda shayajushca pushtupillata cutin shayachinajuchun saquichilla.

8Taita Diospaj chai huasita cutin shayachingapaj, Judá llactata mandaj rucucunahuan canguna imata ruranataca, ñucami mandani. Chai huasita rurana ama jarcarichunga, jatun yacu chimba ladopi causajcuna impuestota cushcamanda, jatun mandajpaj jazindapi imalla tiashcacunatami, imata randichumbash na cungashpa, chai runacunaman cuna canguichi.

9Jahua pachapi causajuj Taita Diosman cushpa tucuillata rupachinajuchun, imalla minishtirishcataca, shicucunata, jari llamacunata, maltun llamacunata cunguichi. Shinallata trigota, cachita, vinota, aceitetapash, Jerusalenbi causanajuj curacuna mañashcashnallata cunguichi. Chaicunataca ama mitsashpa, punllandi cunguichilla.

10Jahua pachapi causajuj Taita Dios cushijushpa chasquina animalcunata carashpa huañuchinajuchun, shinallata jatun mandaj ñucapaj ñuca churicunapaj causaimandapash, Diosta mañanajuchun cunguichilla.

11Shinallata ñucallatami, caitapash mandani: Ñuca mandashcata maijambash na cazujtaca, paipaj huasipi tiaj vigas caspita surcushpa, chai caspita shayachishpa, chaipi huarcunguichilla. Chashna na cazushcamandami, paipaj huasipash mapata shitana pushtu tucunga.

12Jerusalenbi Taita Diospaj huasita shayachinajujta huaglichingapaj, na cashpaca urmachingapaj nalita rurajtaca, jatun mandajta cajpipash, shuj gentecunata cajpipash, paipaj shuti chaipi causachun saquij Taita Diosllata llaquichijuchun. Jatun mandaj Darío ñucami, caita rurachun mandarcani. Chaitaca, ucha pactachinguichi ninimi” nishpa escribishcami tiajurca.

13Chaimandami, jatun yacu chimba lado llactata mandaj Tatnai shuti runaca, Setar-boznai shuti runandi, paicunapaj cumbacunandi, jatun mandaj Darío shuti runa mandashcashnallata, na cungashpa chashnatapacha pactachinajurca.

14Shinallata Dios ima nishcata villaj Hageo shuti runapash, Iddo shuti runapaj churi Zacarías runapash villashcashnallatami, Judá llactapi causajcunata mandaj rucucunaca, chai huasita shayachishpa, tucuita ali ruranajurca. Israelcunapaj Taita Diospash, Ciro shuti, Darío shuti runacunapash, Persia llactata jatun mandaj Artajerjes shuti runapash mandashcashnallatami, chai huasitaca shayachinajurca.

15Chai huasica, jatun mandaj Darío ña sucta huatata mandajushca, Adar shuti quillapaj quimsa punllapimi tucurirca.

16Shinamandami israelcunapash, curacunapash, levitacunapash, prezu apai tucushcamanda huaquin tigramushcacunapash, Taita Diospaj cai huasitaca, ninanda cushijushpa Diosman minganajurca.

17Taita Diospaj cai huasita Diosman minganajushpaca, patsaj shicuta, ishcai patsaj jari llamata, chuscu patsaj maltun llamatami Diosman cunajurca. Tucui israelcunapaj juchamandaca, chunga ishcai Israel aillucuna cashcamandami, chunga ishcai maltun chivota cunajurca.

18Chai jipaca, Moisés mandashpa escribishcapi nijunshnallatami curacunataca, paicunapaj yaicuna horas chayajpi yaicunajuchun churanajurca. Jerusalenbica levitacunatapashmi, Diosta servinajuchun shuj shuj ruranacunapi tucuicunatallata churanajurca.

19Huata callari quillapaj chunga chuscu punllapica, prezu apai tucushcamanda tigramushcacunapaj miraicunapashmi, pascua punllapi cushijushpa micunajurca.

20Curacunapash, levitacunapash, shujllashnalla yarishpami mapa illaj tucunajurca. Chashna ima mapapash illaj cashpami, prezu apai tucushpa tigramushcacunamanda, paicunapaj huauqui curacunamanda, paicunamandallatapash chai chuscu punllapi, Diosman animalcunata cushpa huañuchinajurca.

21Chai pascua punllapica, prezu apai tucushcamanda tigramushca israelcunapashmi micunajurca. Paicunaca, llactapi causaj gentecuna mapata rurashpa causanajushcamanda anchurishpa, israelcunata Mandaj Taita Diosta mascaj tucui gentecunahuan tandanajushpami micunajurca.

22Levadura illaj tandata micuna jatun fiestataca, canchis punllacamanmi ninanda cushijushpa ruranajurca. Mandaj Diosca, paicunata cushichishcamanda, Asiria llactata jatun mandajpaj shungutapash, paicunata juyana yuyaiman tigrachishcamandami chashna ruranajurca. Taita Diospaj huasita ruranapi paita shinllichingapajmi, chai yuyaita curca. Chaica, israelcunapaj Taita Diospaj huasimi.