2 CRÓNICAS 24 - Quichua Imbabura Bible

Judá llactataca, Joás shuti runami mandajushca(2 Rey. 12:1-21)

1Joás shuti huambraguca, canchis huatata charishpami, mandai callarirca. Paica, chuscu chunga huatatami Jerusalenbi mandajurca. Paipaj mamaca, Beerseba shuti pueblomanda Sibia shuti huarmimi carca.

2Joás shuti runaca, Joiada shuti cura causajui tucui punllacunami, Mandaj Diospaj ñaupajpica, alitalla rurashpa causajurca.

3Joiada shuti curami, Joás runataca ishcai huarmihuan cazarachirca. Chai huarmicunahuanmi paica churicunata, ushicunata charirca.

4Chai jipami, cashna tucurca: Joás runaca, Mandaj Diospaj huasita cutin alichinatami yarirca.

5Chaita yarishpami curacunata, levitacunata tandachishpa, cashna nirca: “Judá llactapi tiaj pueblocunaman rishpa, cangunapaj Taita Diospaj huasita cada huata alichingapaj tucui israelcunapajmanda culquita tandachigrichi. Cangunaca, chaitaca uchami rurana canguichi” nircami. Shina mandajpipash levitacunaca, na ucha ruranajurcachu.

6Chaimandami jatun mandajca, curacunata mandaj Joiada shuti curata cayashpa, cashna nijurca: “Judá llactapi, Jerusalenbi causajcuna imatalla Diosman carashcacunata levitacuna apamuchunga, ¿imashpata na uchalla mandarcangui? Chaitaca, Mandaj Diosta servij Moisesmi, imashna causanata Dios yachachishca shimicunata alichina jatun carpata rurangapaj apamuchun, tandanajushca isarelcunata mandashca carca.

7Diosta na manllaj, Atalía shuti huarmipash, paipaj churicunapashmi, Taita Diospaj huasipi imalla tiashcacunata tucuchishca. Mandaj Diospaj huasipi paipajlla shicanyachishca tucui tiashcacunatapashmi, yanga dioscunata rurashpa tucuchishca” nijurcami.

8Shina nishpami jatun mandajca, shuj cajonda rurachun mandarca. Chai cajondaca, Mandaj Diospaj huasi pungu canlla ladopimi churanajurca.

9Chai jipaca, jichushca pambapi cashpa, Taita Diosta servij Moisés israelcunata mandashcashnallata, Mandaj Diosman imatapash caranajuchun nishpa, Judá llactapi, Jerusalenbi villachunmi mandarca.

10Chaita villajpica, tucui mandajcunapash, tucui gentecunapashmi cushijunajurca. Shina cushijushpami Diosman imatalla caranataca, chai cajonbi jundangacaman apamunajurca.

11Jatun mandajpaj escribij runapajman chai cajonda levitacuna apana punlla chayajpica, ashtaca culqui tiajta ricushpami, jatun mandajpaj escribij runapash, curacunata mandaj cachun churashca curapash shamunajurca. Shina shamushpami, chai cajonda apashpaca, culquita tucuillata llujchishpa, chai cajondaca cutin chaipillata churanajurca. Punllandi shina rurashpami, ashtaca culquita tandachinajurca.

12Chai culquitaca, jatun mandajhuan, Joiada shuti curahuanmi, Mandaj Diospaj huasipi imatalla rurashpa servijcunaman cunajurca. Mandaj Diospaj huasita alichinajuchunga, paicunami rumita labrajcunata, carpinterocunata apamunajurca. Shinallata jirruta, bronceta imatalla ruranata yachajcunatapash apamushpami, chai huasitaca alichinajurca.

13Imatalla ruranata yachajcunami, chai ruranacunataca ruranajurca. Paicunapaj maquihuan rurashpami, Diospaj huasitaca cutin alichishpa tucuchirca. Taita Diospaj huasitaca, punda imashna rurashcatashnallatami cutin alichishpa saquinajurca. Chai huasitaca, ninan shinllitapachami shayachinajurca.

14Ña tucuillata alichijpi puchushca culquitaca, jatun mandajpajman, Joiada shuti curapajmanmi apamunajurca. Chai culquihuanga, Mandaj Diospaj huasipi imatalla charinacunatami rurachinajurca. Diospaj huasipi Diosta servingapaj, imatalla charinacunatapashmi rurachinajurca. Cutana rumicunata, cucharacunata, vasocunatami oromanda, culquimanda rurachinajurca. Mandaj Diospaj huasipica, Joiada shuti cura causajui tucui punllacunapimi, animalcunata Diosman cushpa huañuchishpa, tucuillata rupachinajurca.

15Ashtahuangarin Joiada shuti curaguca, ashtaca punllacunata causashpa, ña rucuyashpami huañurca. Paica, patsaj quimsa chunga huatata charishpami huañurca.

16Pai huañujpica, Davidpaj pueblopimi, jatun mandajcunata pambashca ladopi pambarca. Paitaca, israelcunamambash, Taita Diosmambash, Diospaj huasipipash alita rurashcamandami, chaipi pambarca.

17Joiada shuti cura huañushca jipaca, Judá llactata mandajcunaca, jatun mandajpajman shamushpami, canda cazupashunmi ninajurca. Paicuna nishcataca, jatun mandajca ari nircallami.

18Paicunapaj ñaupa taitacunata Mandaj Taita Diospaj huasitaca, jichushpami saquinajurca. Chaimandami, Asera shuti huarmi diosman rijchajcunata, labrashpa rurashca imamambash rijchaj dioscunatara servinajurca. Chashna juchata rurashcamandami Taita Diosca, Judá llactapi causajcunahuambash, Jerusalenbi causajcunahuambash ninanda fiñarirca.

19Shina fiñarishpapash Mandaj Diosca, paipajman tigrarichun nishpa villanajuchunmi, pai ima nishcata villajcunata cachamurca. Chai villajcunami, shinllita tacurinajurca. Ashtahuangarin paicunaca, na uyanayachircachu.

20Shinamandami Joiada shuti curapaj churi Zacarías runapajman, Taita Diospaj Espíritu shamurca. Chaimandami paica, gentecunata yali ashtahuan jahuaman shayarishpa, cashna nijurca: “Taita Diosca, cashnami nin: ‘¿Imashpata Mandaj Dios ñuca mandashcacunataca, faquinshna na cazunguichi? Chashna na cazushcamandaca, imapash alica na shamungachu. Mandaj Dios ñucata canguna saquishcamandaca, cangunatapash jichushpami saquisha’ ninmi” nijurcami.

21Ashtahuangarin paicunaca, paita llaquichinatami pacalla yarinajurca. Paicunaca, jatun mandaj mandajpimi, Mandaj Diospaj huasi patiopi Zacarías runataca, huañungacaman rumicunahuan peganajurca.

22Chashnami jatun mandaj Joás shuti runaca, Zacariaspaj taita Joiada shuti cura alita paiman rurajushcataca na yarishpa, Zacarías runataca huañuchirca. Zacarías runa ña huañugrijushpaca, cashnami nirca: “Cashna rurashcataca, Mandaj Diosllata ricushpa llaquichipachun” nircami.

23Mushuj huata callaripimi, Siria llactamanda soldadocunaca, jatun mandaj Joás shuti runahuan macanajungapaj vichai shamunajurca. Judá llactaman, Jerusalenman shamushpami, chai pueblopi causanajuj puramanda tucuilla mandajcunata huañuchinajurca. Chaipi imalla tiashcacunata quichushpami, Damasco pueblota jatun mandajpajman cachanajurca.

24Siria llactamanda soldadocuna ashalla shamushca cajpipash Mandaj Diosca, Judá llactamanda ashtaca soldadocunatami, paicunapaj maquipi churarca. Paicunapaj ñaupa taitacunata Mandaj Taita Diosta saquishcamandami, chashna churarca. Shinami Joás runataca, ninanda llaquichinajurca.

25Chai sirio soldadocunaca, Joás runataca ninanda chugrichishpami, ña huañunallata saquishpa rishca carca. Paitaca, Joiada curapaj churicunata huañuchishpa yahuarta jichashcamandami, paita servijcunallata pacalla jatarishpa, paipaj camapi chugrichijpi paica huañurca. Shina huañujpimi paitaca, Davidpaj pueblopi pambarca. Ashtahuangarin jatun mandajcunata pambashca utujupica, na pambarcachu.

26Pacalla jatarishpa paita huañuchijcunaca: Amonitapura Simeat shuti runapaj churi Zabad shuti runahuan, moabitapura Simrit shuti runapaj churi Jozabad shuti runahuanmi carca.

27Joás shuti runapaj churicunamandapash, ninanda mirachishpa impuestota japijushcamandapash, Mandaj Diospaj huasita cutin alichishcamandapash, jatun mandajcuna imatalla rurashcacunata escribishca libropimi tiajun. Joás runapaj randica, Amasías shuti paipaj churimi mandajurca.