1Siria llactata jatun mandaj Ben-adad shuti runaca, tucuilla paipaj soldadocunata tandachishpami, quimsa chunga ishcai jatun mandajcunatapash paicunapaj caballocunandi, carretacunandi tandachirca. Chai jipami, Samaria puebloman vichai rishpa, chai pueblota muyundi chaupipi churashpa, chaipi causajcunahuan macanajurca.
2Ben-adad runaca, Israel llactata jatun mandaj Acab runa causajuj pueblomanmi, cashna nichun villajcunata cacharca:
3“Ben-adad runaca, cashnami nin: ‘Cambaj culquipash, oropash ñucapajmi. Cambaj huarmicunapash, juyailla cambaj churicunapash ñucapajmi’ ninmi” nichunmi cacharca.
4Shina nijpimi, Israel llactata jatun mandajca, cashna nishpa tigrachirca: “Can jatun mandaj ñuca amo nishcashnallata ñucapash, ñuca imalla charishcacunapash cambajmi canchi” nircami.
5Chai villaj runacunaca, Acab runapajman cutin tigramushpami cashna ninajurca: “Ben-adad runaca, cashnami nirca: ‘Cambaj culquitapash, orotapash, cambaj huarmicunatapash, churicunatapash ñucaman cuhuai nichunga, ñami cacharcani.
6Ashtahuangarin shinallata caya cai horasllatami, ñucata servijcunata cambajman cachamusha. Paicunami cambaj huasipi, canda servijcunapaj huasicunapi imalla tiashcacunata ricungapaj yaicunga. Paicunaca, tucui ima juyaillagucunata can charishcatami apamunajunga’ nircami” ninajurcami.
7Shina nijpimi, Israel llactata jatun mandajca, chai llactata mandaj rucucunata cayashpa, cashna nirca:
—Ricuichi cunanga, cai runaca ñucata llaquichinatallami mascajun. Chaitaca, cangunallata ali ricuichi. Ñuca huarmicunata, ñuca churicunata, ñuca charishca culquita, orota cuchun nishpami, ñucapajman cachamushca. Chaitaca cushallami nircanimi— nirca.
8Shina nijpimi tucui mandaj rucucunapash, tucui gentecunapash cashna ninajurca:
—Paitaca ama cazuichu. Pai imatalla mañashcatapash, ama cunguichu— ninajurcami.
9Shina nijpimi Acab shuti runaca, Ben-adad shuti runapaj randi parlajcunaman cashna nishpa tigrachirca:
—Ñuca amo jatun mandajtaca, cashna nigrichi: ‘Canda servij ñucata punda mandashcataca ari nircanimi. Shina cajpipash cunan cai jipa mandashcataca, na rurashachu’ ninmi nigrichi— nircami.
Shina nijpimi, jatun mandajpaj randi villajcunaca villanajurca.
10Chaimandami Ben-adad runaca, Acab runaman cashna nichun cutin cacharca: “Cai Samaria puebloca, ñucata catimuj cai tucui soldadocunapaca maqui junda, maqui junda alpata apashpa ringapajllapash na pactangachu. Na chashna rurajpica, dioscunapash ninandapacha llaquichihuachun” nichunmi cacharca.
11Shina nijpimi Israel llactata jatun mandajca, cashna nishpa tigrachirca: “Chairapash macanajuiman llujshijushpata, ña macanajuita mishashcashnaca, ama jariyajuichu ninmi nigrichi” nishpami cacharca.
12Ben-adad runaca, chaishuj jatun mandajcunahuan carpacunapi, ufiashpa tiajushpami, paiman chai shimicunata villajpi yacharca. Chaita yachashpami, paita servijcunataca: “Macanajuiman ringapaj alichirichi” nishpa mandarca. Shina mandajpimi paicunaca, Samaria llactapi causajcunahuan macanajugringapaj alichirinajurca.
13Shina cajpimi, Dios ima nishcata villaj shuj runaguca, Israel llactata jatun mandaj Acab runapajman shamushpa, cashna nirca:
—Mandaj Diosca, cashnami nin: ‘¿Chai tucui tandanajushca gentecunata ricurcanguichu? Ricui ñucataca, Mandaj Dios cajta can rijsichunmi, cunanga paicunataca cambaj maquipi churagrini’ ninmi— nircami.
14Shina villajpimi Acab runaca, cashna tapurca:
—¿Paicunataca, pihuanshi ñuca maquipi japichinga?— nijpimi chai villaj runaca, cashna nirca:
—‘Llactacunata mandajcunata servijcunahuanmi, cambaj maquipi churagrini’ ninmi Mandaj Diosca— nircami.
Shina nijpimi, Acab runaca:
—¿Maijanshi macanajuitaca callaringa?— nishpa tapujpi, chai villaj runaca:
—Canmi callarina cangui— nirca.
15Shina nijpimi Acab runaca, llactacunata mandajcunapaj servijcuna alichirishcata ricushpa yalirca. Paicunaca, ishcai patsaj quimsa chunga ishcai servijcunami carca. Chai jipami, tucuilla shuj gentecunatapash, tucui israelcunatapash alichirishcata ricushpa yalirca. Paicunaca, canchis huaranga runacunami carca.
16Chaupi punllami paicunaca, macanajuiman llujshirca. Ben-adad runaca, paita ayudangapaj shamushca quimsa chunga ishcai jatun mandajcunahuanmi, carpacunapi ufiashpa machajurca.
17Chai macanajuipica, llactacunata mandajcunapaj servijcunarami, punda llujshinajurca. Ben-adad runa chapachun cachashcacuna chaita ricushpami: “Samaria pueblomanda runacuna llujshimushcami” nishpa villanajurca.
18Chaita villajpimi Ben-adad runaca, cashna nirca: “Casilla ali causaita mascashpa shamushca cajpipash, causajta japinguichi. Macanajungapaj shamushca cajpipash, causajta japinguichilla” nishpami cacharca.
19Samaria pueblomandaca, llactacunata mandajcunapaj servijcunami ñaupashpa llujshimurca. Paicunata catishpami, ashtaca soldadocunapash llujshimunajurca.
20Paicunaca, tucuicunami paicunahuan macanajungapaj shamujtaca huañuchinajurca. Shinallata siriocuna pacajungapaj calpajpica, israelcunaca catishpami rinajurca. Siria llactata jatun mandaj Ben-adad runaca, caballopi tiarishpami, caballopi tiarij huaquin soldadocunandi calpashpa pacajugrirca.
21Chashna cajpipash, Israel llactata jatun mandajca catishpa rishpami, siriocunataca caballocunapi purij soldadocunatapash, carretacunapi purij soldadocunatapash chugrichishpa, ashtacatapacha huañuchishpa tucuchijurca.
22Chai jipami, Dios ima nishcata villaj runaguca, Israel llactata jatun mandajpajman shamushpa cashna nirca:
—Caimanda rishpaca, ashtahuan shinlli tucushpa, imatalla rurangapajpash aliguta yaringui. Siria llactata jatun mandajca, caimanda shuj huata jipaca, cutinmi canhuan macanajungapaj shamunga— nircami.
23Siria llactata jatun mandajta servijcunaca, cashnami ninajurca:
—Israelcunapaj dioscunaca, urcucunapi causaj dioscunamari. Chaimandamari ñucanchitaca macanajushpa misharca. Ashtahuangarin pugru pambacunapi macanajushpaca, ¿nacha mishashun?
24Cunanga cashna rurai: Jatun mandajcunataca, paicuna mandajushcamanda tucuicunata anchuchishpa, paicunapaj randica soldadocunata mandajcunata churai.
25Can mishai tucushpa chingachishca soldadocunatashna, caballocunatashna, carretacunatashna cutin tandachi. Chashna tandachishpa, pugru pambapi macanajushpaca, ¿nacha mishashun?— ninajurcami.
Paicuna nishcata cazushpami, Ben-adad runaca chashnallata rurarca.
26Ña shuj huata yalishca jipami, Ben-adad runaca Siria llacta soldadocuna alichirishcalla cajta ricushpa yalirca. Chai jipami, israelcunahuan macanajungapaj Afec shuti puebloman shamurca.
27Shinallata Israel soldadocunapashmi, ña alichirishcalla carca. Chai jipami, imalla minishtirishcata apashpa, siriocunahuan tuparishpa macanajungapaj rinajurca. Israelcunaca, siriocunapaj chimba purapimi carpacunata shayachishpa, ishcai corral junda chivocunashna tianajurca. Siriocunaca, pamba jundami tianajurca.
28Chai jipami, Taita Diospaj runaguca, Israel llactata jatun mandajpajman shamushpa, cashna nirca:
—Mandaj Diosca cashnami nin: ‘Siriocunaca, ñucataca Mandaj Diosca urcucunapi causajuj Taita Diosmari, pugru pambacunapi causajuj Taita Diosca na canllu ninajurcami. Chaimandami, cai tucuilla ashtaca gentecunataca, cambaj maquipi churagrini. Ñucataca, Mandaj Dios cajta can rijsichunmi, chashna churagrini’ ninmi— nircami.
29Canchis punllacamanmi, ishcandi ladollata carpacunapi chimbapura tianajurca. Ña pusaj punlla tucujpimi, macanajui callarirca. Israelcunaca, shuj punllapillami siriocunataca chaquilla purij, patsaj huaranga soldadocunata huañuchirca.
30Huaquin siriocunaca, Afec shuti pueblomanmi pacajungapaj rinajurca. Chai pueblo pirca urmashpami, pacajushpa quedashcacunataca, ishcai chunga canchis huaranga soldadocunata huañuchirca. Shinallata Ben-adad runapashmi, chai pueblopi pacajungapaj shamurca. Chaipimi shuj ucumanda, chaishuj ucuman pacajushpa calpariajurca.
31Chaimandami paita servijcunaca, cashna ninajurca:
—Ricui, israelcunata jatun mandajcunaca, ninanda llaquijcunami nijtami uyashcanchi. Cunanga, cañamuta churajushpa, ñucanchi cungapipash cabiata churajushpa, Israel llactata jatun mandajpajman llujshishunchi. Chashnata ricushpaca, canda llaquishpa napash huañuchingachu— ninajurcami.
32Shinami cañamuta huatarishpa, cungapipash cabiata churajushpa, Israel llactata jatun mandajpajman shamushpa, cashna ninajurca:
—Canda servij Ben-adad shuti runaca: ‘Ñucata ama huañuchihuaichu nishpami mañajupani’ ninmi— ninajurca.
Shina nijpimi, Acab runaca:
—¿Paica causajupanrachu? Ñuca huauquimari— nirca.
33Shina nijpica, na huañuchingapajmi chashna nijun yashpami, chai runacunaca:
—Cambaj huauqui Ben-adad runaca causajupanrami— nishpa, ucha villanajurca.
Shina villajpimi, Acab runaca:
—Pushamugrichi— nishpa cacharca.
Shina cachajpi Acab runapajman Ben-adad runa shamujpimi, paica paipaj carretapi vitsiachirca.
34Chaipimi Ben-adad runaca, cashna nirca:
—Ñuca taita, cambaj taitata quichushca pueblocunataca tigrachishallami. Samaria pueblopi ñuca taita rurashca plazacunatashnallata, cambash Damasco pueblopi plazacunata ruranguilla— nircami.
Shina nijpimi Acab runaca, cashna nirca:
—Shina cashpaca, chaita ari nishcamandami, ñucapash candaca richun saquigrini— nircami.
Chaita pactachingapaj paihuan ari ninajushpaca, richun saquircallami.
35Chai jipami, Dios ima nishcata yachajuj puramanda shujca, Taita Diosllata mandajpi paipaj cumbataca:
—Cunanga, ñucata chugrichihuai— nirca.
Ashtahuangarin chaishuj runaca, na chugrichingapaj munarcachu.
36Chaimandami chugrichihuai nij chai runaca, cashna nirca:
—Mandaj Dios mandashcata na cazushcamandami, ñuca ladomanda can rijpica, shuj león tuparishpa, candaca huañuchinga— nircami.
Pai chaimanda ña anchurishpa rijujpica, shuj león ñambi tuparishpami huañuchirca.
37Chai jipami, Dios ima nishcata villaj runaca, shuj runahuan tuparishpa:
—Cunanda chugrichihuai— nijpi, chai runaca huactashpa chugrichirca.
38Chashna chugrichijpi rishpami, Dios ima nishcata villaj runaca, jatun mandaj Acab runa yalina ñambi shayaringapaj rirca. Paita ama rijsichunga, ñavita huatarishcami shayajurca.
39Jatun mandaj ña chaita yalijujpimi paica, jatun mandajta caparishpa cashna nirca:
—Canda servij ñucaca, jatun macanajui chaupipimi carcani. Chaipimi shuj soldadoca, shuj runata apamushpa ñuca ladoman quimirishpaca, cashna nihuarca: ‘Cai runata ricuriangui. Pai pacajushpa rijpica, canmi paipaj randi huañungui. Na cashpaca, quimsa chunga chuscu kilota pezaj culquitami cungui’ nihuarcami.
40Canda servij ñucaca, imacunatapash rurashpa musparijungacamanmi, chai runaca pacajushpa rishca— nircami.
Shina nijpimi Israel llactata jatun mandajca, cashna nirca:
—Chashnallatami llaquichi tucungui, canllatami chaitaca villarcangui— nircami.
41Shina nijpimi paica, ñavi huatarishcata ucha anchuchirca. Chashna anchuchijpimi, Israel llactata jatun mandajca, Dios ima nishcata villajpura cajta rijsirca.
42Chaimandami chai villaj runaca, cashna nirca:
—Mandaj Diosca, cashnami nin: ‘Ñuca tucuchingapaj shicanyachishca runata cambaj maquimanda cacharishcamandaca, canmi paipaj randi huañungui. Cambaj gentecunami, paipaj gentecunapaj randi huañunga’ ninmi— nircami.
43Shina nijpimi, Israel llactata jatun mandajca, ninanda llaquirishpa fiñarishca rijushpa, Samaria pueblopi tiaj paipaj huasiman chayarca.
Who We AreWhat We EelieveWhat We Do
2025 by iamachristian.org,Inc All rights reserved.
