1Josías shuti runapaj churi, Judá llactata jatun mandaj Joacim shuti runaca, ñami chuscu huatata mandajurca. Chai huatapimi, profeta Jeremiasca, Nerías shuti runapaj churi escribij Baruc shuti runaman Dios villachun mandashcata villajurca. Jeremiasca, Dios villashca shimicunataca, pillushca carapi Baruc runa escribijujpimi, cashna nishpa villajurca:
2“Baruc runalla, israelcunata Mandaj Taita Diosca, candaca cashnami nin:
3‘Canga cashnami nijurcangui: ¡Aij ñucalla, cunanga imachari tucusha! Mandaj Diosca, cai jatun llaquihuan cajpillatami, ashtahuan llaquichihuan. Huacaitapash na ushanichu, ashatallapash na samai ushanica’ nijurcanguimi.
4Chaimanda paitaca, cashna ningui nihuarcami: Mandaj Diosca, cashnami nin: ‘Ricui, ñuca shayachishcacunatami urmachijuni, ñuca tarpushcacunatami fitishpa shitajuni. Tucui cai llactapi causajcunatami, chashna rurasha.
5¿Shina rurajujta ricushca jahuachu, canllata jatun tucungapaj mascangui? Chaitaca, ama mascaichu. Ricui ñucaca, tucuicunamanmi llaquita apamuni. Ashtahuangarin can maiman rijujpipash, macanajushpa imatapash quichushpa apamushcatashnami, canman causaita cusha’ ninmi Mandaj Diosca ningui nihuarcami” nishpami villajurca.
Who We AreWhat We EelieveWhat We Do
2025 by iamachristian.org,Inc All rights reserved.
