NÚMEROS 32 - Quichua Imbabura Bible

Rubenbaj, Gadpaj aillucunaca Jordán yacu ladopimi, indi llujshimuj ladoman causai callarishca(Deut. 3:12-22)

1Rubenbaj, Gadpaj miraicunaca, ninan ashtaca ashtaca animalcunatami charirca. Paicunaca, Jazer shuti, Galaad shuti llactacunapica, animalcunata charingapaj alipacha cajtami ricunajurca.

2Chaimandami Gadpaj, Rubenbaj miraicuna shamushpaca Moisestapash, Eleazar curatapash, tandanajushca israelcunata mandajcunatapash cashna ninajurca:

3—Atarot, Dibón, Jazer, Nimra, Hesbón, Eleale, Sebam, Nebo, Beón shuti pueblocunataca,

4tandanajushca israelcunapaj ñaupajpi, Mandaj Dios tucuchishca llactami. Chai llactapica, animalcunata charingapaj alipachami. Canda servijcunaca, animalcunata charipanchimari— ninajurcami.

5Shinallata cashnatapashmi ninajurca:

—Cambaj ñaupajpi ñucanchi ali ricurishca cajpica, cai llactataca canda servij ñucanchipaj cachun cushpami ali canman. Shina cujpica ñucanchitaca, cai Jordán yacuta na chimbachinachu capangui— ninajurcami.

6Moisesca, Gadpaj, Rubenbaj aillucunataca, cashna nishpami tigrachirca:

—Cangunapaj huauquicuna jatun macanajuiman rijpica cangunaca, ¿caipillatachu quedagringuichi?

7¿Imashpata cangunaca, Mandaj Dios carashca llactaman israelcuna ama chimbachun, nali yuyaita cunajunguichi?

8Chashnallatami cangunapaj taitacunapash, Cades-barnea shuti pueblopi cashpa, llactata ricushpa tigramuchun cachashca punllacunapica jarcanajurca.

9Paicunaca, ninanda jatarij Escol shuti yacucaman vichai rishpami, chai llactata ricushpa tigramunajurca. Ña tigramushpami, Mandaj Dios carashca llactaman israelcuna ama yaicumuchunga, nali yuyaita cushpa jarcanajurca.

10Chaimandami, Mandaj Diosca nina japirinshna fiñarishpa, cashna nishpa juramenturca:

11‘Egiptomanda vichai llujshimushca, ishcai chunga huata yalita charij runacunaca, Abrahamman, Jacoboman, Isaacman ñuca carashapachami nishpa juramentushca llactataca, napacha ricungachu. Paicuna ñucata na tucui shunguhuan catinajushcamandami, na ricunga’ nijurcami.

12Ricushpa tigraj puramandaca, cenezeopura Jefone shuti runapaj churi Calebhuan, Nun shuti runapaj churi Josuehuanllami, Mandaj Dios ñucata tucui shunguhuan catinajushcamanda ricunga.

13Mandaj Diosca nina japirinshna, israelcunahuan fiñarishpami, jichushca pambapi chuscu chunga huatata chingashca purinajuchun paicunataca saquirca. Mandaj Diospaj ñaupajpi nalita ruraj chai miraicuna tucuilla tucuringacamanmi, chashna saquirca.

14Ricuichi cangunaca, juchata rurajcunapaj miraicuna cashpami, cangunapaj taitacunapaj randi nalita ruranajunguichi. Mandaj Dios israelcunata ninanda fiñashcata ashtahuan mirachingapajmi, chashna ruranajunguichi.

15Diosta catijushcata canguna saquishpa tigrarijpica, Diospash cutinmi jichushca pambapi saquinga. Cangunallatami, tucuilla cai gentecunata tucuchinguichi— nijurcami.

16Shina nijpimi, Moisespajman shamushpa cashna ninajurca:

—Ñucanchica, cai llactapica ñucanchi animalcunaman corralcunata, shinallata ñucanchi huahuacunaman pueblocunata rurangapajmi munapanchi.

17Ñucanchica, macanajunacunahuan alichirishpa, israelcunata ñaupashpa ucha rishunllami. Paicunapash, chai llactata japingacamanmi, ñucanchipash macanajushun. Ñucanchi huahuacunaca, cai llactapi causajcuna ama llaquichinajuchunmi, muyundi jarcashca pueblocunapi quedanga.

18Israelcunapash, paicunapaj cachun alpacunata tucuicuna nara japijpica ñucanchipash, ñucanchi huasicunaman napacha tigrapashunllu.

19Jordán yacu cai ladopi, indi llujshimuj ladoman tiaj cai alpata ñucanchipaj cachun ña japishpaca, Jordán yacu chimbaman tiaj alpatapash, ashtahuan chai ladoman tiaj alpatapash, paicunahuanga na ashtahuan japishunllu— ninajurcami.

20Shina ninajujpimi Moisesca, cashna nishpa tigrachirca:

—Shina nishcata pactachishpa, Mandaj Diospaj ñaupajpi jatun macanajuiman ringapaj shayarishpaca alimi.

21Cangunata fiñajcunata cangunapaj ñaupajmanda llujchishpa cachangacaman tucui canguna macanajunacunahuan alichirishpa, Mandaj Diospaj ñaupajpi Jordán yacuta chimbashpaca alimi.

22Mandaj Diospaj ñaupajpi mishashpa japishpaca, tigramunguichilla. Shina tigramushpaca, Mandaj Diospaj ñaupajpipash, israelcunapaj ñaupajpipash ima llaquitapash na apanami canguichi. Canguna shina rurajpica, cai llactaca, Mandaj Diospaj ñaupajpipash, cangunapajmi canga.

23Ashtahuangarin na shina rurashpaca, Mandaj Diospaj ñaupajpica, juchatami ruranguichi. Chai juchaca, cangunatallata llaquichinatami yachana canguichi.

24Cangunapaj huahuacunapajpash pueblocunata ruraichilla, llamacunapajpash corralcunata ruraichilla. Shinallata cangunapaj shimihuambacha ninajushcataca pactachinapachami canguichi— nijurcami.

25Shina nijpimi Gadpaj, Rubenbaj miraicunaca, Moisesman cashna nishpa villanajurca:

—Canda servijcunaca, ñucanchita mandaj can mandashcashnallatami rurapashun.

26Ñucanchi uchilla huahuacuna, ñucanchi huarmicuna, ñucanchi huagracuna, ñucanchipaj tucuilla animalcunami, cai Galaad llacta pueblocunapi quedanga.

27Canda servijcunaca, ñucanchita mandaj can mandashcashnallatami, macanajunacunahuan alichirishpa, Mandaj Diospaj ñaupajpi macanajungapaj chimbashun— ninajurcami.

28Shina ninajujpimi Moisesca, Eleazar curatapash, Nun shuti runapaj churi Josuetapash, Israel aillucunapaj taitacunata mandajcunatapash, cashna nishpa mandarca:

29—Gadpaj, Rubenbaj aillu runacunapash, Jordán yacuta cangunahuan chimbashpaca, alimi canga. Paicunaca, Mandaj Diospaj ñaupajpi jatun macanajuiman ringapajmi, macanajunacunahuan alichirishca canga. Shina chimbajpi, chai llactapi causajcuna cangunapaj ñaupajpi mishai tucushca jipaca, Galaad llactataca paicunapaj cachun cunguichilla.

30Ashtahuangarin macanajunacunahuan alichirishpa, cangunahuan na chimbashpaca, paicunapash cangunahuanllatami, Canaán llactata japinajunga— nijurcami.

31Shina nijpimi Gadpaj, Rubenbaj miraicunapash, cashna nishpa tigrachinajurca:

—Canda servij ñucanchiman Mandaj Dios imata mandashcatami rurapashun.

32Ñucanchica, macanajunacunahuan alichirishpami, Mandaj Diospaj ñaupajpi macanajungapaj, Canaán llactaman chimbapashun. Ashtahuangarin ñucanchipaj cachun japina alpacunaca, Jordán yacu cai ladopimi canga— ninajurcami.

33Shina ninajujpimi Moisesca, Gadpaj, Rubenbaj aillucunamambash, Josepaj churi Manasespaj chaupi aillumambash, alpacunata curca. Amorreocunata jatun mandaj Sehón shuti runa mandajushca llactatapash, jatun mandaj Og shuti runa mandajushca Basán shuti llactatapash, chai llactacunapi tiaj pueblocunandi, pueblo muyundi uchilla llactacunandimi curca.

34Gad shuti runapaj miraicunaca, Dibón, Atarot, Aroer shuti pueblocunatami shayachirca.

35Shinallata Atarot-sofán, Jazer, Jogbeha,

36Bet-nimra, Bet-arán shuti pueblocunatapashmi, muyundi pircacunahuan pueblocunata shayachirca. Shinallata llama corralcunatapashmi ruranajurca.

37Rubenbaj miraicunaca, cai pueblocunatami shayachirca: Hesbón, Eleale, Quiriataim,

38Nebo shuti, Baal-meón shuti pueblocunatami shayachinajurca. (Chai pueblocunatami, shuj shuticunata shutichirca). Shinallata Sibma shuti pueblotapashmi shayachirca. Paicuna shayachishca pueblocunatapashmi shutichirca.

39Manasespaj churi Maquir shuti runapaj miraicunaca, Galaad llactamanmi rirca. Chaiman rishpa, chai llactapi causanajuj amorreocunata llujchishpa cachashpami, chai llactataca paicuna japirca.

40Chaimandami Moisesca, Galaad llactataca, Manasespaj churi Maquir shuti runapaj miraicunaman cujpi, paicunaca chai llactapi causanajurca.

41Manasespaj miraipura Jair shuti runapash, chai llactaman rishpaca, chai muyundi llactacunatami japirca. Chaicunataca, Havot-jair shutitami shutichirca.

42Shinallata Noba shuti runapash rishpaca, Kenat shuti pueblotami, chai pueblo muyundi uchilla llactacunandi japirca. Chai pueblotaca, Noba shutitallatami shutichirca.