1Taita Dioslla, ñucanchi ñaupa taitacuna
causanajushca punda huatacunapi, can
imatalla rurashcataca, ñucanchi
ñaupa taitacunami villarca.
Chaitaca, ñucanchi rinrihuambachami uyarcanchi.
2Canga, shuj llactapi causajcunata cambaj
maquihuan llujchishpa cachashpami, ñucanchi
ñaupa taitacunataca tarpunshna caipi churarcangui.
Gentecunataca llaquichishpami, llujchishpa cacharcangui.
3Cai llactataca, na paicunapaj espadahuan
macanajushpa japinajurcachu.
Paicunapaj rigrapash, na quishpichircachu.
Ashtahuangarin cambaj ali lado maquihuan,
cambaj rigrahuan, punchapamba cambaj
ñavihuanmi ayudarcangui.
Paicunahuan cushijushpami, chashna ayudarcangui.
4Taita Dioslla, canga ñucata jatun mandajmi capangui.
Jacobopaj miraicunataca quishpichipairi.
5Canhuanllami, ñucanchita fiñajcunataca
caiman chaiman cachashun.
Cambaj shutipimi, ñucanchita
na ricunayachij runacunataca sarushun.
6Ñuca arcotaca, na yariashpa causajushachu.
Ñuca espadapash, na quishpichihuangachu.
7Canmi, ñucanchita fiñajcunamandaca huacaichishcangui.
Ñucanchita millanayachij runacunatapashmi
pingaichishcangui.
8Taita Dioshuanmi, tucui causaipi cushijushun.
Cambaj shutitaca, causaita
causaicamanmi alicachinajushun. Selah
9Ashtahuangarin ñucanchita jichushpami
pingaichishpa saquircangui.
Chashna rurashpami, ñucanchi soldadocunahuanga
na llujshingui.
10Fiñajcunapaj ñaupajmandapashmi,
ñucanchitaca manllashpa tigrachun saquircangui.
Chaimandami ñucanchita millanayachij runacunaca,
ñucanchi imatalla charishcata quichushpa apanajun.
11Ñucanchitaca, huañuchina pushtuman
llamata apachun cunshnami cungui.
Ñucanchitaca, shuj llacta puracunapica,
caita chaitami cacharcangui.
12Can agllashcacunataca, yanga jatushpami,
ima culquitallapash na mañarcangui.
13Ñucanchitaca, ladollapi causajcuna
rimashpa pingaichinajuchunmi churangui.
Ñucanchi muyundipi causajcuna na cazushpa
asinajuchun, asishpa ricunajuchunmi churangui.
14Shuj llacta puracunapica, ñucanchimanda
yarichij shimicunata parlachunmi churarcangui.
Ñucanchita ricujcunaca, tucuicunami
umata muyuchishpa ricunajun.
15Ñuca pingai tucushcapash,
punllandimi ñuca ñaupajpi ricurin.
Ninanda musparishpami, ñavita quilpashcashna cani.
16Ñucata nalicachishpa rimashcamanda, ñuca alicachi
tucushcata huaglichishcamandami chashna cani.
Ñucata fiñajcunapaj, ñucata llaquichijcunapaj
jahuami chashna cani.
17Cai tucui llaquicuna ñucanchipajman
shamujpipash, candaca na cungashpami causanchi.
Canhuan ari ninajushcatapash,
na cungashpami causanchi.
18Ñucanchi shungupash, canmandaca na anchurircachu.
Cambaj ñanmandapash, na anchurishpami causarcanchi.
19Shina cajpipash, chacal nishca
animalcunatashnami llaquichircangui.
Huañui japinalla llanduhuanmi,
ñucanchitaca quilparcangui.
20Ñucanchi Taita Diospaj shutita cungajpi,
na cashpaca shuj diosmanra maquita vichai churajpica,
21¿nachu Taita Diosca llaquipi churanman carca?
Paica, shungupi pacalla yarijujtapash rijsinmi.
22Shina cajpipash canmandami,
punllandi huañuchi tucunajunchi.
Huañuchi tucuna llamacuna cuentai
tucushcashnami causanajunchi.
23Jatun Dioslla, rijcharipairi,
¿imashpata puñujupangui?
Rijcharipairi, ñucanchimandaca ama
causaita causaicaman caruyapaichu.
24¿Imashpata cambaj ñavitaca, shujman churapangui?
¿Imashpata llaquinayaita causanajujta, llaquichi
tucushpa causanajujta ricujushpapash,
ñucanchitaca cungapangui?
25Ñucanchi almaca, cai tucui llaquicunahuanga
shaijushpa, ñutu alpapi urmashcashnami.
Ñucanchi cuerpopash, alpapi tiarishpa quedashcashnami.
26Ñucanchita ayudangapaj jataripairi.
Can llaquij cashcamandaca,
ñucanchita quishpichihuayari.
Who We AreWhat We EelieveWhat We Do
2025 by iamachristian.org,Inc All rights reserved.
