Psalms 58 - Quichua Imbabura Bible

Nalicunata llaquichijuchun mañashcamiAma tucuchihuaichu nishpa candana tonopi, candajcunata mandaj candachijuchun, David rurashca juyailla candanami.

1Tandanajushcacunalla, ¿cangunapaj shimihuanga

imatapash cashcatapachachu rimanguichi?

Huañuna aichayu runacuna, ima llaqui tiajpipash,

¿aligutachu ricushpa alichinguichi?

2Ashtahuangarin cangunapaj shungupica,

nalita ruranatallami yarinajunguichi.

Cangunapaj maquihuan ninandapacha llaquichishpami,

cai pachataca llashachinguichi.

3Diosta na manllajcunaca, mamapaj vijsapi

cashpallatami, Diosmanda anchurinajurca.

Huacharishca punllamandapacha llullashpa

rimaj cashpami, pandashpa anchurinajurca.

4Culebrapaj venenotashnami, paicunaca charin.

Rinri vichashca millai culebrashna, na uyajcunami.

5Rinri vichashca cashpami, muspachinata ali

yachaj yumbu tocajpipash, na uyan.

6Taita Dioslla, paicunapaj ñaupa quirucunataca,

paicunapaj shimipillata faquipairi.

Mandaj Dioslla, maltun leongunapaj

juchu quirucunatapash faquipairi.

7Paicunaca, urai rijuj yacushna

caita chaita cachai tucuchun.

Paicunapaj flechacunata cacharijpica,

ñuturishca cachun.

8Paicunaca, churu yacuyanshna chingachun.

Huañushcata ungushca huahuashna,

inditaca ama ricuchun.

9Chaquishca cashacuna cangunapaj

mangacunata nara cunujyachijpillatami Diosca,

causaj cajpipash, ninanda fiñashca cajpipash,

ninan huaira tamiahuan apanga.

10Imatapash cashcatapacha ruraj runaca,

Dios llaquichijta ricushpami cushijunga.

Paipaj chaquitapash, Diosta na manllaj

runapaj yahuarpimi maillanga.

11Chaipimi runaca, cashna nijunga:

“Imatapash cashcatapacha ruraj runapaca,

alita japina tiambachami.

Cai pachapica, llaquichij Taita Dios tiambachami” nijungami.