Psalms 76 - Quichua Imbabura Bible

Taita Diosca mishajpashmi, llaquichijpashmiCuerdacunahuan tocanacunata tocashpa, candajcunata mandaj candachijuchun, Asaf shuti runa rurashca candana Salmomi.

1Taita Diosca, Judá llactapica rijsishcami.

Israel llactapipash, paipaj shutica jatumbachami.

2Paipaj jatun carpaca, Salem pueblopimi.

Pai causajuj huasica, Sion pueblopimi.

3Chaipimi, paita fiñajcunapaj arcota, flechacunata,

jarcarina escudota, espadata, ima

macanacunacunatapash faquirca. Selah

4Canga, punchapambagumi cangui.

Animalcunata japina urcucunatapash,

ashtahuan yali ushaitami charingui.

5Shinlli shungucunaca, quichui tucushpami,

rijcharitapash na rijcharishpa puñunajurca.

Chai shinlli shungu runa puramandaca,

shujllapash na maquita alsarcachu.

6Jacobopaj Taita Dioslla, can jarcashpa

rimajpimi, carretacunata aisaj caballocunapash,

na cuyuri ushanajurca.

7Canga, manllana Diosmi capangui.

Nina japirinshna can fiñarishca cajpica,

¿pita cambaj ñaupajpica shayari ushangayari?

8Jahua pachamandapachami llaquichinataca villarcangui.

Shina villajpica, cai pachapi causajcunaca,

ninanda manllarishpami casilla quedanajurca.

9Taita Dioslla, llaquichingapaj can jatarishpaca,

cai pachapi causaj, ali shunguta tucui charijcunata

quishpichingapajmi jatarircangui. Selah

10Runacuna fiñarishca cashpapash,

candaca alicachijungapachami.

Fiñarijcuna puchushcacunataca, canga llaquichinguimi.

11Imatapash carashapachami nishpaca, chaitaca

cangunata Mandaj Taita Diosman cunapachami canguichi.

Paipaj muyundipi tucui causajcunaca,

manllana Diosman caranacunata apamuichiyari.

12Paimi, mandajcunapaj samaitaca tucuchinga.

Cai pachata jatun mandajcunapajpash, manllana Diosmi.