2 CRÓNICAS 28 - Quichua Imbabura Bible

Acaz shuti runami mandajushca(2 Rey. 16:1-20)

1Acaz shuti runaca, ishcai chunga huatata charishpami mandai callarirca. Paica, chunga sucta huatatami Jerusalenbi mandajurca. Paica, Mandaj Diospaj ñaupajpica, na paipaj ñaupa taita Davidshna alita rurashpa causajurcachu.

2Ashtahuangarin Israel llactata jatun mandajcunashnallatami, nalita rurashpa causajurca. Chai jahuami yacuyachishpa rurashca, Baal shuti dioscunaman rijchajcunata rurachirca.

3Hinom shuti runapaj churicunapaj pugru pambapipashmi, inciensota cushnichijurca. Paipaj churicunatapash, chai dioscunaman cushpami rupachijurca. Paica, shuj llactacunapi causajcunata israelcunapaj ñaupajmanda Mandaj Dios llujchishpa cachashca gentecunashnallatami, millanayaicunata rurajurca.

4Shinallata lomacunapi tiaj altarcunapi, uchilla lomacunapi, fanga junda tucui quiru ucucunapimi, animalcunata huañuchishpa, inciensotapash cushnichijurca.

5Chaimandami paita Mandaj Taita Diosca, siriocunata jatun mandajpaj maquipi churarca. Chai siriocuna mishashpami, Judá llactapi causajcunataca, ashtacacunata Damasco puebloman prezu apanajurca. Shinallata Israel llactata jatun mandajpaj maquipipashmi, churai tucunajurca. Shina churajpi mishashpami, ashtacacunata huañuchinajurca.

6Remalías shuti runapaj churi Peka shuti soldadoca, shuj punllallami Judá llactapi causajcunataca, patsaj ishcai chunga huaranga, ashtahuan shinlli soldadocunata huañuchirca. Paicunapaj ñaupa taitacunata Mandaj Taita Diosmanda anchurishcamandami, chashna huañuchirca.

7Shinallata Efraín llactamanda Zicri shuti ninan shinlli soldadoca, jatun mandaj Acaz runapaj churi Maasías shuti runatapash, Azricam shuti paipaj mayordomotapash, jatun mandajpaj cati mandaj Elcana shuti runatapashmi huañuchirca.

8Israelcunapashmi, Judá llactapi causaj paicunapaj huauqui puramandaca huarmicunandi, huambracunandi, cuitsacunandi, ishcai patsaj huaranga gentecunata prezu japirca. Chai jahuapash, ashtaca charishcacunata quichushpami, Samaria puebloman apanajurca.

9Chai Samaria pueblopimi, Mandaj Dios ima nishcata villaj Obed shuti runagu causajurca. Paimi, Samaria puebloman soldadocuna yaicumunajujpi, tuparingapaj llujshishpa cashna nijurca:

—Ricuichi, cangunapaj ñaupa taitacunata Mandaj Taita Diosca, Judá llactapi causajcunahuan fiñarishpami, cangunapaj maquipi churashca. Cangunaca, jahua pachaman chayajta ninandapacha fiñarishpami, ashtacacunata huañuchishcanguichi.

10Cunanga, Judá llactapi, Jerusalenbi causajcunataca, jaricunatapash, huarmicunatapash, cangunata servishpa causachun churanatami yarishcanguichi. Ashtahuangarin chashna rurashpaca, ¿nachu cangunata Mandaj Taita Diosta fiñashpa juchata rurashcanguichi?

11Shina cashcamanda cunanga, ñucata uyahuaichi. Prezu apamushca cangunapaj huauquicunataca, cutin cachaichilla. Ashtahuangarin Mandaj Diosca, cangunahuanga ninandami fiñarishca— nijurcami.

12Chaita uyashpami, Efraín aillu soldadocunata huaquin mandajcunaca, jatun macanajuimanda tigramujcunata fiñashpa jatarirca. Paicunaca: Johanán shuti runapaj churi Azarías runapash, Mesilemot shuti runapaj churi Berequías shuti runapash, Salum shuti runapaj churi Ezequías runapash, Hadlai shuti runapaj churi Amasa shuti runapashmi carca.

13Chai mandajcunaca, cashnami ninajurca:

—Prezu apamushcacunataca, na caiman pushamunachu canguichi. Juchata rurashpa, Mandaj Diosta fiñachishcapash, ñucanchi jahuallatami canga. Ñucanchi juchaca ashtacapachamari. Shina cajpipash cangunaca, ñucanchi nalita rurashpa, juchacunata rurashcataca ashtahuanmi mirachingapaj munanguichi. Shinallata Diospash, israelcunahuan ashtahuan ninanda fiñarichunmi munanguichi— ninajurcami.

14Shina nijpimi soldadocunaca, prezu apamushcacunataca cacharinajurca. Shinallata imatalla quichumushcatapash, mandajcunapaj ñaupajpi, tucui gentecunapaj ñaupajpimi tigrachinajurca.

15Chai jipami, shutipi ña villashca chai runacunallata jatarishpa, prezu apamushcacunata pushashpa, pai puracunapi maijan lluchulla cajpipash, churajunata churachinajurca. Paicunapaj chaquipipash churachishpami, micuchumbash, ufiachumbash caranajurca. Chugricunataca, aceitehuan javishpami, na puri ushajcunatapash, burrocunapi tiachishpa, palmera quirucuna tiaj Jericó shuti pueblocaman, paicunapaj huauquicunapaj ladoman pushanajurca. Chai jipami paicunaca, Samaria puebloman cutin tigranajurca.

16Chai punllacunallatami, jatun mandaj Acaz shuti runaca, ayudangapaj shamupaichi nigrichun, Asiria llactata jatun mandajcunapajman cacharca.

17Edomitacunapashmi, Judá llactaman shamushpa, paicunahuan macanajushpa, prezu apashca carca.

18Shinallata filisteocunapashmi, Judá llactapi tiaj Sefela shuti pambapi tiaj pueblocunamambash, Neguev llactapi tiaj pueblocunamambash shamushpa jundash cacarca. Shina jundashpami Bet-semes, Ajalón, Gederot, Soco, Timna, Gimzo shuti pueblocunatapash, chai pueblocunapaj muyundi uchilla llactacunandi quichushca carca. Shina quichushpaca, paicunami chaicunapi causanajurca.

19Israel llactata jatun mandaj Acaz nalita rurashcamandami Mandaj Diosca, Judá llactapi causajcunataca, pingaichishpa urai cumuchishca carca. Acaz shuti runaca, Judá llactapica imatallapash na jarcarishpami nalitalla rurashca carca. Mandaj Diostapash fiñashpami, yachashpata ninandapacha na cazushca carca.

20Asiriocunata jatun mandaj Tiglat-pileser shuti runapashmi na shinllichishpa, ashtahuangarin ninanda llaquichishpa ashtahuan quichijimurca.

21Acaz runaca, asiriocunata jatun mandajman cungapajmi, Mandaj Diospaj huasimanda, mandana huasimanda, mandajcunapaj huasicunamandapash, imatalla charishcacunata llujchishca carca. Shina cajpipash, paica na ayudarcachu.

22Ashtahuangarin jatun mandaj Acaz runaca, shina jatun llaqui huatacuna japijpi ninanda llaquichi tucujushpapash, Mandaj Diosta fiñashpami, ashtahuan juchata rurajurca.

23Paica, pai mishai tucuchun saquishca Damasco pueblopi tiaj dioscunaman animalcunata carashpami huañuchijurca. Paica cashnami yajurca: “Siria llactata jatun mandajcunapaj dioscunaca, paicunataca ayudarcami. Ñucatapash ayudahuachun animalcunata paicunaman carashpa huañuchishalla” yashpami, shina rurajurca. Ashtahuangarin chai dioscunallatami paitapash, tucui israelcunatapash, jatun llaquipi churarca.

24Chashna rurashca jahuami Acaz runaca, Taita Diospaj huasipi imalla tiashcacunata tandachishpa faquirca. Mandaj Diospaj huasi pungucunatapashmi vicharca. Jerusalén tucui juchucunapipashmi, shuj altarcunata rurarca.

25Judá llactapi tiaj tucui pueblocunapipashmi, shuj dioscunaman inciensota cushnichingapaj, altarcunata lomacunapi rurarca. Chashna rurashpami, paipaj ñaupa taitacunata Mandaj Taita Diostaca ninandapacha fiñachirca.

26Acaz shuti runa tucui imatalla ashtahuan rurashcacunapash, punda punllacuna, jipa punllacuna imatalla rurashcacunapash, Judá llactata, Israel llactata jatun mandajcuna imatalla rurashcacunata escribishca libropimi tiajun.

27Acaz shuti runa huañushpa, paipaj ñaupa taitacunahuan tandanajujpica, Jerusalén pueblopimi pambarca. Ashtahuangarin Israel llactata jatun mandajcunata pambashca ladopica, na pambarcachu. Paipaj randica, paipaj churi Ezequías runami mandajurca.