2 CRÓNICAS 14 - Quichua Imbabura Bible

Asa shuti runami mandajushca(1 Rey. 15:9-12)

1Abías shuti runa huañushpa, paipaj ñaupa taitacunahuan tandanajujpica, Davidpaj pueblopimi pambarca. Paipaj randica, Asa shuti paipaj churimi mandajurca. Pai mandajui punllacunapica, gentecunaca chunga huatatami aliguta casilla causanajurca.

2Asa shuti runaca, paita Mandaj Taita Diospaj ñaupajpica, imatapash na pandashpa aligutallami rurajurca.

3Paimi, na rijsishca dioscunata yarina altarcunatapash, lomacunapi tiaj altarcunatapash anchuchirca. Imamambash rijchajta rurashca dioscunatapashmi faquirca. Asera shuti huarmi diosman rijchajcunatapashmi tucuchirca.

4Chashna rurashpami, Judá llactapi causajcunataca, paicunapaj ñaupa taitacunata Mandaj Taita Diosta mascanajuchun, Dios mandashca shimicunata, Diosllata mandashcacunata pactachinajuchun mandarca.

5Shinallata Judá llactapi tiaj tucuilla pueblocunamandami, lomacunapi tiaj altarcunata, imamambash rijchaj dioscunata anchuchirca. Pai mandajushca punllacunaca, casilla ali causaimi chai llactapica tiarca.

6Chai llactapica, casilla ali causai tiashcamandami Judá llactapica, jatun pircacunata charij pueblocunata shayachirca. Chai huatacunapica, paihuan macanajujcunaca na tiarcachu. Casilla ali causaita Mandaj Dios cushcamandami, na tiarca.

7Chaimandami, Judá llactapi causajcunataca, cashna nirca: “Cai pueblocunata shayachishunchi. Shinlli torrecunata charij pircacunahuan muyundi jarcashunchi. Shinallata aldabacunata charij pungucunahuambash jarcashunchi. Cai llactaca, ñucanchipaj cashcamanda chashna rurashunchi. Ñucanchica, ñucanchita Mandaj Taita Diostami mascarcanchi. Shina mascajpimi paica, ñucanchi maipi cajpipash casilla ali causaita curca” nircami. Paicuna shayachi callarijpica, tucuimi ali llujshirca.

8Asa shuti runaca, jarcarina escudocunata, lanzacunata apashpa purij soldadocunatapashmi charirca. Judá aillu puramandaca, quimsa patsaj huaranga soldadocunata, Benjamín aillu puramandaca, ishcai patsaj pusaj chunga huaranga soldadocunatami charirca. Paicunaca, jarcarina escudota apaj, arcota cacharinatapash alipacha yachaj, macanajunatapash ali yachaj runacunami carca.

9Paicunahuan macanajungapajmi, Etiopía llactata mandaj Zera shuti runaca, shuj millón soldadocunahuan, quimsa patsaj carretacunahuan, Maresa shuti pueblocaman llujshimurca.

10Chaimandami Asa shuti runaca, paicunahuan macanajungapaj llujshishpa, Maresa shuti pueblo ladollapi tiaj Sefata shuti pugru pambapi macanajungapaj alichirichun mandarca.

11Chaipimi Asa runaca, paita Mandaj Taita Diosta caparishpa, cashna nishpa mañarca: “¡Mandaj Dioslla, ninan ushaita charijta, ushaita na charijta ayudangapajpash, cambaca chashnallatami! Ñucanchita Mandaj Taita Dioslla, ñucanchitapash ayudahuayari. Canda mañashpami, shinlli tucunajupanchi. Cai soldadocunahuan macanajungapaca, cambaj shutipimi shamuparcanchi. Mandaj Dioslla, canmi ñucanchi Taita Dios capangui. Runaca, canda mishaitaca na ushangachu” nishpami mañarca.

12Shina mañajpimi Mandaj Diosca, Asa shuti runapaj ñaupajpipash, Judá llactapi causajcunapaj ñaupajpipash, Etiopía llactamanda soldadocunataca misharca. Chaimandami, chai Etiopía llactamanda soldadocunaca pacajushpa calpanajurca.

13Asa shuti runahuan, paipaj soldadocunahuanga, Gerar shuti pueblocamanmi catinajurca. Etiopía llactamanda runacunaca, shujllapash na causaihuan puchushpami, tucuilla huañunajurca. Paicunaca, Mandaj Diospaj ñaupajpipash, paipaj soldadocunapaj ñaupajpipashmi tucuchi tucunajurca. Paicuna imatalla charishcatapashmi, ashtacatapacha apanajurca.

14Gerar shuti pueblo muyundipi tiaj tucuilla pueblocunapipashmi, macanajungapaj yaicunajurca. Chai pueblocunapi causajcunataca, Mandaj Dios cachamushca ninan manllaimi japirca. Chai pueblocunapica, ima cashpapash ashtacapacha tiajpimi, tucui chai pueblocunapi imalla tiashcacunataca, tucuillata llujchishpa apanajurca.

15Shinallata animalcuna shayanajuj chugllacunamambash yaicushpami, ashtaca llamacunata, camellocunata apashpa Jerusalenman tigranajurca.