NÚMEROS 13 - Quichua Imbabura Bible

Pacalla ricuchunmi, chunga ishcai runacunata cachashca(Deut. 1:19-33)

1Mandaj Diosca, Moisesmanmi cashna nishpa villarca:

2“Canga, Canaán llactata rijsigrichun, canhuan tianajuj runacunata cachai. Chai llactatami, israelcunaman caragrini. Paicunataca, paicunapaj ñaupa taitacunapaj mirai cada aillumanda shuj mandajta cachai” nircami.

3Shina nijpimi Moisesca, Parán shuti jichushca pambamandaca, Mandaj Dios mandashcashnallata cacharca. Tucui chai runacunaca, Israel aillucunata mandajcunami carca.

4Chai mandajcunapaj shuticunaca, caicunami: Rubén aillumandaca, Zacur shuti runapaj churi Samúa shuti runami rirca.

5Simeón aillumandaca, Hori shuti runapaj churi Safat shuti runami rirca.

6Judá aillumandaca, Jefone shuti runapaj churi Caleb shuti runami rirca.

7Isacar aillumandaca, Josepaj churi Igal shuti runami rirca.

8Efraín aillumandaca, Nun shuti runapaj churi Oseasmi rirca.

9Benjamín aillumandaca, Rafú shuti runapaj churi Palti shuti runami rirca.

10Zabulón aillumandaca, Sodi shuti runapaj churi Gadiel shuti runami rirca.

11Josepaj churi Manasés aillumandaca, Susi shuti runapaj churi Gadi shuti runami rirca.

12Dan shuti aillumandaca, Gemali shuti runapaj churi Amiel shuti runami rirca.

13Aser shuti aillumandaca, Micael shuti runapaj churi Setur shuti runami rirca.

14Neftalí aillumandaca, Vapsi shuti runapaj churi Nahbi shuti runami rirca.

15Gad shuti aillumandaca, Maqui shuti runapaj churi Geuel shuti runami rirca.

16Canaán llactata rijsichun, Moisés cachashca runacunapaj shuticunaca, chaicunami. Nun shuti runapaj churi Oseas runatami Moisesca, Josué shutita shutichirca.

17Moisesca, Canaán llactata rijsichun cachajushpaca, cashna nishpami cacharca:

—Cunan caimanda Neguev llactaman vichai rishpaca, urcuman vichai ringuichi.

18Chaiman chayashpaca, Canaán llacta imashna cajta ali ricunguichi. Chai llactapi causaj gentecuna shinlli cajta, na cashpaca na ushanallacuna cajta, huaquinlla cajta, na cashpaca ashtacacuna cajtapash ricunguichi.

19Paicuna causanajuj llactaca ali cajta, nali cajta, paicuna causanajuj pueblocunapash, carpa huasicuna cajta, na cashpaca muyundi jatun pircata rurashca cajtapash ricunguichi.

20Alpacunapash, ali granota fucuj cajta, na fucuj cajtapash, chaipi quirucuna tiajta, na tiajtapash ali ricunguichi. Na manllashpa, chai llactapi ima granocuna fucushcatapash japinguichilla— nircami.

Chai punllacunapica, punda fucushca uvasta tandachina punllacunami carca.

21Paicuna vichai rishpaca, Zin nishca jichushca pambamandapacha, Rehob shuti pueblocaman chai llactata rijsishpami, Hamat shuti puebloman yaicunajurca.

22Neguev shuti jichushca pambata vichai rishpami, Hebrón shuti puebloman shamunajurca. Chai pueblopica, Anac shuti runapaj mirai Ahimán, Sesai, Talmai shuti runacunami causashca carca. Chai Hebrón puebloca, Egiptopi tiaj Zoán shuti pueblopash nara tiajpillatami, canchis huata pundata tiashca carca.

23Chaimandaca, Escol shuti jatun yacucamanmi chayanajurca. Chaimandami, uvas racimotapash yura malquindi fitishpa, shuj caspipi huatashpa, ishcai tucushpa apamunajurca. Granadillacunatapash, jigoscunatapashmi apamunajurca.

24Israelcuna chaimanda uvas racimota fitimushcamandami, chai pushtutaca, “Escol shuti pugru Pamba” nishpa shutichirca.

25Canaán llactata rijsishpaca, chuscu chunga punllacuna yalijpimi tigramunajurca.

26Shina tigramushpami, Parán shuti jichushca pambapi tiaj Cades shuti pueblopi tianajuj Moisespajman, Aaronbajman, tandanajushca tucui israelcunapajman shamunajurca. Ña chayamushpaca, chai llacta imashna cashcatami, paicunamambash, tandanajushca tucui israelcunamambash villanajurca. Shinallata chai llactamanda apamushca granocunatapashmi ricuchinajurca.

27Chaipimi, cashna nishpa parlanajurca:

—Ñucanchica, ricuchun can cachashca llactaman chayarcanchimi. Chaipica, ashtaca lechepash, balun mishquipash tiambachami. Chai llactapica, cai granocunami fucun cashca.

28Ashtahuangarin chai llactapica, ninan shinlli runacunami causan cashca. Shinallata pueblocunapash, ushashca jatun pueblocuna jatun pircahuan jarcashcacunami cashca. Chaipica, Anac shuti runapaj miraicunatapashmi ricurcanchi.

29Amalec shuti runapaj miraicunaca, Neguev shuti jichushca pambapi tiaj llactapimi causanajun. Urcucunapi tiaj llactacunapica heteo, jebuseo, amorreo nishca gentecunami causanajun. Mama cucha manñacunapi, Jordán yacu manñacunapica, cananeocunami causanajun— ninajurcami.

30Shina ninajujpimi Caleb shuti runaca, Moisespaj ñaupajpi tianajuj gentecunata upallayachishpa, cashna nirca:

—Ucha vichai rishpa, chai llactataca ñucanchipaj cachun japigrishunchi. Ñucanchica, paicunata yali shinllicunami canchi— nircami.

31Ashtahuangarin paihuan vichai rishca runacunaca, cashnami ninajurca:

—Chai llactapi causajcunahuan macanajungapaca, na vichai ri ushashunllu. Paicunaca, ñucanchita ashtahuan yali shinllicunami— ninajurcami.

32Rijsishpa shamushca chai llactataca, Israel puracunapica, ninanda nalicachishpami cashna nishpa parlanajurca:

—Ñucanchi rijsingapaj rishca llactaca, chaipi causajcunata langanllami cashca. Shinallata chai llactapi causajcunata ñucanchi ricushca gentecunaca, tucuicunami ninan jatun runacuna cashca.

33Chaipica, manllanayai jatun runacunatapashmi ricurcanchi. Anac shuti runapaj mirai manllanayai jatun runacunatami ricurcanchi. Ñucanchica, ñucanchi ricuipica, langostacunashnallami carcanchi. Paicuna ricuipipash, chashnallatami carcanchi— ninajurcami.