APOCALIPSIS 16 - Quichua Imbabura Bible

Dios fiñashpa ninanda llaquichina copacunatami villajun

1Chai jipami, Diospaj huasi ucumandaca, chai canchis angelcunataca, cashna nishpa ninanda caparijta uyarcani: “Taita Dios ninanda fiñashpa cachamushca canchis copacunapi tiaj llaquicunata, alpaman talingapaj richi” nircami.

2Punda ángel llujshimushpaca, paipaj copamandaca, cai pachamanmi talimurca. Shina talimujpimi, ismuchij ung:ui japishpa, ninanda nanachij chupucuna gentecunapica llujshirca. Chai ung:uica, manllanayai animalpaj ricuchinata charijta, shinallata chai animalman rijchajta mañajcunatapashmi japirca.

3Cati angelpash, paipaj copamandaca, mama cuchamanmi talimurca. Shina talimujpimi, chai cucha yacuca, huañushcapaj yahuarshna tigrarca. Shinamandami mama cuchapi causajcunaca, tucuilla huañurca.

4Ishcaipaj cati angelpash, paipaj copamandaca, jatun yacucunapi, pugyucunapimi talimurca. Shina talimujpimi, chai yacucunapash yahuarman tigrarca.

5Shinamandami, yacucunata mandaj angelpash, cashna nijujta uyarcani: “Jatun Dioslla. Canga, imatapash cashcatapacha rurajmi cangui. Canga, cunambash canllatami causajungui, pundapash canllatami causajurcangui. Canga, Jucha Illaj cashpami, caicunataca llaquichircangui.

6Cambajlla causajcunata, can ima nishcata villajcunatami, yahuarta jichashpa huañuchinajurca. Chaimandami, paicunamambash yahuarta ufiachijungui. Paicunapash, chashna llaquichi tucunapachami carca” nircami.

7Shinallata shujpash altarmanda cashna nijujtami uyarcani: “Tucui Ushaita Charij, Mandaj Taita Dioslla. Canga, na llullaj cashpa, imatapash cashcatapacha ruraj cashpami, llaquichinapacha cajpi llaquichijungui” nircami.

8Quimsapaj cati angelpash, paipaj copamandaca indipimi talimurca. Shina talimushpami, gentecunataca ninahuan rupachijuchun saquirca.

9Shinamandami, ninan rupaihuan gentecunataca rupachirca. Chashna llaquichingapaj ushaita charij Taita Diospaj shutitaca, nali shimicunatami rimanajurca. Paicunaca, Diosta punchapambagumi cangui ningapaca na munarcachu. Juchata rurajcuna cashpapash, na llaquirircachu.

10Chuscupaj cati angelca, manllanayai animal mandangapaj tiarina jahuapimi, paipaj copamandaca talimurca. Shina talimujpimi, chai animal mandajuj llactaca, yana yana tucurca. Chaimandami gentecunaca, nanaihuan jalluta canirinajurca.

11Ninanda nanachishpa chupu ung:uihuan huañunajushpapash, jahua pachapi tiajuj Taita Diostaca, nali shimicunatami rimanajurca. Paicunaca, nalita ruranataca na saquishpa, na llaquirirca.

12Pichapaj cati angelca, Eufrates jatun yacupimi paipaj copamanda talimurca. Shina talimushpa yacu chaquijpica, indi llujshimuj ladomanda jatun mandajcuna yalina ñan tucuchunmi, shina chaquichirca.

13Chai jipallami, dragonbaj shimimanda, manllanayai animalpaj shimimanda, llullashpa villajpaj shimimandapash, saposhna mapayachij quimsa ayacuna llujshijta ricurcani.

14Chaicunaca, diablopaj ayacuna cashpami, jatun manllarinacunata rurashpa ricuchinajurca. Chai ayacunaca, tucui cai pachapi causaj jatun mandajcunapajman rishpami, Tucui Ushaita Charij Taita Dios ninanda llaquichimui punllapi macanajugrichun tandachigrirca.

15“Ricunguichi, ñucaca cungashcapimi shuhuashna shamusha. Ñuca shamunataca, na puñushpa chapariashpa, lluchulla purijpi, paipaj pinganayaita ama ricuchun, churajunata cuidajca, ninandami cushijunga”.

16Chai ayacunami, jatun mandajcunataca, hebreo rimaipica, Armagedón shuti pambaman tandachirca.

17Suctapaj cati angelca, huairapimi paipaj copamandaca talimurca. Shina talimujpimi, jahua pachapi tiajuj Dios mandangapaj tiarinamandaca: “Ñami tucuchirca” nishpa, ninanda caparij uyarirca.

18Chai jipami, punchapamba shitamujcunapash ricurirca. Shinallata huaj nijuj, culun nijujpashmi uyarijurca. Alpa mamapash, ninanda cuyushpami tucuchijurca. Cai pachapi gentecuna causai callarishcamandapacha, ima horaspash chashnapacha alpa mama cuyushpaca, na tucuchishcachu carca.

19Shina cuyupimi, chai jatun puebloca, quimsapi chaupirirca. Shinallata cai pachapi tiaj pueblocunapash urmashpa tucurircami. Shinallata Babilonia jatun pueblotaca, Taita Dios ninandapacha fiñashpami, jayaj vinota ufiachinshna, llaquichingapaj yarijurca.

20Shina tucuchijpimi, mama cucha chaupipi tiaj tucui llactacunaca anchurirca, urcucunapashmi chingarca.

21Jahua pachamandaca, gentecunapaj jahuapimi manllanayaita rundu urmamurca. Chai runduca, quimsa arrobashna llasha llashami carca. Chai rundu ninandapacha llaquichijujpimi gentecunaca, Taita Diosta nali shimicunata rimanajurca.