NÚMEROS 4 - Quichua Imbabura Bible

Imatalla ruranacunata, levitacunaman cushcatami villajun

1Mandaj Diosca Moisesmambash, Aaronmambashmi cashna nishpa villajurca:

2“Leví shuti runapaj churi puramanda Coat shuti runapaj miraicunataca, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi cuentangui.

3Ñucahuan tuparina jatun carpapi tandanajushpa servingapaj yaicuj jaricunataca, quimsa chunga huatata charijmanda callarishpa, picha chunga huatata charijcunacaman cuentangui.

4Coat runapaj miraicunaca, ñucahuan tuparina jatun carpapica, ñucapajlla shicanyachishca ucupica, caicunata ruranajuchun:

5Shuj ladoman rina chayajpica Aaronhuan, paipaj churicunahuanga ñuca carpa pungupi tiaj telata uriajuchishpami, ñuca escribichishca shimicunata alichina arcataca, chai telahuan quilpanajunga.

6Chai quilpashca jahuataca, tejón nishca animalcunapaj caracunahuanmi quilpanajunga. Shinallata jahuallatapash, tucuilla azul telahuan quilpashpami, arcata apana vara caspicunata churanajunga.

7Ñucaman carashpa tandata churana meza jahuapica, azul telatami mandanajunga. Chai jahuapica uchilla platocunata, cucharacunata, ñucaman carashpa vinota talina copacunatapash, jatun tastacunatapashmi churanajunga. Shinallata punllandi ñuca ñaupajpi churana tandatapash, chai jahuapillatami churanajunga.

8Chai jahuapica, yana puca telahuanmi quilpanajunga. Chai jahuallatapash, tejón nishca animalcunapaj caracunahuanmi quilpanajunga. Chai jahuapica, mezata apana vara caspicunatapashmi churanajunga.

9Chai jipaca, michata japichina candelerocunata, lamparacunata, rupashca pavizacunata anchuchinacunata, uchilla platocunata, aceiteta churangapaj servij vasocunatapashmi, tucuillata azul telahuan quilpanajunga.

10Tucui ima tiashcacunataca, tejón nishca animalcunapaj caracunahuan quilpashpami, chaicunata apana caspi jahuacunapi churanajunga.

11Orota rurashca altar jahuapica, azul telatami mandanajunga. Chai jipaca, tejón nishca animalcunapaj caracunahuanmi quilpanajunga. Shinallata altarta apana caspicunatapashmi churanajunga.

12Ñucapajlla huasipi imatapash rurangapaj tucui ima tiajcunatapash japishpami, azul telapi churanajunga. Chaicunataca, tejón nishca animalcunapaj caracunahuanmi quilpanajunga. Chashna quilpashcatami, chaicunata apana caspi jahuacunapi churanajunga.

13Altartaca, uchufata ali fichashpami, morado telahuan quilpanajunga.

14Chai jahuapica, altarpi imatalla rurangapaj tucui minishtirishcacunatami churanajunga: Palacunata, garfio nishcacunata, ninayashca carbonda churanacunata, jatun tastacunata, chai altarpaj tucui imalla tiajcunatapashmi churanajunga. Chai jahuapica, tejón nishca animalcunapaj caracunahuanmi quilpanajunga. Chai jahuapash, huandushpa apana vara caspicunatami churanajunga.

15Aaronhuan, paipaj churicunahuanga, ñucapajlla huasitapash, chaipi tucui imalla tiashcacunatapashmi, tucuillata quilpashpa tucuchinga. Chai jipaman ñucapaj jatun carpata shuj ladoman apana chayajpica, Coat shuti runapaj miraicunami chaicunata apangapaj shamunajunga. Chashna apanajushpaca, ñucapajlla shicanyachishcacunapica ama tacarinajuchun, tacarishpaca huañungapachami. Chaicunatami, Coat shuti runapaj miraicunaca, ñucahuan tuparina jatun carpapi imalla tiashcacunata apanajunga.

16Ashtahuangarin Aarón curapaj churi Eleazarca, lamparacunapi churana aceiteta, mishquillagu ashnajuj inciensota, punllandi Diosman caranacunata, talishpa javina aceitetapashmi cuidajunga. Ñuca carpapi tucui imalla tiashcacunatapash, ñucapajlla huasipi tucui imata charinacunatapashmi ricujunga” nijurcami.

17Cashnatapashmi Mandaj Diosca, Moisesmambash, Aaronmambash, cashna nishpa villajurca:

18“Pactara Coat shuti runapaj aillu familiacunatara, levita puracunapi huañushpa chingachun saquinguichiman.

19Ñucapajlla shicanyachishca ucuman chayashpa ama huañuchunga, cashna ruranguichi: Aarón, paipaj churicunandi shamushpami, paicuna imatalla rurana cajpipash, chaicunata rurachun, chaicunata ricuchun, tucuicunata churanga.

20Paicunaca, ñucapajlla shicanyachishcacunata quilpanajujpica, na ricungapaj yaicungachu. Chaiman yaicushpaca huañungapachami” nijurcami.

21Cashnatapashmi Mandaj Diosca, Moisesman cashna nishpa villajurca:

22“Gersón runapaj miraicunatapash, paicunapaj ñaupa taitacunapaj huasi ucu puracuna, paicunapaj familiacuna imashna tandanajushcapi cuentangui.

23Ñucahuan tuparina jatun carpapi tandanajushpa ñucata servingapaj yaicujcunataca, quimsa chunga huatamanda callarishpa, picha chunga huatata charijcunacaman cuentangui.

24Gersonbaj mirai familiacuna Diospajta ruranapi, imatalla apanapica, caicunatami ruranajunga:

25Ñucahuan tuparina jatun carpapaj telacunata, shinallata ñuca carpata jatashca telacunata, tela jahuapi jatarianajuj tejón nishca animalcunapaj caracunatapash, ñucahuan tuparina jatun carpa pungupaj telatapashmi apanajunga.

26Shinallata carpa patiota muyushpa jarcashca telacunatapash, altar ladopi tiajuj carpa patioman yaicuna pungupaj telatapash, chai telacunatallata huatana cabiacunatapash, paicunallatami apanajunga. Chai ucupi imacunatalla rurangapaj tucui minishitirishcacunata, tucui imalla tiashcacunatapashmi apanajunga. Paicunaca, chashnami servinajunga.

27Gersonbaj miraicuna tucui imatalla Diospajta rurana cashpapash, tucui imatalla apashpa servina cashpapash Aaronbash, paipaj churicunapash mandashcashnallatami ruranajunga. Paicuna ricushpa tucuita ruranajuchunga, cangunami minganguichi.

28Gersonbaj mirai familiacunaca, ñucahuan tuparina jatun carpapica, chai tucuicunata rurashpami servinajunga. Paicuna imatalla ruranataca, Aarón curapaj churi Itamarmi mandajunga.

29Merari shuti runapaj miraicunataca, paicunapaj familiacuna, paicunapaj ñaupa taitacunapaj mirai huasi ucu puracuna imashna tandanajushcapi cuentangui.

30Ñucahuan tuparina jatun carpapi tandanajushpa, ñucata servingapaj yaicujcunataca, quimsa chunga huatamanda vichaiman, picha chunga huatata charijcunacaman cuentangui.

31Ñucahuan tuparina jatun carpapi, ñucata servishpa ruranacunaca, caicunami canga: Ñuca carpapaj tablacunata, caspicunata, pilarcunata, pilarcunata shayachina bazacunatapashmi apanajunga.

32Shinallata patio muyundipi shayanajuj pilarcunata, chai pilarcunapaj bazacunata, estacacunata, chai estacacunapi huatana cabiacunata, chai ucupi imatalla rurangapaj tucui minishtirishcacunata, tucui ima servinacunatapash, paicunami apanajunga. Chaipi tucui ima tiashcacunata paicuna apanajuchunga, shutihuan shutihuan ricuchishpa cungui.

33Ñucahuan tuparina jatun carpapi, Merari shuti runapaj mirai familiacuna ñucapajlla tucui imatalla ruranaca, chaicunami canga. Paicuna imatalla ruranataca, Aarón curapaj churi Itamarmi mandanajunga” nijurcami.

34Shina nijpimi Moiseshuan, Aaronhuan, israelcunata mandajcunahuan tandanajushpa, Coat shuti runapaj miraicunataca, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi cuentanajurca.

35Dioshuan tuparina jatun carpapi tucuilla tandanajushpa servingapaj yaicujcunataca, quimsa chunga huatata charijmanda callarishpa, picha chunga huatata charijcunacamanmi cuentanajurca.

36Paicunapaj familiacuna imashna tandanajushcapi cuentajpica, ishcai huaranga canchis patsaj picha chunga runacunami carca.

37Coat shuti runapaj mirai familiacuna cuentai tucushcacunaca, chaicunami carca. Paicunaca, Dioshuan tuparina jatun carpapi Diosta servijcunami carca. Paicunataca, Mandaj Dios mandashpa, Moiseshuan villachishcashnallatami Moiseshuan, Aaronhuan cuentanajurca.

38Gersonbaj churicunapaj miraicunataca, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapimi cuentanajurca.

39Paicunatapash, Dioshuan tuparina jatun carpapi tucuilla tandanajushpa servingapaj yaicujcunatami, quimsa chunga huatamanda vichaiman, picha chunga huatata charijcunacaman cuentanajurca.

40Paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi cuentajpica, ishcai huaranga sucta patsaj quimsa chunga runacunami carca.

41Gersonbaj churicunapaj mirai familiacuna cuentai tucushcacunaca, chaicunami carca. Paicunaca, Dioshuan tuparina jatun carpapi Diospajta rurajcunami carca. Paicunataca Moiseshuan, Aaronhuanmi, Mandaj Dios mandashcashnallata cuentanajurca.

42Merari shuti runapaj churicunapaj mirai familiacunatapash, paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapimi cuentanajurca.

43Paicunatapash, Dioshuan tuparina jatun carpapi tucuilla tandanajushpa, Diospajta rurangapaj yaicujcunataca, quimsa chunga huatamanda vichaiman, picha chunga huatata charijcunacamanmi cuentanajurca.

44Paicunapaj familiacuna imashna tandanajushcapi cuentajpica, quimsa huaranga ishcai patsaj runacunami carca.

45Merari shuti runapaj mirai familiacuna cuentai tucushcacunaca, chaicunami carca. Paicunatapash, Mandaj Dios mandashpa, Moiseshuan villachishcashnallatami Moiseshuan, Aaronhuan cuentanajurca.

46Moiseshuan, Aaronhuan, israelcunata mandajcunahuan tandanajushpami, levitacunataca paicunapaj familiacuna, paicunapaj ñaupa taitacunapaj huasi ucu puracuna imashna tandanajushcapi cuentanajurca.

47Dioshuan tuparina jatun carpapi Diospajta rurangapaj yaicujcunataca, tucuillatami quimsa chunga huatamanda vichaiman, picha chunga huatata charijcunacaman cuentanajurca.

48Chai cuentai tucushcacunaca, pusaj huaranga picha patsaj pusaj chunga runacunami carca.

49Mandaj Dios mandashpa, Moiseshuan villachishcashnallatami, cuentai tucunajurca. Tucuicunallatami imatalla ruranata yachan cashcashnallata, imatalla apana cashcashnallata cuentai tucunajurca. Paicunataca Moisesmi, paita imashna mandashcashnallata cuentajurca.