1Cangunata na ashtahuan shuyai ushashpa, Atenas shuti pueblopi ñucanchilla quedanata yarircanchi.
2Shina yarishpami, huauqui Timoteotalla cangunata ricuchunga cachamurcanchi. Paica, Taita Diosta servijmi. Shina cashpami Cristomanda ali villaitapash, ñucanchihuan villashpa purijurca. Paitaca, canguna crishcata ashtahuan shinllitapacha catinata yachachijuchunmi cachamurcanchi.
3Cashna jatun llaquicunata apanajushpapash, crishcata ama saquichunmi, chashna cachamurcanchi. Llaquita apangapajmi, ñucanchica agllai tucushcanchi. Chaitaca, cangunallata yachanguichimi.
4Cangunahuan ñucanchi chaipi cashpaca: “Llaquita apanapachami canchi” nishpami, ña villarcanchi. Ñucanchi nishcashnami llaquitaca, ña apanajunguichi. Chaitaca yachanguichimi.
5Chaita yachashpami cangunataca, na cungashpa ninanda yariajurcanilla. Canguna crishcata imashna catinajujta ñuca yachangapaj munashpami, Timoteotaca cachamurcani. Nalita rurana yuyaita cuj diablo nali yuyaita cushcata canguna catijpica, ñucanchi villashcapash yangami tucunman.
6Ashtahuangarin cangunata ricushpa Timoteoca, ñami ñucanchipajman tigramurca. “Aligutapacha crishpami catinajun, juyarishpami causanajun. Ñucanchitapash na cungashpami juyaihuan yarianajushca, ñucanchishnallatami paicunapash ñucanchita ninanda ricunayachinajushca” nishpami, ñucanchiman juyailla villarca.
7Huauquicuna, panicuna, canguna chashna aliguta crishpa catinajujtami uyanchi. Shinamandami, ñucanchica imagupash illaj cashpapash, llaquita apanajushpapash ninanda cushijunchi.
8Apunchi Jesusta shinllipacha catinajun nijta uyashpami, cunanga cutin ninanda cushijunchi.
9Ñucanchi Taita Diospaj ñaupajpica, canguna ninandapacha cushichijpimi cushijunchi. Shinamandami cangunamandaca, Taita Diosta ninandapacha pashi ninajunchi.
10Canguna ashtahuan alipacha crishpa catichunmi, ñavi ñavi ricushpa yachachingapaj munashpa, Taita Diostaca tutapash, punllapash ninanda mañanajunchilla.
11Ashtahuan ñucanchi Taita Diosllata, ñucanchi Apunchi Jesucristollatami, cangunapajman ñucanchita pushashpami ali canman.
12Ñucanchica, cangunataca ninandami juyanchi. Shinallata canguna purapash, shujmanda shujmanda ashtahuan juyaita charishpa, shujcunatapash juyashpa causanata cangunaman Apunchi Jesús ninanda carachunmi mañanchi.
13Ñucanchi Apunchi Jesucristoca, paipajlla causajcunata tucuilla pushashpami tigramunga. Chai punllapica, ñucanchi Taita Diospaj ñaupajpi ama juchachi tucushca, juchapash illaj, tucui shunguhuan shinllipacha catishca ricurichunmi, cangunamandaca mañanajunchi.
Who We AreWhat We EelieveWhat We Do
2025 by iamachristian.org,Inc All rights reserved.
