ÉXODO 8 - Quichua Imbabura Bible

Sapocunahuanmi llaquichishca

1Chai jipami Mandaj Diosca, Moisestaca cashna nirca:

—Faraonbaj ñaupajman rishpa, cashna ningui: Mandaj Diosca, cashnami nin: ‘Ñuca agllashcacuna ñucata servingapaj richun saqui.

2Paicuna richun can na saquingapaj munajpica, ricui cambaj tucuilla llactatami, sapocunahuan llaquichisha.

3Jatun yacumandami, sapocuna llujshinga. Chai sapocunami, cambaj huasiman, cambaj puñuj ucuman yaicushpa, cambaj camaman vitsianajunga. Shinallata canda servijcunapaj huasicunamambash, cambaj gentecunapaj huasicunamambash, cambaj jornocunamambash, tandata masana cambaj jatun bateacunamambashmi yaicunajunga.

4Shinami sapocunaca, cambaj jahuaman, cambaj gentecunapaj jahuaman, canda servijcunapaj jahuaman vitsianajunga’ ninmi ningui— nircami.

5Mandaj Diosca, Moisestaca cashnami nirca:

—Aarondaca cashna ningui: ‘Cambaj maquipi charijuj vara caspitaca, jatun yacu jahuacunapi, jatun larca yacu jahuacunapi, cuchayashca yacu jahuacunapi chutangui. Cai Egipto llactaman sapocuna llujshimuchun, chashna chutangui’ ningui— nircami.

6Shina nijpimi Aaronga, Egiptopi tiaj yacu jahuacunapi paipaj maquita chutarca. Shinamandami sapocuna llujshishpa, Egipto llactapica jundanajurca.

7Yumbucunapash, chashnallatami muspachinata paicuna yachashcahuan ruranajurca. Chashna rurashpami Egipto llactapica, sapocunata jundachinajurca.

8Shina cajpimi Faraonga, Moisestapash, Aarondapash cayashpa cashna nirca:

—Ñucamandapash, ñuca gentecunamandapash, sapocunata anchuchijuchun, Mandaj Diosta mañapaichi. Chaipaj jipaca, cangunapaj gentecunataca, Mandaj Diosman animalcunata cushpa huañuchingapaj richun saquishallami— nircami.

9Shina nijpimi Moisesca, Faraondaca cashna nirca:

—Canmandapash, canda servijcunamandapash, cambaj cai llactapi causajcunamandapash, ima punlla mañana cajpipash, canllata villahuailla. Canmandapash, cambaj huasicunamandapash, sapocuna anchurishpa jatun yacupilla tiachunmi mañasha— nircami.

10Shina nijpimi, Faraonga:

—Caya mañapangui— nirca.

Shina nijpimi Moisesca, cashna nishpa tigrachirca:

—Ñucanchita Mandaj Taita Dioshuan chimbapurangapaca, pipash na tiashcata can yachachunmi, can nishcashnallata mañasha.

11Shina mañajpimi sapocunaca, canmandapash, cambaj huasicunamandapash, canda servijcunamandapash, cambaj gentecunamandapash anchurishpa, jatun yacupilla tianga— nircami.

12Shina nishpami Moisespash, Aaronbash, Faraonbaj ñaupajmanda llujshirca. Chaimandami Moisesca, Mandaj Diostaca Faraonbajman cachamushca sapocunata anchuchipai nishpa caparishpa mañarca.

13Mandaj Diosca, Moisés mañashcashnallatami rurarca. Chaimandami huasicunapi, canllacunapi, pambacunapi tiashca sapocunaca huañurca.

14Huañushca sapocunataca, caipi chaipimi mundunanajurca. Chaimandami chai llactapica, ninanda ashnajurca.

15Sapocuna na ashtahuan llaquichijujta Faraón ricushpaca, paipaj shungu shinlliyashpami, Mandaj Dios imashna nishcashnallata, paicunataca na uyanayachirca.

Piliscunahuanmi llaquichishca

16Shinamandami Mandaj Diosca, Moisesta cashna nirca:

—Aarondaca cashna ni: ‘Tucuilla Egipto llactapi, piliscuna jundachun, cambaj vara caspita chutashpa ñutu alpapi huactai’ ni— nircami.

17Shina nijpimi paicunaca, chashna ruranajurca. Aaronga, paipaj maquipi charijuj vara caspita chutashpami, ñutu alpapi huactarca. Shina huactajpimi runacunapipash, animalcunapipash, pilis jundarca. Tucui Egipto llactapica, tucui ñutu alpami pilisman tigrarca.

18Yumbucunapash, paicuna muspachinata yachashcahuanmi, piliscunata llujchingapaj chashnallata ruranajurca. Shina ruranajushpapash, na usharcachu. Piliscunaca gentecunapipash, animalcunapipashmi ninanda jundarca.

19Shina cajpimi yumbucunaca:

—Caitaca, Taita Diosmari paipaj maquihuan cashna rurajun— nishpa, Faraonman villanajurca.

Ashtahuangarin Mandaj Dios imashna nishcashnallatami, Faraonbaj shunguca shinlliyarca. Shinamandami, paicunataca na uyanayachirca.

Chuspicunahuanmi llaquichishca

20Mandaj Diosca, Moisestaca cashnami nirca:

—Caya tutamandata jatarishpa, Faraonbaj ñaupajpi shayaringui. Ricui paica, jatun yacumanmi llujshijunga. Paitaca cashna ningui: Mandaj Diosca, cashnami nin: ‘Ñuca agllashcacunataca, ñucata servingapaj richun saqui.

21Ricui, ñuca agllashcacunata richun na saquijpica, cambaj jahuapipash, canda servijcunapaj jahuapipash, cambaj gentecunapaj jahuapipash, cambaj huasicunapipashmi, shican shican tucui chuspicunata cachamusha. Shina cachamujpimi, Egiptopi causajcunapaj huasicunapica, shican shican chuspicuna jundanga. Shinallata maipi paicuna causanajuj llactapipashmi, chashnallata jundanga.

22Chai punllapica, ñuca agllashcacuna causanajuj Gosén shuti llactataca shicanyachishami. Chaipica, ima shuj chuspillapash na tiachunmi, chashna shicanyachisha. Cai llacta chaupipica, Mandaj Dios cajta yachachunmi, chashna rurasha.

23Ñuca agllashcacunataca na llaquichishpami, cambaj gentecunataca llaquichisha. Cayami, chai ricuchinataca ricuchisha’ ninmi ningui— nircami.

24Mandaj Diosca, chashnatapachami rurarca. Chashna rurajpimi, ninanda llaquichij shican shican tucui chuspicunaca, Faraonbaj huasipipash, paita servijcunapaj huasicunapipash, tucuilla Egiptopi llactapi ninanda jundanajurca. Chai llactataca, chuspicunami huaglichinajurca.

25Shina cajpimi Faraonga, Moisestapash, Aarondapash cayashpa cashna nirca:

—Cangunapaj Taita Diosman animalcunata cushpa huañuchingapaj richilla. Ashtahuangarin chaitaca, cai llactapillata ruranguichi— nircami.

26Shina nijpimi Moisesca, cashna nishpa tigrachirca:

—Ñucanchi chashna ruranaca, napacha alichu. Chashna rurashpaca, Egiptopi causajcuna millanayachishcatami, Mandaj Taita Diosman animalcunata cushpa huañuchishun. Ricui, Egiptopi causajcuna millanayachishca animalcunata huañuchinajujpica, ¿nacha ñucanchitaca rumicunahuan huañuchinga?

27Quimsa punllata, jichushca pambata rishpami, ñucanchita Mandaj Taita Diosman, pai imashna rurachun nijpipash, animalcunata paiman cushpa huañuchishun— nircami.

28Shina nijpimi Faraonga, cashna nirca:

—Ñucallatami, cangunata Mandaj Taita Diosman, jichushca pambapi animalcunata cushpa huañuchinajuchun saquisha. Ashtahuan carumanllami na rina canguichi, ñucamandapash Diosta mañapanguichi— nircami.

29Shina nijpimi Moisesca, cashna nishpa tigrachirca:

—Cambaj ñaupajmanda llujshijushpaca, can Faraonbajmandapash, canda servijcunamandapash, cambaj gentecunamandapash, shican shican chuspicuna cayapajllata anchurichunmi, Mandaj Diosta mañasha. Can Faraonga, Mandaj Diosman animalcunata cushpa ñucanchi huañuchigrichun, jarcaitalla ama ashtahuan jarcangui— nircami.

30Shina nishpami Moisesca, Faraonbaj ñaupajmanda llujshishpa, Mandaj Diosta mañarca.

31Mandaj Diosca, Moisés mañashcashnallatami rurarca. Shina rurashpami, Faraonmandapash, paita servijcunamandapash, paipaj gentecunamandapash, shujllatapash na saquishpa, chai tucuilla chuspicunata anchuchirca.

32Ashtahuangarin Faraonbaj shunguca cutin shinlliyashpami, israelcuna richunga na saquirca.