PROVERBIOS 25 - Quichua Imbabura Bible

Aliguta causachun chimbapurashpa yachachishca shimicunami

1Caicunapash, Salomón rurashca, yarichij shimicunami. Cai shimicunataca, Judá llactata jatun mandaj Ezequiaspaj escribijcunami cutin escribinajurca.

2Imata pacalla charinaca, Taita Diospaca cushijuimi.

Shina cajpipash aligutapacha callarishpa ricunaca,

jatun mandajpaca aligupachami.

3Jahua pacha maicaman cajtapash, cai pacha maicaman

ucu cajtapash, jatun mandajcunapaj shungupi imata

yarinajujtapash, pipash na yachai ushanllu.

4Culquita yacuyachishpa, mapata anchuchingui.

Chashna rurajpimi, culquita yacuyachishpa imata

ruranata yachaj, imata rurashcapash

juyaillagu llujshinga.

5Diosta na manllaj runataca,

jatun mandajpaj ñaupajmanda anchuchingui.

Shina anchuchijpimi, mandangapaj tiarinapipash

imatapash cashcatapacha rurashpa shinllitapacha mandajunga.

6Jatun mandajpaj ñaupajpica,

ama canllata alicachiringuichu.

Jatungunalla tiarina pushtupipash, ama tiaringuichu.

7Can ricushca mandajpaj ñaupajpi

pingai tucushpa urai cumuringapaj randica:

“Caiman vichai shamui” ningacaman

shuyanami ashtahuan ali.

8Ama imamandapash ñapash fiñanajuipi yaicunguichu.

Caishuj runa canda pingaichijpira,

imata ruraitapash na ushanguiman.

9Canda pi imata nijpipash,

chaitaca paihuanlla alichingui.

Imatapash canlla yachashcataca,

ama pimambash villanguichu.

10Pactarallapash can parlajujta maijambash

uyashpara, can alicachi tucushcata huaglichinman.

Canda juchachishpa pingaichishcapash,

na alichi ushanallara tucunman.

11Aliguta yarishpa rimashca shimicunaca,

oro manzanapi culquita churashpa,

juyaillaguta rurashcashnami.

12Aliguta uyaj, alipacha yachajushca runata jarcashpa

rimaj runaca, oro zarcilloshna, ashtahuan ali

oromanda rurashca juyailla huatarinacunashnami.

13Imata villachun cachajpipash, ali pactachij runaca,

chai cachaj runacunapaca, cozechai punllacunapi

chirilla rasu yacuta caranshnami.

Chai runaca, paipaj amopaj almatami samachijun.

14Imagutapash carashapachami nishpa jariyashpapash,

na pactachij runaca, huairahuan fuyu

shamushpapash, na tamianshnami.

15Mandaj fiñarishca cajpica, na ñapash

fiñarishpami alichin.

Amujlla shimicunaca, tulluta faquinshnami amujyachin.

16¿Balun mishquitachu tarircangui?

Tarishpaca, usharishcagutalla micungui.

Yapata micushpara millanayachishpa,

shunguta tigrachinguiman.

17Cambaj ladollapi causajpajmambash, ama yapa chayanguichu,

pactarallapash canda na ricunayachishpa millanayachinman.

18Pitapash yanga juchachishpa villagrij runaca,

martilloshna, cuchilloshna, filo filo flechashnami.

19Ninan llaqui punllacunapi cashpa, yachashpata na cazuj

runa ayudachun shuyanaca, quiru faquirishcashna,

chaqui quivishcashnami.

20Llaquilla shunguhuan tiajujpi candajuj runaca,

chiri punllacunapi churajunata quichunshnami.

Na cashpaca, jabón jahuapi vinagreta talinshnami.

21Canda na ricunayachij runa yarjachijujpica,

micunata carangui.

Yacunayachijujpipash, yacuta ufiachun carangui.

22Shina rurajpica, nina carbonda

umapi churajpishnami, pingai tucunga.

Mandaj Diospash, alicunatami canman caranga.

23Janaj ladota huaira shamushpaca,

tamiata calpachinllami.

Fiña ñavihuan ricushpaca, llullashpa parlaj

runapash shinallatami calpachin.

24Jatun huasi ucupi causashpapash, imatapash

nirishpa fiñachijujlla huarmihuan causanapaj

randica, huasi jahua uchilla ucugupi causanami ashtahuan ali.

25Caru llactamanda ali villaita villaj shamushpaca,

ninanda yacunayachijuj shungupi chirilla

yacu chayanshnami.

26Imatapash cashcatapacha ruraj runa,

Diosta na manllaj runapaj ñaupajpi urmashpaca,

pugyu yacu turuyashcashna, llujshijuj

yacu mapayashcashnami.

27Balun mishquita yapata micunaca nalichu.

Quiquinllata juyailla tucunata mascanapash,

na juyaillata ruranllu.

28Ñapash fiñarina yuyaita na jarcarij runaca,

muyundi pirca urmashca jatun pirca illaj puebloshnami.