1Amasías shuti runaca, ishcai chunga picha huatata charishpami, mandai callarirca. Paica, ishcai chunga iscun huatatami Jerusalenbi mandajurca. Paipaj mamaca, Jerusalenmanda Joadán shutimi carca.
2Amasías runaca, na tucui shunguhuan rurajushpapash Mandaj Diospaj ñaupajpica, alitallami rurashpa causajurca.
3Amasías runaca, ña shinllitapacha mandajushpaca, paipaj taita jatun mandajta huañuchishca servijcunatapashmi huañuchirca.
4Ashtahuangarin mandashcata Moisés escribishca libropi tiajunshnallatami, paicunapaj churicunataca na huañuchirca. Chaitaca, Mandaj Diosmi cashna nishpa mandashca carca: “Churicunapaj juchamandaca, taitacunaca na huañungachu. Shinallata taitacunapaj juchamandapash, churicunaca na huañungachu. Ashtahuangarin maijan cashpapash, paipaj juchamandami huañunga” nishcami carca.
5Amasías runaca, Judá aillu gentecunata tandachishpami Judapaj, Benjaminbaj aillu familiacunata mandachun, huaranga soldadocunata mandajcunata, patsaj soldadocunata mandajcunata churarca. Chai jipami, ishcai chunga huatata charijmanda vichaiman, mashna jaricuna tiashcata shuticunata japirca. Chaipimi, macanajuiman llujshinallacunata agllashcacunataca, quimsa patsaj huaranga runacunata tarirca. Paicunaca lanzahuan, jarcarina escudohuanmi carca.
6Shinallata sucta chunga pusaj quintal culquita cushpami, Israel llactamandapash patsaj huaranga ninan shinlli soldadocunata japirca.
7Ashtahuangarin Taita Diospaj shuj runagu paipajman shamushpami, cashna nijurca:
—Mandaj Diosca, israelcunamandapash, tucuilla Efraín aillumandapash anchurishcami. Shina cashcamandaca jatun mandajlla, chai Israel soldadocunahuanga ama richu.
8Ashtahuangarin chashna rurashpa, chai soldadocunahuan shinlli tucushpa macanajungapaj rijpica, Taita Diosca canda fiñajcunapaj ñaupajpi mishai tucuchunmi saquinga. Taita Diosllami mishachingapajpash, urmachingapajpash ushaita charin— nijurcami.
9Shina nijpimi Amasías shuti runaca, Taita Diospaj runagutaca cashna nirca:
—Sucta chunga pusaj quintal culquita, Israel soldadocunaman cushcataca, ¿imatata rurasha?— nircami.
Shina nijpimi, Taita Diospaj runaguca:
—Mandaj Diosca, chaitapash yalitami carai ushan— nishpa tigrachirca.
10Shina nijpimi Amasías runaca, Efraín aillu puramanda paipajman shamushca soldadocunataca, paicunapaj huasicunaman tigrachun shicanyachirca. Shinamandami paicunaca, Judá llactapi causajcunahuan ninandapacha fiñarishpa, paicunapaj huasicunamambash ninandapacha fiñarishcacuna tigranajurca.
11Amasías runaca shinlli tucushpami, Cachi tiaj pugru Pambaman paipaj soldadocunahuan llujshishpa, Seir shuti llactapi causajcunataca chunga huaranga soldadocunata huañuchirca.
12Judá llacta soldadocunaca, Seir shuti llactamanda caishuj chunga huaranga soldadocunata causajta japishpami, rumi jaca vichaiman apanajurca. Chai jahuamanda ucuman shitajpimi, tucuilla ñuturirca.
13Ashtahuangarin macanajuiman paihuan ama richun, Amasías runa tigrachishca Israel soldadocunaca, Judá llactapi tiaj pueblocunamanmi yaicugrishca carca. Paicunaca, Samaria shuti pueblomanda Bet-horón shuti pueblocamanmi, ninanda llaquichinajurca. Chaipi causaj puracunataca, quimsa huarangacunata huañuchishpami, ashtaca charishcacunata quichushpa apanajurca.
14Amasías runaca, chai edomitacunata huañuchishpa tigramushpaca, Seir shuti llactapi causajcunapaj dioscunata apashpami shamurca. Chaicunataca, paipaj dioscuna cachun paipaj ñaupajpi churashpami, ninanda alicachishpa inciensotapash cushnichijurca.
15Chaimandami Mandaj Diosca, Amasiastaca nina japirinshna fiñashpa, pai ima nishcata villaj shuj runata, Amasiaspajman cacharca. Chai villajmi, cashna nijurca:
—¿Imashpata canga, shuj llactapi causajcunapaj dioscunatara mascashcangui? Chai dioscunaca, paicunata mañaj gentecunatapash, cambaj maquimanda na quishpichi usharcachu— nircami.
16Dios ima nishcata villaj runagu shina nijujpillatami, jatun mandajca cashna nishpa tigrachirca:
—¿Candaca, jatun mandajman ali yuyaita cuj cachunllu churanajurca? Canga, chaitaca saquilla. ¿Imashpata canda huañuchinajuchun munangui?— nircami.
Shina nishpa rimaita tucuchijpimi, Dios ima nishcata villaj runaguca, cashna nirca:
—Ali yuyaita ñuca cushcata na cazushpa, cashna nalita rurashcamandami, Taita Diosca canda tucuchinata yarirca— nircami.
17Ashtahuangarin Judá llactata jatun mandaj Amasías shuti runaca, yuyaita cujpi chasquishca jipami, Israel llactata jatun Mandaj Joás shuti runapajman: “Shamui, ñavi ñavi ricurishun” ninajuchun cacharca. Joás shuti runaca, Joacaz shuti runapaj churimi carca. Joacaz runaca, Jehú shuti runapaj churimi carca.
18Chaimandami Israel llactata jatun mandaj Joás runaca, Judá llactata jatun mandaj Amasías runaman cashna nichun cacharca: “Líbano shuti urcupi tiaj uchilla casha yurami, Líbano shuti urcupillata tiaj cedro quirutaca: ‘Cambaj ushitaca, ñuca churihuan cazarachingapaj cuhuai’ nichun cacharca. Ricuichi, Líbano shuti urcumanda millai animalcuna yalishpami, chai casha yurataca sarunajurca.
19Canga, cashnami nijungui: ‘Ricuichi, Edom shuti llactapi causajcunataca misharcanimi’ nishpami, cambaj shungupica jariyashpa cushijujungui. Cunanga, cambaj huasipi tiajuilla. ¿Imapajta cambash, Judá llactapash llaquipi urmanata mascajunguiyari?” nichunmi cacharca.
20Ashtahuangarin Amasías runaca, na uyanayachircachu. Taita Diospaj munaica, paicunata fiñajcunapaj maquipi churana cashcamandami, chashna na uyanayachirca. Paicunataca, Edom llactapi causajcunapaj dioscunata mañashcamandami, chashna rurarca.
21Shinamandami Israel llactata jatun mandaj Joás runaca, vichai shamurca. Judá llactapi tiaj Bet-semes shuti pueblopi macanajungapaj shamushpami paipash, Judá llactata jatun mandaj Amasías runapash ñavi ñavi ricurinajurca.
22Ashtahuangarin Judá llactamanda runacunaca, israelcunapaj ñaupajpi mishai tucushpami, tucuicuna paicunapaj huasicunaman pacajushpa calpanajurca.
23Israel llactata jatun mandaj Joás runaca, Judá llactata jatun mandaj Amasías runataca, Bet-semes shuti pueblopi japishpami, Jerusalenman aparca. Amasías runaca, Joás runapaj churimi carca. Joás runaca, Joacaz runapaj churimi carca. Jerusalén pircataca, Efraín shuti pungumandaca, pirca tigranapi tiaj pungucamanmi patsaj pusaj chunga metrota urmachirca.
24Shinallata Taita Diospaj huasipi alichishca tucui orotapash, culquitapash, imatalla alichishpa charishcatapashmi quichurca. Chaicunataca, Obed-edom shuti runami cuidan carca. Mandana huasipi ninan valishcacunata imatalla alichishcatapashmi aparca. Alicachi tucushca runacunapaj churicunatapash apashpami, Samaria puebloman tigrarca.
25Judá llactata jatun mandaj, Joás runapaj churi Amasías runaca, Israel llactata jatun mandaj, Joacaz runapaj churi Joás huañushca jipaca, chunga picha huatacamanmi causajurca.
26Punda punllacuna, jipa punllacuna Amasías runa imatalla ashtahuan rurashcacunapash, ¿nachu Judá llactata, Israel llactata jatun mandajcuna imatalla rurashcata escribishca libropi tiajun?
27Mandaj Diosmanda Amasías runa anchurishca punllamandapachami, paita fiñashpa huañuchingapaj, Jerusalenbi pacalla parlarishpa jatarinajurca. Chaimandami Amasías runaca, Laquis pueblopi pacajugrirca. Laquis shuti puebloman pacajugrijpipash, chaiman catishpami, chai pueblopi huañuchinajurca.
28Paita huañuchishpaca, caballocunapimi, Jerusalenman apamunajurca. Chaipimi Judá llacta pueblopi, paipaj ñaupa taitacunapaj ladopi pambarca.
Who We AreWhat We EelieveWhat We Do
2025 by iamachristian.org,Inc All rights reserved.
