DEUTERONOMIO 17 - Quichua Imbabura Bible

1Canda Mandaj Taita Diosman carashpaca, huagrata cashpa, maltun llamata cashpapash, imapash illaj cajpi, na cashpaca imapash na ali cajpica, Diosman cushpa na huañuchinachu cangui. Chaitaca, canda Mandaj Taita Diosca millanayachinmi.

2Canda Mandaj Taita Dios carashca maijan pueblopipash, cangunapaj chaupipi maijan jari cashpa, huarmi cashpa, cangunata Mandaj Taita Diospaj ñaupajpi nalita rurashca cashpa, Dioshuan ari nishcacunata na cazunman.

3Paica, shuj dioscunata servingapaj rishpa chaicunata cungurinman. Indita cashpa, na cashpaca lunata cashpa, jahua pachapi tiaj tucuilla luzerocunatara cungurishca canman. Chaicunataca ñucami: ‘Na chashna ruranachu canguichi’ nishpa mandarcani.

4Chashna ruranajujta canman villajpica, shina cajta, na shina cajtapash alipacha tapuchishpa yachangui. Shina tapuchishpaca, Israel purapica, millanayaicunata rurashcapacha cajtami yachangui.

5Shina nalita rurashcata yachashpaca, jari cajpi, huarmi cajpipash, puebloman yaicuna punguta llujchishpa apangui. Chaipi rumicunahuan huañuchijpimi, chai nalita rurajcunaca huañunga.

6Chai huañuchi tucuna runataca, ishcaipura cashpa, quimsapura cashpapash ricushpa villajpillami, huañuchina cangui. Shujlla villajpica, na huañuchinachu cangui.

7Chai runataca, ricushcata villajcunarami rumicunahuan huañuchi callaringa. Chaipaj jipami, tucuilla gentecunapash rumihuan huañuchinajunga. Chashna rurashpami, canguna purapi tiaj nalitaca anchuchinguichi.

8Imata ricushpa mandangapajpash, na ushanallami canga. Maijandapash imashna huañuchishcata, na cashpaca mandashcapi nishcashnallata japina cashcata cunata, na cashpaca randimanda chugrichirishcata, na cashpaca cambaj pueblocunapi jatunajushpa, randinajushpa fiñanajujcunatami na alichi ushangui. Shina cajpica, canda Mandaj Taita Dios agllashca puebloman jatarishpa ringui.

9Chaipimi, chai punllacuna Diosta servinajuj levita* curacunapajman, juezpajman shamushpa tapugringui. Paicunami, imashna aliguta ricushpa llaquichinatapash yachachinga.

10Mandaj Dios agllashca pushtupi causajcuna imashna llaquichijuchun mandashcashnallata rurangui. Paicuna imashna villashcashnallata, tucuita rurangapaj aliguta yaringui.

11Chai mandashca shimicunata paicuna yachachishcashnallata, aliguta ricushpa mandanata paicuna villashcashnallata rurangui. Imashna llaquichijuchun mandashcamandaca ali ladomambash, lluqui ladomambash na anchurinachu cangui.

12Mandaj Taita Diospaj ñaupajpi paipajta rurangapaj cura mandashcata, na cashpaca juez mandashcata na cazushpa jariyaj runataca huañuchinguilla. Chashna rurashpami, Israel purapi nalita ruranataca anchuchingui.

13Shina rurashcata tucui israelcuna uyashpami manllarishpa, na ashtahuan jariyanajunga.

Jatun mandajta charinamandami mandashca

14Canda Mandaj Taita Dios canman carashca llactaman chayashpa, chai llactata japishpa chaipi causajushpaca, cashnami ningui: ‘Ñuca llacta muyundipi tiaj tucui llactacunapi causajcunashnallata, ñucapash shuj jatun mandajta churangapajmi munani’ ninguimi.

15Shina nishpaca, canda Mandaj Taita Dios agllashca runatapachami churana cangui. Cambaj jatun mandaj cachunga, cambaj huauqui puratallatami churana cangui. Shuj llactamanda shamushca, na cambaj huauqui purataca, na churanachu cangui.

16Ashtahuangarin chai mandaj runaca, caballocunata na mirachingachu. Caballocunata mirachinamandalla gentecunataca, na Egiptoman tigrachingachu. Mandaj Diosllatami: ‘Chai ñandaca, ima horapash na cutinga tigranachu canguichi’ nirca.

17Diosmanda paipaj shungu ama anchurichunga, chai mandaj runaca ashtaca huarmicunatapash na charingachu. Culquitapash, orotapash na mundunashpa ashtacata charinachu.

18Jatun mandaj mandangapaj tiarinapi tiarishpaca, cai mandashcata shuj libropi mushujta escribichishpa pai charichun. Cai mandashcataca, levita curacunami cuidashpa charinajun.

19Chai escribishcata pai charishpaca, paita Mandaj Taita Diosta manllanata yachajungapajmi, paipaj tucui causai punllacunapi leyishpa causanga. Cai mandashca shimicunata cazushpa pactachingapaj, pactachinajuchun cushca cai shimicunata pactachishpa causangapajmi, chashna charinga.

20Shinallata paipaj huauqui puracunata yalimi cani yashpa, paipaj shungupi na jariyangachu. Shinami cai mandashcamandaca, lluqui ladomambash, ali ladomambash na anchurishpa causashpa paipash, paipaj miraicunapash, israelcunata mandanamandaca na anchuchi tucushpa causanajungalla.