APOCALIPSIS 13 - Quichua Imbabura Bible

Manllanayai ishcai animalcunatami ricushca

1Mama cucha t'iyu alpapimi shayarircani. Chaipi shayajushpaca, canchis umata, chunga cachuta charij, manllanayai animal mama cuchamanda llujshijujtami ricurcani. Chai cachucunapica, chunga diadema nishcacunatami charirca. Chai umacunapica, Diosta nali shimicunata rimashca shutita churashcami carca.

2Ñuca ricushca manllanayai animalca, leopardoman rijchajmi carca. Chaquica, osopaj chaquishnami carca. Shimica, leonbaj shimishnami carca. Paimanmi dragonga, paipaj ushaitapash, pai mandashpa tiarinatapash, ninanda mandai ushanatapash curca.

3Chai manllanayai animalpaj shuj umataca, huañunatashna chugrichishcatami ricurcani. Ashtahuangarin huañunatashna chugrichishcapash, ali tucurcallami. Chaita ricushpami, cai pachapi tucui causajcunaca, ninanda manllarishpa, chai animaltaca catinajurca.

4Chai catijcunaca, manllanayai animalman mandai ushanata cuj dragondapash, chai manllanayai animaltapashmi, cashna nishpa ninanda alicachinajurca: “Manllanayai animalshnaca, ¿pita tiangayari? Paihuan macanajuitaca, ¿pita ushangayari?” ninajurcami.

5Chai manllanayai animalmanmi, jatun nali shimicunata rimachun, Diosta nali shimicunata rimai ushachumbash, ushaita curca. Shinallata chuscu chunga ishcai quillacaman, mandai ushachumbashmi curca.

6Chai ushaita cujpimi Taita Diosta, paipaj shutita, paipaj carpa huasita, jahua pachapi causajcunatapash fiñashpa, nali shimicunata rimajurca.

7Diospajlla causajcunahuan macanajushpa, mishana ushaitapashmi curca. Shinallata tucui aillucunata, gentecunata, shuj shuj rimaita parlajcunata, llactacunata mandana ushaitapashmi curca.

8Cai pachapi causajcunaca, tucuicunami chai animalta mañanajurca. Paicunapaj shuticunataca, cai pachata churai punllamandapacha, causaita causanata villajuj, huañuchi tucushca Llamapaj libropica, na escribishcachu carca.

9Maijambash rinrita charishpaca, caita uyanguichi.

10Shujcunata prezu apajca, paipash prezu apai tucungami. Maijambash espadahuan huañuchishpaca, paipash espadahuanllatami huañuchi tucunga. Chaimandami Diospajlla causajcunaca, na ñapash fiñarishpa, aliguta crishpa causana.

11Chai jipallami, alpa ucumanda manllanayai shuj animal llujshijtapash ricurcani. Chai animalca, llama cachuman rijchaj ishcai cachucunatami charirca. Ashtahuangarin dragonshnallatami rimajurca.

12Paipash, manllanayai chai punda animalshnallatami, paipaj ñaupajpi tucuita mandajurca. Paica, cai pachapash, cai pachapi causajcunapash, huañunatashna chugrichi tucushca, chai punda manllanayai animalta mañachunmi mandajurca.

13Shinallata ninan manllarinacunatami, imatapash rurajurca. Chai animalca, gentecunapaj ñaupajpimi, jahua pachamanda ninata cachamushpa ricuchijurca.

14Punda shamuj animalpaj ñaupajpi, chashna rurashpa ricuchi ushachunmi saquirca. Chashna rurashpami, cai pachapi causajcunata umachishpa cashna nirca: “Chugrichi tucushpapash, na huañuj manllanayai animalman rijchajta rurashpa churanguichi” nishpami, cai pachapi causajcunata mandajurca.

15Shinallata chai manllanayai animalman rijchajta rurashca causaita charichunga, jipa animal samaita carachumbashmi, Diosca saquirca. Shina carajpimi, chai animalman rijchajca rimai ushashpa, paita na alicachijcunataca, tucuillata huañuchinajuchun mandajurca.

16Shinallata ali lado maquipi cashpa, frentepi cashpapash, tucuicunapi shuj ricuchinata churachunmi mandarca. Chaitaca, uchillacunapi, jatungunapi, charijcunapi, imagutapash na charij gentecunapi, na gañangunapi, gañangunapipashmi churachun mandarca.

17Chai ricuchinata na charishpaca jatuitapash, randitapash na usharcachu. Chai manllanayai animalpaj shutita, na cashpaca chai animalpaj numerota charijllami jatuitapash, randitapash usharca.

18Cai nishcataca, ali yachaita charijcunallami entendi ushan. Maijambash ali yuyaita charishpaca, animalpaj número mashna cashcata cuentachun. Chai animalpaj numeroca, sucta patsaj sucta chunga suctami. Chai numeroca, shuj runapaj shutimi.