GÉNESIS 42 - Quichua Imbabura Bible

1Jacoboca, micuna granocuna Egiptopi tiajta yachashpami, paipaj churicunataca: “¿Imashpata cangunapura ricurinajunguichi?” nirca.

2Shinallata cashnatapashmi nirca: “Uyaichi, Egiptopica micuna tianmi nijtami uyashcani. Shina cashcamanda chaiman urai rishpa ñucanchiman micunata randimugrichi. Chaita micushpa causashpami, na huañuringa” nircami.

3Shina nijpimi, Josepaj chungapura huauquicunaca, Egiptopi trigota randingapaj urai rinajurca.

4Ashtahuangarin Jacoboca, Josepaj huauqui Benjamindaca, paipaj huauquicunahuanga na cacharcachu. “Paitapash, imapash llaquicuna japipajpash” yashpami na cacharca.

5Canaán llactapi yarjai tiajpimi, taita Israelpaj churicunapash, granota randingapaj shamuj puracunahuan shamunajurca.

6Egipto llactapica, Josemi mandajurca. Paimi, chai llactapi causaj tucui gentecunaman granota jatujurca. Josepaj huauquicuna chaiman chayashpaca, alpaman chayajtami urai cumurinajurca.

7Joseca, paipaj huauquicunata ricushpaca rijsircallami. Ashtahuangarin Joseca, paicunata na risinshnalla tucushpami, shinllita rimashpa: —¿Maimandata shamurcanguichi?— nirca. Shina nijpimi paicunaca: —Canaán llactamandami, granoguta randingapaj shamuparcanchi— nishpa tigrachinajurca.

8Joseca, paipaj huauquicunataca rijsircallami. Ashtahuangarin paicunaca, na rijsircachu.

9Shinamandami Joseca, paicunamanda muscuicunata charishcata yarirca. Paicunataca, cashnami nirca: —Cangunaca, pacalla ricuchun cachamushcacunami canguichi. Cai llacta maipilla na jarcashcata ricungapajllami shamushcanguichi— nircami.

10Shina nijpimi paicunaca, cashna nishpa tigrachinajurca: —Ñucanchita mandajlla, na shinachu capan. Ashtahuangarin canda servijcunaca, granoguta randingapajmi shamuparcanchi.

11Tucui ñucanchimi, shujlla taitapaj huahuacuna capanchi. Ñucanchica, alicachi tucushca runacunami capanchi. Canda servijcunaca, ima horallapash na pacalla ricushpa purijcunachu cashcanchi— ninajurcami.

12Ashtahuangarin Joseca, cashnami nirca: —Na chashnachu. Cangunaca, cai llacta maipilla na jarcashcata ricungapajllami shamushcanguichi— nircami.

13Shina nijujpimi paicunaca, cashna nishpa tigrachinajurca: —Canda servijcunaca, chunga ishcai huauquicunami capanchi. Canaán llactapi causajuj shujlla taitapaj churicunami capanchi. Ricui, jipa churica cunanga ñucanchi taitahuanmi, shujca chingashca, na ricurimupanllu— ninajurcami.

14Shina nijpimi Joseca, cashna nijurca: —Cangunataca cashnatallatami nircani: ‘Cangunaca, pacalla ricuchun cachamushcacunapachami canguichi’ nircanimi.

15Caita rurashpami, cangunataca ricusha: Faraón causajujpimi cashna nini: Cangunaca, caimandaca na llujshi ushanachu canguichi. Ashtahuangarin cangunapaj jipa huauqui caiman shamujpillami llujshinguichi.

16Cangunaca prezu quedashpa, canguna puramanda shujtaca, cangunapaj huauquita pushamuchun cachaichilla. Shina pushamujpimi, canguna na llullashpa parlanajushcataca yachasha. Na cashpaca canguna llullanajujpica, Faraón causajujpimi cashna nini: Cangunaca, pacalla ricuchun cachamushcacunami canguichi— nijurcami.

17Shina nishpami paicunata tandachishpa, prezuna huasipi quimsa punllacunacaman churarca.

18Ña quimsa punllapimi Joseca, cashna nirca: —Cangunaca cashna rurashpaca, causanguichimi: Ñucaca, Taita Diostami manllani.

19Canguna alicachi tucushcacuna cashpaca, canguna prezu tianajuj ucupi, cangunapaj huauqui puramanda shujlla quedaichi. Caishujcunaca, cangunapaj huasipi yarjachijcunaman granota apashpa richilla.

20Ashtahuangarin cangunapaj jipa huauquitaca, pushamunapachami canguichi. Shina pushamushpaca, canguna parlanajushcapash chashnapacha pactajpimi, na huañunguichi— nircami. Shina nijpimi paicunaca, chashnallata ruranajurca.

21Paicunaca caishuj, chaishujmi cashna ninajurca: —Ñucanchica, ñucanchi huauquita fiñashpaca, juchatapachami rurashcanchi. Na jatunachu cahuanguichi nishpa ninanda mañashpa, tucui shunguhuan llaquirijujpipash, na uyanayachishpami jaturcanchi. Chaimandami cai llaquica, ñucanchi jahuapi shamushca— ninajurcami.

22Shina ninajujpimi Rubenga, cashna nishpa tigrachirca: —¿Nachu ñucaca: ‘Chairalla viñai huambraguta llaquichishpa, na juchata ruranachu canguichi’ nircani? Shina nijpipash, cangunami na uyanayachircanguichi. Ricuichi, chaimandami ñucanchitapash, paipaj yahuarmanda llaqui japijun— nircami.

23Josehuan, paicuna parlanajujtaca shuj runami entendichijurca. Paicuna parlanajujta José entendijtaca, na yacharcachu.

24Joseca, paicunapaj ladomanda anchurishpami huacarca. Huacashca jipa paicunapajman tigrashpa rimashpami, paicuna puramandaca Simeonda japishpa, paicuna ricujta prezu churarca.

25Chaipaj jipami Joseca, paicunapaj costalcunapi trigota jundachinajuchun mandarca. Tucui paicunapaj culquitapash, paicunapaj costalpillata churashpa tigrachinajuchunmi mandarca. Shinallata ñambi micunajuchumbash, micunata carachunmi mandarca. Shinami paicunahuanga, pai mandashcashnallata ruranajurca.

26Chai jipami paicunapaj trigotaca, paicunapaj burrocunapi apachishpa chaimanda rinajurca.

27Shina rinajushpami paicuna puramanda shujca, samana huasipi paipaj burroman micuchingapaj costalta pascajushpaca, paipaj culquica costal shimipi tiajushcata ricurca.

28Shina ricushpami, paipaj huauquicunataca cashna nirca: —Ñuca culquitaca tigrachihuashcashnaca. Ricuichi, ricuichi, cai ñuca costalpimi tiajun— nircami. Shina nijpimi, paicunapaj shungu chiriyashpa ninanda manllarishpa, caishuj chaishuj: —¿Taita Diosca, imatata ñucanchitaca rurashcayari?— ninajurca.

29Canaán llactapi causajuj paicunapaj taita Jacobopajman chayamushpaca, tucui imashna tucushcatami cashna nishpa villanajurca:

30—Chai llactata mandaj runaca, pacalla ricungapaj rishcacunatashnami, ñucanchitaca shinllita rimarca.

31Ñucanchica, cashnami nircanchi: ‘Ñucanchica, alicachi tucushcacunami capanchi. Ima horallapash na pacalla ricushpa purijcunachu capashcanchi.

32Ñucanchica, shujlla taitapaj churicuna, chunga ishcai huauquicunami capanchi. Shujca chingashpa na ricurimunllu. Cati huauquica, cunanga ñucanchi taitahuan Canaán llactapimi’ nircanchimi.

33Shina nijpimi chai llactata mandajca, cashna nirca: ‘Caita rurajpimi, cangunataca alicachi tucushca runacuna cajta yachasha. Cangunapaj huauqui puramanda shujta ñucahuan saquishpa, cangunapaj huasipi yarjachijcunaman granota apashpa richilla.

34Cangunaca, na pacalla ricuchun cachamushcacuna cajta, ashtahuangarin alicachi tucushca runacuna cajta yachangapaca, cangunapaj jipa huauquita pushamunguichi. Shina pushamujpimi, cangunapaj caishuj huauquitaca tigrachisha. Chai jipami, cai llactapica randishpa jatushpa puri ushanguichi’ nircami— nishpami villanajurca.

35Chai jipami, cashna tucurca: Paicunapaj grano costalcunata talijpica, tucuicunapaj costalpimi paicunapaj culqui huatashcacuna tianajushca carca. Chai culqui huatashcataca paicunapash, paicunapaj taitapash ricushpami ninanda manllarinajurca.

36Chaimandami paicunapaj taita Jacoboca, cashna nirca: —Cangunaca, churicuna illajtami saquihuanguichi. Josepash na ricurimunllu, Simeonbash na ricurimunllu. Cunanga, Benjamindapashmi apagringuichi. Tucui caicunaca, ñucatamari ninanda llaquichijun— nircami.

37Rubenga, paipaj taitataca cashnami nirca: —Cambaj churiguta ñuca na tigrachimujpica, ñucapaj ishcandi churicunata huañuchipanguilla. Cambaj churigutaca, ñuca maquipi cuhuailla. Paitaca, ñucami canman tigrachisha— nircami.

38Shina nijpimi Jacoboca, cashna nirca: —Ñuca churiguca, napacha cangunahuan urai ringachu. Paipaj shuj huauquipash ñami huañushca, pai cashcami quedashca. Canguna rinajuj ñambi ninan llaqui japijpica, yuraj ajcha tucushca ñucataca, cangunami jatun llaquihuan Seolman urai cachahuanguichi— nircami. Josepaj huauquicunaca, Benjaminda pushashpami Egiptoman tigrashca