1Mariapash, Aaronbash, Moisestaca, paipaj huarmimandami fiñashpa rimanajurca. Moisesca, Cus shuti llactamanda huarmihuanmi cazarashca carca.
2Paitaca, cashnami ninajurca: “¿Moiseshuanllachu, Mandaj Diosca rimashca? ¿Nachu ñucanchihuambash rimashcayari?” ninajurcami. Chashna ninajujtami, Mandaj Diosca uyarca.
3Moisés runagumi, tucui cai pachapi causaj jaricunamandaca, yali ali shunguta charirca.
4Chai jipami, Mandaj Diosca Moisesta, Aaronda, Mariataca: “Ñucahuan tuparina jatun carpaman quimsandi llujshichi” nirca.
Shina nijpimi paicunaca, quimsandi llujshinajurca.
5Chai jipami Mandaj Diosca, pilarshna shayajuj fuyupi uriajushpa, carpa pungu ladoman shayarirca. Chaipimi Aarondapash, Mariatapash cayajpi, ishcandi llujshimurca.
6Paica cashnami nirca: “Cunanga, ñuca rimashcata uyahuaichi. Mandaj Dios ñuca ima nishcata villaj runa canguna purapi tiajpica, muscuipishnami ricurisha. Paihuanga muscuipimi parlasha.
7Ashtahuangarin ñucata servij Moiseshuanga, na chashna parlashachu. Paica, ñuca huasipi tucui imatalla ruranatapash, aliguta pactachishpami causajun.
8Chaimandami paihuanga, ñavi ñavi parlasha. Ali entendinallatami parlasha. Na muscuipishna ricurishpa parlashachu. Chaimandami Mandaj Dios imashna cajtaca, ñavi ñavi ricuhuanga. ¿Imashpata ñucata servij Moisesta fiñashpa rimanataca, na manllarcanguichi?” nircami.
9Shina nishpallami Mandaj Diosca, nina japirinshna paicunahuan ninanda fiñarishpa rirca.
10Diospaj jatun carpamanda fuyu rijpica Mariaca, lepra ung:uihuan rasushna yuraj yurajmi cashca carca. Mariata, Aarón ricujpica, lepra ung:uihuanmi cashca carca.
11Chaimandami Aaronga, Moisesta cashna nirca: “¡Ñuca amolla! Ñucanchica, imatapash na yachajcunashna maitapash ninajushpami, juchata rurapashcanchi. Cunanga, cai juchataca, ama ñucanchi jahuapi churapaichu.
12Cunanga paitaca, huañushcata ungushca huahuatashnaca, ama saquipaichu. Mamapaj vijsapillata chaupita ismushpa llujshishca huahuatashnaca, ama saquipaichu” nircami.
13Shina nijpimi Moisesca, Mandaj Diosta caparishpa cashna nijurca: “Taita Dioslla, Mariataca cunanda alichipairi nipanimi” nijurcami.
14Shina mañajpimi Mandaj Diosca, Moisesman cashna nishpa tigrachirca: “Paipaj taita paipaj ñavipi t'ucajpica, ¿nachu canchis punllacaman pingai tucunman? Shina cashcamanda, canchis punllacaman carpacunamanda llujchishpa cachai tucuchun. Chai jipami, tandanajushca israelcunapajman cutin tigramui ushanga” nircami.
15Shina nijpimi Mariaca, canchis punllacunata carpacunamanda llujchishpa cachai tucurca. María paicunahuan tandanajungacamanmi, israelcunaca na shuj ladoman yalinajurca.
16María ña tigrajpimi israelcunaca, Hazerot shuti pueblomanda llujshishpa, Parán shuti jichushca pambapi carpacunata shayachishpa tiarinajurca.
Who We AreWhat We EelieveWhat We Do
2025 by iamachristian.org,Inc All rights reserved.
