ROMANOS 16 - Quichua Imbabura Bible

Rijsishcacunataca, alillachu capanguichi nishcami

1Febe shuti ñucanchi panitaca, aliguta chasquipaichi nipanimi. Paica, Cencrea shuti pueblopi tandanajuj crijcunata aliguta ayudajmi.

2Apunchi Jesusta crij cashcamandaca, Diospajlla causajcunata mingachinshnallatami, chai panitaca aliguta mingachina canguichi. Paimi shujcunatapash, ñucatapash aliguta ayudarca. Shina cajpimi pai imaguta na charijpipash, carapanguichi nini.

3Priscila shuti huarmitapash, Aquila shuti runatapash, alillachu capanguichi nijunmi nipanguichi. Paicunapash, Cristo Jesuspajta ruranapi ñucata ayudajcunami.

4Paicunami, ñucamandaca ñalla huañurca. Shinamandami, paicunataca diosolopagui nijuni. Na ñucalla chashna nijunichu. Ashtahuangarin na Israel puramanda tandanajuj crijcunapashmi, tucuicuna chashna ninajun.

5Paicunapaj huasipi tandanajuj crijcunatapash, alillachu capanguichi nijunmi nipanguichi. Epeneto shuti ñuca juyashca huauquitapash, alillachu capangui nijunmi nipanguichi. Acaya shuti llactapica, paillami Cristotaca, tucuicunapaj punda crirca.

6Cangunata aligutapacha ayudaj Mariatapash, alillachu capangui nijunmi nipanguichi.

7Andrónico shuti, Junias shuti crij ñuca huauquicunatapash, alillachu capanguichi nijunmi nipanguichi. Paicunaca, ñuca llactamandami. Paicunami, ñucahuanllata prezupash tianajurca. Paicunataca, villachun cachashca purapipash, ninandami alicachin. Shinallata paicunaca, ñucapajpash pundami Cristotaca crishca.

8Apunchi Jesusta crij cajpimi, Amplias shuti huauquitaca juyani. Paitapash, alillachu capangui nijunmi nipanguichi.

9Urbano shuti huauquitapash, alillachu capangui nijunmi nipanguichi. Paipash, Cristo Jesusmanda ñucanchita ayudajmi. Ñuca juyashca Estaquis shuti huauquitapash, alillachu capangui nijunmi nipanguichi.

10Apeles shuti huauquitapash, alillachu capangui nijunmi nipanguichi. Paimi, Cristota alipacha catijujta ricuchijun. Shinallata Aristóbulo shuti huauquipaj huasipi causajcunatapash, alillachu capanguichi nijunmi nipanguichi.

11Ñuca llactamanda Herodión shuti huauquitapash, alillachu capangui nijunmi nipanguichi. Shinallata Narciso huauquipaj huasipi causajcunatapash, alillachu capanguichi nijunmi nipanguichi. Paicunaca, Apunchi Jesusta alipacha crijcunami.

12Trifena shuti, Trifosa shuti panicunatapash, alillachu capanguichi nijunmi nipanguichi. Paicunami, Apunchi Jesuspajtaca aligutapacha ruranajun. Pérsida shuti panitapash, alillachu capangui nijunmi nipanguichi. Paipash, Apunchi Jesuspajtaca ninandami aligutapacha rurajurca.

13Apunchi Jesús agllashca Rufo shuti huauquitapash, paipaj mamatapash alillachu capanguichi nijunmi nipanguichi. Paipaj mamaca, ñucapajpash mamashnami carca.

14Asíncrito, Flegonte, Hermas, Patrobas, Hermes shuti huauquicunata, paicunahuan tiaj tucui crijcunatapash, alillachu capanguichi nijunmi nipanguichi.

15Filólogo shuti huauquitapash, Julia panitapash, Nereo shuti huauquitapash, paipaj panitapash, Olimpas shuti huauquitapash, paicunahuan tianajuj tucui Diospajlla tucushcacunatapash, alillachu capanguichi nijunmi nipanguichi.

16Caishujmanda, chaishujmandami, ima nalitapash na yarishpa muchashpa, alillachu capangui nina canguichi. Cristota crishpa caipi chaipi tandanajuj crijcunami, alillachu capanguichi nishpa cachamunajun.

17Shicanyachingapaj pandata yachachij runacunamandaca, tucui crijcunami, aliguta huacaichirina canguichi. Cangunaman yachachijpi yachajushcataca, paicunaca nalicachinllu. Chaicunahuanga, na tandanajunachu canguichi nipanimi.

18Chashnacunaca, ñucanchi Apunchi Jesucristotaca napacha servinajunllu. Ashtahuangarin paicunapaj vijsapajllami rurashpa causanajun. Paicunaca, mishqui shimicunata uyanayaita llullashpa parlashpami, nara ali yachajujcunapaj shungutaca pandachinajun.

19Canguna Diosta aliguta cazunajushcataca, tucui llactacunapimi uyanajun. Shina cajpimi, ninandapacha cushijuni. Ashtahuangarin imatapash aliguta rurangapaj alipacha yachajcuna cachunmi munani. Nalita ruranataca, na yachajunachu canguichi.

20Casilla ali causaiguta caramuj Taita Diosmi, Satanastaca ñapash cangunapaj chaquihuan sarunshna mishachingapaj ushaita caramunga. Ñucanchi Apunchi Jesucristopaj ninan juyaica, cangunahuan cachunmi munani.

21Ñucahuan villashpa purij Timoteopashmi, cangunataca alillachu capanguichi nijun. Ñuca llactamanda Lucio, Jasón, Sosípater shuti huauquicunapashmi, alillachu capanguichi ninajupan.

22Cai cartata escribimuj Tercio shuti ñucapashmi cangunataca, Apunchi Jesusmanda alillachu capanguichi nishpa cachamuni.

23Cangunataca, Gayopash, alillachu capanguichi nijunmi. Paimi, ñucataca mingachishpa charijun. Crijcunapash, tucuilla paipaj huasipimi tandanajumun. Cai pueblopaj culquita tandachishpa cuidaj Erasto shuti huauquipash, Cuarto shuti huauquipash, cangunataca alillachu capanguichi ninajunmi.

24Apunchi Jesucristopaj jatun juyaica, tucui cangunahuan cachun ninimi. Shina cachun.

Escribita tucuchijushpami, Diostaca alicachishpa mañashca

25Jesucristomanda ali villaita ñuca villashcashnallata, ashtahuan aliguta catichun cangunata shinllichijuj Diostaca alicachishunchi. Cai villajunataca, ñaupamandapachami na yachachishpa pacashpa charijushca.

26Shina cajpipash, chaitaca cunanmi ña ricuchishca. Dios ima nishcata villajcunaman Diosllata escribichishca Shimicunapi, causaita causajuj Taita Dios imashna mandashcashnallatami ricuchishca. Chaitaca, tucui llactacunapi causajcuna crishpa cazunajuchunmi ricuchishca.

27Tucuita yachaj, shujlla Taita Diosca, Jesucristomanda causaita causaicaman, punchapambagumi cangui ni tucushca cachun. Shina cachun.