ISAÍAS 58 - Quichua Imbabura Bible

Dios mandashcashna na micushpa mañanatami villajun

1“Na ashtahuan shuyashpa, cunga pactarishcata caparishpa ucha villagri. Trompetata huacachinshna, caparishpa rimagri. Ñuca agllashcacunaca, ñucata napacha cazushcata villagri. Jacobopaj huahuacuna juchata rurashcataca villagri.

2Paicunaca, punllandimi ñucataca mascanajun. Imatapash cashcatapacha rurashpa causanajunshnami, ñucamanda yachajushpa catingapaj munanajun. Paicunapaj Taita Dios mandashcatapash na saquishpa causashcashnami, aliguta ricushpa imatapash cashcatapacha paicunaman rurachun mañanajun. Taita Dios ñucapajman, ashtahuan quimiringapajmi munanajun.

3Cangunaca, ¿imashpata cashna ninguichi?: ‘Na micushpa, ñucanchi mañajpipash, canga na uyanguichu. Tucui shunguhuan llaquirishpa mañajpipash, imatapash na ricunshnami tucungui’ ninguichimi. Ricuichi, na micushpa mañana punllapica, cangunapaj shungu munashcatarami ruranguichi. Cangunapaj trabajajcunatapash, tucuicunatami llaquichishpa charinguichi.

4Ricuichi, cangunaca fiñanajushpa, caishuj chaishuj rimaringapajllami, na micushpa tianajunguichi. Maquihuan huactashpa chugrichingapajllami, chashna tianajunguichi. Canguna mañanajujta, jahua pachamanda ñuca uyachunga, cunanshnallata rurashpa catinachu canguichi.

5¿Junco nishca yurashna umata urai cumuchishpa, tucui shunguhuan llaquilla chishachunllu mandarcani? ¿Tutapash cañamuta churajushpa, uchufapi siririchunllu mandarcani? ¿Shina rurashpa, na micushpa mañanatachu agllarcani? ¿Chaitachu cangunaca: ‘Na micushpa mañana punlla, Mandaj Dios cushijuna punlla’ ninguichi?

6Ashtahuangarin ñucaca, ¿nachu caicunatara rurashpa na micushpa mañachun mandarcani? Huatashcashna charijuj jatun nalita ruranamanda cacharirichun. Imatapash apachinshna, shujcunata llaquichishpa charinata saquichun. Llaquichi tucushpa causajcunata cacharishpa saquichun. Yugota faquinshna tucui chaicunata saquichunmi mandarcani.

7¿Nachu yarjachishpa causajcunaman micunata carachun, maitapash purinajuj imagutapash na charijcunata huasipi mingachijuchun mandarcani? ¿Nachu lluchulla purijcunata ricushpapash churachijuchun, cambaj huauquita na ricungapaj, ñavita ama shujman churachun mandarcani?

8Chaita rurajpica, pacarij indishnami, candaca punchayachinga. Cambaca, quishpirinapash uchami chayamunga. Imatapash cashcatapacha can rurashcallatami, candaca ñaupashpa pushanga. Cambaj huashataca, punchapamba Mandaj Dios ñucami cuidashpa catisha.

9Shinallata canga, ñucatami mañangui. Shina mañajpimi, Mandaj Dios ñucapash candaca uyasha. Can caparijpica: ‘Caipimi cani’ nishami. Chashna canda uyachunga, yugoshna shujcunata llaquichinatapash, maquita ricuchishpa manllachinatapash, yanga juchachinatapash saquinami cangui.

10Yarjachishpa causajmambash, micunaguta carashpa, shungupi llaquilla causajtapash ayudashpa, llaquimanda llujchijpica, yana yana tutapi cajpipash, candaca punchayachingami. Cambaj yana tutapash, chaupi punllashnami canga.

11Mandaj Diosmi, candaca tucui causaipi michijunga. Chaquishca pambapi cajpipash, cambaj shungu cushijujtami caranga. Cambaj tullucunatapash shinlliyachingami. Canga, larca yacu jicharijuj huertashnami tucungui. Ima horallapash na chaquishpa llujshijuj yacushnami cangui.

12Jerusalendaca, unai huatacunata rumi mundunlla sirijujtami, cambaj gentecunaca alichinga. Ashtaca huatacunata urmashca sirijujtami, callari rumicunata churashpa cutin shayachingui. Chaita rurajpica, cangunataca: ‘T'unirishca pircacunata alichijcuna chaipi causagringapaj, ñangunata alichijcuna’ ninajungami.

Samana punllata huacaichinatami villajun

13Ñucapajlla shicanyachishca samana punllapica, imatapash can munashcata rurangapaca, na llujshinachu cangui. Ashtahuangarin chai punllataca: ‘Jucha illaj, Mandaj Dios shicanyachishca cushijuna punllami’ ninami canguichi. Chai punllata alicachishpa, ama can yarishcatalla cambaj munaita ruranguichu. Shinallata can yarishca shimicunatapash na parlashpaca,

14Mandaj Dios ñucamanda cushijuita japinguimi. Candaca, llacta urcucunamanmi, cutin vichai pushamusha. Cambaj taita Jacoboman carashca alpacunapi fucushca micunatami carasha” nishpami, Mandaj Diosca paipaj shimihuan villarca.