LEVÍTICO 24 - Quichua Imbabura Bible

Lamparacunapaj aceitetami apamuchun mandashca(Éx. 27:20-21)

1Mandaj Diosca, cashna nishpami Moisesman villajurca:

2“Israelcunataca, michata japichijpi punchayachijuchun, olivosta tacashpa llujchishca ashtahuan ali aceiteta cambajman apamuchun mandangui. Lamparacunapi churashpa japichijpi rupajushpalla punchayachijuchunmi, apamuchun mandana cangui.

3Chai lamparacunataca, ñucahuan tuparina jatun carpapimi churanga. Chaitaca Aaronmi, imashna causanata ñuca yachachishca shimicunata alichishca arca tiajuj cortina huashaman churanga. Chishimanda callarishpa, cayandi punllacaman Mandaj Dios ñuca ñaupajpi rupajuchunmi, chashna churanga. Caica, cangunapaj miraicunapash, tucui causaipi pactachinajuchun ñuca cushca shimicunami.

4Lamparacunataca, mapa illaj candelero jahuapimi, Mandaj Dios ñuca ñaupajpi japichishpa, punllandi jilapi churanga.

Diosman shicanyachishca tandamandami villajun

5Ashtahuan ali ñutu jacuta japishpami, chunga ishcai mishqui tandata rurashpa cusangui. Chai tandacunaca, tucui tandacunami ishcai kilo chaupita pezaj jacuta rurashca canga.

6Chai tandacunataca, ima mapapash illaj mezapimi, Mandaj Diospaj ñaupajpi ishcai jilata churangui. Tucui jilapimi, sucta tandata churangui.

7Shinallata tucui jilapimi, ashtahuan ali inciensotapash churangui. Shina rurajpimi tandacunapash, Mandaj Diospaj ñaupajpi imagutapash carashpa rupachijpishna, mishquillagu ashnajunga.

8Cada samana punllapimi, Mandaj Diospaj ñaupajpi chashna jilapi churajungalla. Israelcunapaj shutipimi, tucui causaipaj ari nishcata pactachishpa chashna ruranga.

9Chai tandacunaca Aaronbaj, paipaj churi curacunapajmi canga. Paicunami chai tandacunataca, Diospajlla shicanyachishca pushtupi micunga. Mandaj Diosman imagutapash cushpa rupachishcacunaca, paipajlla shicanyachishca cashcamandami, chaicunaca tucui causaipi paicunapaj canga” nijurcami.

Diosta nali shimicunata rimaj runata llaquichinatami villajun

10Chai punllacunapica Israel puramandallata, shuj huarmipaj churimi tiarca. Paipaj taitaca, Egipto llactamandami carca. Paimi, israelcunapajman rishpa, carpacunata shayachishca pushtupi, shuj Israel runahuan ninanda fiñanajurca.

11Chai Israel huarmipaj churimi, Diospaj Shutita nali shimicunahuan rimashpa ninanda nalicachijurca. Chaimandami Moisespajman pushamunajurca. Paipaj mamaca, Dan shuti aillu puramanda Dibri shuti runapaj ushi Selomit shutimi carca.

12Chai runata imata ruranatapash, Mandaj Dios mandangacamanmi, prezuna huasipi churanajurca.

13Chai jipami Mandaj Diosca, Moisesta cashna nishpa mandarca:

14“Nali shimicunata rimaj runataca, carpacunamanda canllaman llujchishpa apaichi. Chashna rimajta uyashcacunaca, chai runapaj uma jahuapi maquita tucuilla churaichi. Chai jipaca, tandanajushca tucuilla israelcunami rumicunahuan huañuchinajunga.

15Shinallata israelcunaman, cashna nishpa villangui: Paipaj Taita Diosta maijambash ninanda nalicachishpa rimaj runaca, chai nalita rurashcamandami llaquichi tucunga.

16Maijan cashpapash, Mandaj Diospaj shutita nali shimicunata rimaj runaca, huañuchi tucungapachami. Paitaca, tandanajushca tucui israelcunami, rumicunahuan huañuchinga. Shuj llactamanda runa cashpapash, llactapillata huacharishca cashpapash, Diospaj shutita nali shimicunata rimaj runaca huañungapachami.

17Shinallata maijan runapash, pita cashpapash chugrichishpa huañuchishpaca, paipash huañuchi tucuchun.

18Maijan animaltapash huañuchishpaca, chashna animaltallatami tigrachinga.

19Paipaj cumba runaguta maijambash chugrichishpaca, paipash chashnallata chugrichi tucuchun:

20Macashpa imatapash faquijpica, paitapash chashnallata faquichun. Ñavita surcujpica, paitapash ñavitallata surcuchun. Quiruta surcujpica, paitapash quirutallata surcuchun. Imashna caishujta chugrichishca cajpipash, chashnallatami paitapash chugrichinga.

21Maijan animaltapash huañuchishpaca, chashna animaltallatami tigrachinga. Ashtahuangarin shuj runata chugrichishpa huañuchishpaca, paipashmi huañuchi tucunga.

22Pactachinajuchun cushca cai shimicunatallatami, shuj llactamanda runapash, llactapillata huacharishca runapash charina canguichi. Ñucami, cangunata Mandaj Taita Dios cani” nijurcami.

23Israelcunaman Moisés villajpimi paicunaca, Diosta nali shimicunata rimaj runataca, carpacunamanda llujchishpa, rumicunahuan huañuchinajurca. Mandaj Dios imashna Moisesta mandashcashnallatami ruranajurca.