JEREMÍAS 46 - Quichua Imbabura Bible

Egipto llactata llaquichinatami villashca

1Shuj llactacunata fiñashpa llaquichinata, Mandaj Dios Jeremiasman villashca shimicunami, caipica tiajun.

2Egipto llactata llaquichinatami, caipica villajun: Josías shuti runapaj churi, Judá llactata jatun mandaj Joacim shuti runaca, ñami chuscu huatata mandajurca. Chai huatapimi, Egipto llactata jatun mandaj Necao shuti Faraondaca, Babilonia llactata jatun mandaj Nabucodonosor runaca, Eufrates yacu ladollapi tiaj Carquemis shuti pueblopi macanajushpa misharca. Chai Necao shuti runapaj soldadocunata llaquichinatami, cashna villajurca:

3“Jarcarina uchilla escudota, jatun escudota japishpa, jatun macanajuiman shamuichi.

4Caballopi tiarinacunata alichishpa tiarichi. Umapi churajuna jirruta churajuichi, lanzacunata ali fichashpa punchayachichi, jirru churajunatapash churajuichi.

5Mandaj Diosca, cashnami nin: ¿Imashpata manllarishpa huashaman tigranajujta ricujuni? Paicunapaj ninan shinlli soldadocunaca, tucui ladopi manllai tiajpimi, tigrashpapash na ricushpa, caita chaita pacajushpa calpanajurca.

6Ninanda calpaj runapash, na calpanachu, ninan shinlli runapash, na pacanachu. Eufrates yacu manñapi tiaj jahua lado llactapimi, nitijashpa urmanajurca.

7¿Pita jatun yacushna chaitaca vichai shamujun? Chai yacuca, jatun yacucunashnami cuyurimunajun.

8Egipto llacta runacunaca, jatun yacushnami jundamunajun. Chai runacunaca, jatun yacushnami cuyurinajun. Paicunaca: ‘Ñucanchi vichai rishpaca, tucui llactapimi jundashun. Pueblotapash, chaipi causajcunatapashmi tucuchishun’ ninajunmi.

9Caballopi tiarijcuna, vichai richi. Carretapi purijcuna, caparishpa ñaupashpa calpaichi. Ninan shinlli soldadocuna, jarcarina escudota apanata ali yachaj, Etiopía shuti llacta, Put shuti llacta soldadocunapash, llujshichi. Arcohuan macanajunata yachaj, Lud shuti llactamanda soldadocunapash, llujshichi.

10Ashtahuangarin chai punllapica, tucuita Mandaj Taita Dios llaquichina punllami canga. Paita fiñajcunataca, paita llaquichishcashnallata llaquichina punllami canga. Chai espadaca, langashna tucuchishpami cushijunga. Na munangacaman micushcashnami, paicunapaj yahuarhuanga machashcashna tucunga. Paicunaca, tucuita Mandaj Taita Diosman animalta cushpa huañuchishcami canga. Eufrates yacu manñapi tiaj jahua lado llactapimi, chashna tucunga.

11Egiptopi causajcunalla, jarihuan nara tacarishca cuitsashna cashpapash, Galaad shuti llactaman vichai rishpa, bálsamo nishca jambita apagrichi. Ashtahuanmi jambicunataca, mirachishpa charina cangui. Chashna charijpipash, can ali tucunaca na tiangachu.

12Canguna rimai tucushpa pingai tucushcataca, caishuj llactacunapipashmi uyarirca. Canguna caparinajushcapash, tucui cai pacha jundami uyarirca. Ninan shinlli soldadoca, caishuj shinlli soldadohuan huactarishpami, ishcandimanda urmanajurca” nishpami villajurca.

13Mandaj Diosca, pai ima nishcata villaj Jeremiastami, Babilonia llactata jatun mandaj Nabucodonosor runa shamushpa, Egipto llactata llaquinayaita tucuchinata cashna villachun mandarca:

14“Egipto llactapi villaichi. Migdol shuti pueblopipash yachachun villaichi. Menfis, Tafnes shuti pueblocunapipash yachachun, cashna nishpa villaichi: ‘Alichirishpa shayarichi. Canguna causanajuj muyunditaca, espadahuanmi langanshna tucuchinga’ nishpa villaichi.

15Shinlli torretashna rurashca cangunapaj jatun pircapash, ¿imashpata urmachi tucushca? Mandaj Dios t'angashpa shitajpimi, na shinlli shayai ushashpa urmarca.

16Ashtahuan ashtacapachami urmanajurca. Tucuicunami, paicunapaj cumbacunapaj jahuapillata urmanajurca. Shinamandami cashna ninajurca: ‘Jatariyari, ñucanchi puebloman, ñucanchi huacharishca llactaman, ñucanchita espadahuan nara mishajpillata, pacajushpa tigrashunchiyari’ ninajurcami.

17Chaipica: ‘Egipto llactata jatun mandaj Faraonga, macanajushpa mishana punllatami yanga yalichun saquishca’ nishpami caparinajurca.

18‘Jatun Mandaj ñucaca causajunipachami’ ninmi. Paipaj shutica, tucuita Mandaj Dios shutimi. Paimi, cashna nin: ‘Tucui urcucunata yali Tabor shuti urcushna, jatunmi shamunga. Mama cucha manñapi ricurijuj, Carmelo shuti urcushna jatunmi chayamunga.

19Egiptopi causajcunalla, cangunaca prezu rishpa, imatalla apanatapash ña alichinajuichilla. Menfis shuti puebloca, llaquinayaita tucuchi tucushcami canga. Chaipi causangapaca, shuj runallapash na tiangachu.

20Egiptoca, juyailla malta shicushnami. Shina cajpipash jahua lado llactamandami, tucuchij shamunajun.

21Culquipaj macanajuj soldadocunapash, virayashca shicucunashnami paicunahuan causanajurca. Paicunapashmi, huashaman tigranajurca. Tucuicunallatami, tigrashpapash na ricushpa calpanajurca. Paicunataca llaquichina punllacuna, llaquichi tucuna huatacuna chayajpimi, chashna calpanajurca.

22Paicunata fiñajcunaca, quiruta urmachijcunashna jachacunahuan shamujpimi, culebrashna silbashpa calpanajunga’ ninmi.

23Mandaj Diosca, cashnatapashmi nin: ‘Chai llaquichij runacunaca, langostacunatapash yali maitapash na cuentai ushanalla, ashtacapachami shamunga. Paicunami, na yaicui ushanalla jatun sachacunaman yaicushpa, quirucunata urmachinajunga.

24Chashnami Egiptopi causajcunaca, pingai tucunajunga. Jahua lado llactamanda gentecunapaj maquipimi, churai tucunajunga’ ninmi.

25Tucuita Mandaj, israelcunapaj Taita Diosca, cashnami nin: ‘Ricuichi, ñucaca Tebas shuti pueblopi tiaj Amón shuti diostaca llaquichigrinimi. Faraondapash, pai mandajuj Egipto llactatapash, chaipi causajcunapaj dioscunatapash, paicunapaj jatun mandajcunatapashmi llaquichigrini. Shinami Faraondaca, paita yariajlla causajcunandi llaquichisha.

26Paicunata huañuchingapaj mascajcunapaj maquipimi churasha. Babilonia llactata jatun mandaj Nabucodonosor runapaj maquipi, chai jatun mandajta servijcunapaj maquipimi churasha. Shina cajpipash chai jipaca, punda punllacunashnallatami Egiptopillata causanajunga’ ninmi Mandaj Diosca.

27‘Jacobopaj mirai ñuca servijcunalla, na manllanachu canguichi. Israelcunalla, shaijushcashnaca na tucunachu canguichi. Ricuichi, ñucami cangunataca, carupi cajpipash quishpichisha. Cangunapaj miraicunatapash, prezu apai tucushca causanajuj llactacunamandaca tigrachimushami. Shina tigrachimujpimi, Jacobopaj miraicunaca samanajunga. Paicunaca, imapipash alimi llujshinajunga. Paicunataca, pipash na manllachijpimi causanga.

28Jacobopaj mirai ñuca servijcunalla, na manllanachu canguichi. Ñucami, cangunahuan cani. Cangunata, ñuca llujchishpa caita chaita cachashca tucui llactacunataca tucuchigrinimi. Shina tucuchishpapash cangunataca, na tucuilla tucuchishachu. Ashtahuangarin cangunataca, llaquichina cashcatapachallami llaquichisha. Cangunataca, na llaquichishpaca na saquishachu’ ninmi Mandaj Diosca” nishpa villachunmi mandarca.