ÉXODO 13 - Quichua Imbabura Bible

Punda huacharishcacunataca, Diosmanmi shicanyachishca

1Mandaj Diosca, Moisesmanmi cashna nishpa villarca:

2“Punda huacharishca tucui jari huahuacunataca, ñucapajlla cachunmi shicanyachina canguichi. Israel puracunapi maijan cashpapash, punda huahuata ungujpica, gentecunapaj cashpa, aninalcunapaj cashpapash ñucapajmi” nircami.

3Shina nijpimi Moisesca, israelcunataca cashna nijurca: “Cai punllataca, yarinami canguichi. Cai punllami cangunaca, Egiptopi gañan causanajujmanda llujshimushcanguichi. Caimandaca, Mandaj Diosmi ninan ushaita charij paipaj maquihuan llujchishca. Shinamandami levadurahuan rurashcataca, na micuna canguichi.

4Cangunaca, Abib shuti quillapimi cunan llujshinajunguichi.

5Cananeo, heteo, amorreo, heveo, jebuseo nishca gentecuna causanajuj llactamanmi, Mandaj Diosca chayachinga. Cambaj ñaupa taitacunamanmi, lechepash, balun mishquipash ashtacapacha tiaj llactata carashapachami nishpa juramenturca. Chai llactaman chayachijpica, cai jatun micuitaca, cai quillapimi rurana cangui.

6Canchis punllacamanmi, levadura illaj tandata micuna cangui. Canchis punlla tucujpica, Mandaj Diospaj fiesta punllami canga.

7Canchis punllacamanmi, levadura illaj tandata micunajunga. Ima micunatallapash, levadurahuan rurashcataca na ricunguichu. Tucui cambaj llactapica, ima levadurapash na tiangachu.

8Chai punllacunami, cambaj churimambash cashna nishpa parlangui: ‘Caitaca Egiptomanda, Mandaj Dios llujchimushpa alita rurashcamandami cashna rurani.

9Caica, cambaj maquipica, shuj ricuchinashnami canga. Mandaj Dios mandashca shimica, cambaj shimipi cachunmi, cambaj ñaupajpipash yarichina canga. Mandaj Diospaj ninan ushaita charij maquihuan Egiptomanda canda llujchishcamandami chashna canga.

10Shina cashcamanda imashna rurachun mandashcataca, ima huata ruranapillata huatan huatan rurashpa pactachingui’ nishpa parlangui.

11Mandaj Diosca, canmambash, cambaj ñaupa taitacunamambash, cananeocuna causanajuj llactata carashapachami nishpa juramentushcashnami, chai llactaman chayachinga. Shina chayachijpica,

12punda huacharishca tucui churicunatami, Mandaj Diosman cuna cangui. Shinallata punda huachashca, tucui jari animalcunatapashmi cuna cangui. Jaricunaca, Mandaj Diospajmi canga.

13Ashtahuangarin punda huacharishca huahua burropaj randica, shuj maltun llamatami cuna cangui. Burromanda llamata cungapaj na munashpaca, chai burropaj cunga tullutallami faquina cangui. Shinallatami, cambaj churicunamanda punda churipaj randipash cuna cangui.

14Jipa punllacunapi cambaj huahuacuna: ‘¿Imashpata chashna rurangui?’ nishpa tapujpica, cashna ningui: ‘Mandaj Diosca, paipaj ninan ushaita charij maquihuanmi, Egiptopi gañan causanajujpi llujchimurca.

15Ñucanchi llujshichun ama saquingapajmi, Faraonbash shinlli shungu tucurca. Chaimandami Mandaj Diosca, Egipto llactapica, punda huacharishca churicunamanda callarishpa, punda huacharishca jari animalcunatapash huañuchirca. Chaimandami ñucaca, tucui punda huacharishca jari animalcunata, Mandaj Diosman cushpa huañuchijuni. Shinallata ñucapaj churicunamanda punda churipaj randimi, caitaca cujuni.

16Caica, cambaj maquipica, shuj ricuchinashnami canga. Cambaj ñavipipash, yarichingapajmi canga. Mandaj Diospaj ninan ushaita charij maquihuan Egiptomanda llujchimushcamandami chashna canga’ ningui” nijurcami.

Fuyupash, ninapash pilarshnallami ricurishca

17Israelcunata, Faraón richun saquishca jipaca, Taita Diosca filisteocunapaj ladolla ñan tiajpipash, chai ñandaca na pusharcachu. Taita Diosca, cashnami yajurca: Maipipash jatun macanajui tiajta israelcuna ricushpa ama manllarishpa, Egiptoman ama tigrachunmi, chai ñandaca na pushasha yajurcami.

18Ashtahuangarin Taita Diosca, israelcunataca Puca Cuchaman rina jichushca pamba ñanda muyunajuchunmi pusharca. Israelcunaca, Egiptomandaca macanajunacunahuan alichirishcacunami vichai shamunajurca.

19Moisesca, Josepaj tullucunatapashmi apamunarca. Josemi, israelcunataca cashna nishpa juramentuchishca carca: “Taita Diosca, cangunata ricuj shamungapachami. Shina shamujpica, ñuca tullucunatapash apashpa vichai ripanguichilla” nishcami carca.

20Israelcunaca, Sucot shuti pueblomanda llujshishpaca, jichushca pambaman yaicunalla Etam shuti pushtupimi, carpacunata shayachishpa tianajurca.

21Mandaj Diosca, paicunata ñaupashpami punllapica, shuj pilarshnalla fuyuhuan paicunata ñanda pushashpa rijurca. Tutaca, shuj pilarshnalla ninahuanmi, paicunata punchayachishpa pushajurca. Punllapash, tutapash rinajuchunmi chashna rurajurca.

22Israelcunapaj ñaupajmandaca, punllapi pilarshnalla fuyupash, tutapi pilarshnalla ninapash ima horallapash na anchurircachu.