1Mandaj Dioslla, ñucata jatunyachishcamandami,
candapash alicachisha.
Ñucata fiñajcuna cushijuchumbash, na saquircanguichu.
2Ñucata Mandaj Taita Dioslla, canda caparishpa
mañajpimi, huañujujtapash alichihuarcangui.
3Mandaj Dioslla, ñuca almataca
Seolmandami vichai llujchihuarcangui.
Pambana utujuman ama richunmi,
causaita cuhuarcangui.
4Mandaj Diospajlla causajcunaca, paita candaichi.
Pai jucha illaj cajta yarishpa cushijuichi.
5Pai ninanda fiñarinaca, ashacamanllami canga.
Ashtahuangarin pai juyanaca,
tucui causaipajmi canga.
Tutaca, huacana tiajpipash,
tutamandaca cushijuimi shamunga.
6Ñuca ali causajushpaca: “Pipash na
cuyuchihuangachu” yajurcanimi.
7Ashtahuangarin Mandaj Dioslla, can juyashpallami
ñucataca jatun urcutashna, pipash
na cuyuchi ushanallata rurahuarcangui.
Cambaj ñavita pacajpica musparijurcanimi.
8Mandaj Dioslla, candaca caparishpa mañajushallami.
Jatun Diostami, cutin cutin mañajushalla.
9Ñuca huañujpi, pambana utujuman
urai rishpaca, ¿imapajshi ali canga?
¿Ñutu alpaca, canda alicachingachu?
¿Can na llullaj cajtapash villangachu?
10Mandaj Dioslla, ñuca mañashcata
uyashpa, ñucata llaquihuayari.
Mandaj Dioslla, ñucata ayudaj cahuayari.
11Ñuca huacajushcataca, cushijushpa
bailanamanmi tigrachihuarcangui.
Cañamu churajunatapash surcuchishpami,
cushijui churajunata churachihuarcangui.
12Ñucata punchayachijlla.
Shinamandami candaca candajushalla,
na upalla quedashachu.
Ñucata Mandaj Taita Dioslla, tucui causaipi
candaca alicachijushallami.
Who We AreWhat We EelieveWhat We Do
2025 by iamachristian.org,Inc All rights reserved.
