2 SAMUEL 11 - Quichua Imbabura Bible

Davidmandapash, Betsabemandapashmi villajun

1Chai cati huatami, cashna tucurca: Jatun mandajcuna macanajuiman llujshina punllacunami Davidca, Joabtapash, paita servijcunatapash, tucuilla israelcunandi, amonitacunata huañuchishpa tucuchinajuchun cacharca. Shina cachajpimi, amonitacunataca tucuchinajurca. Shinallata Rabá shuti pueblota japingapajmi, chaupipi churanajurca. Ashtahuangarin Davidca, Jerusalenbimi quedarca.

2Shuj punllami, cashna tucurca: Ña chishajujpimi Davidca, pai sirijushca camamanda jatarishpa, mandashpa tiajuna huasi jahua patiopi purijurca. Chai huasi jahua patiomandami, shuj huarmi armajujta ricurca. Chai huarmica, juyaillagupachami carca.

3Chaimandami Davidca, chai huarmimanda tapuchun cacharca. Shina tapujpimi: “Chai huarmica, Eliam shuti runapaj ushi Betsabé shuti huarmimi. Paica, heteopura Urías shuti runapaj huarmimi” nishpa villanajurca.

4Chaimandami Davidca, villaj runacunata cachajpi, chai huarmita pushamurca. Ña paipajman pushamujpimi, chai huarmihuan puñurca. Chai jipami chai huarmica, pai mapayashcamanda armashpa, alichirishpa paipaj huasiman tigrarca.

5Chai huarmica, vijsayu tucushca cashpami: “Vijsayu tucushcanimi” nishpa, Davidman villachun cacharca.

6Chaimandami Davidca: “Heteopura Urías runata cachamui” nishpa, Joab runapajman cacharca. Shina cachajpimi Joab runaca, Uriastaca Davidpajman cachamurca.

7Urías runa paipajman ña chayajpimi Davidca, cashna tapurca: “¿Joab runaca alillachu, gentecunapash alillachu? ¿Chai macanajuipica, imata tucujun?” nirca.

8Chai jipami Davidca, Urías runataca: “Cambaj huasiman urai rishpa, chaquita maillagri” nishpa cacharca. Jatun mandaj mandana huasimanda, Urías runa llujshishpa rishca jipami, jatun mandajca, paipaj mezamanda micunata carachun cacharca.

9Ashtahuangarin Urías runaca, paipaj huasiman na urai rishpami, paita mandajpaj tucui servijcunandi, jatun mandaj mandana huasi pungu ladopi puñurca.

10Chaitami, Davidman cashna nishpa villanajurca:

—Uriasca, paipaj huasiman na urai rishcachu— ninajurcami.

Shina nijpimi Davidca, Urías runataca:

—¿Nachu carumanda shamurcangui? ¿Imashpata na cambaj huasiman urai rircangui?— nishpa tapurca.

11Shina tapujpimi Urías runaca, Davidtaca cashna nirca:

—Diospaj arcapash, israelcunapash, Judá llacta runacunapash, carpacunapillami tianajun. Ñucata mandaj Joab runapash, can jatun mandajta servijcunapash, pambapillami puñunajun. ¿Chaita yachashpatachu micushpa, ufiashpa ñuca huarmihuan puñungapaj huasiman rina carcani? Cambaj almamandapash, cambaj almapaj causaimandapashmi nini, napacha chaitaca rurashachu— nircami.

12Shina nijpimi Davidca, Urías runataca cashna nirca:

—Shina cashpaca, cunanga caipi quedailla, cayapaj ringuillami— nirca.

Shina nijpimi Urías runaca, chai punllapash, cayandi punllapash Jerusalenbi quedarca.

13Chaipimi Davidca, chai runataca paihuan micuchun, machangacaman ufiachun cayarca. Ña chishajpimi Urías runaca, Davidta servijcunandi paipaj camapi puñungapaj rirca. Ashtahuangarin paipaj huasimanga, na urai rircachu.

14Chai cayandi tutamandami Davidca, Joab runaman shuj cartata escribirca. Chai cartataca, Urías runatami saquigrichun cacharca.

15Chai cartapica, cashna nishpami escribirca: “Uriastaca, ashtahuan shinlli macanajunajuj ñaupajpi churaichi. Chai jipaca, chai macanajuipi chugrichi tucushpa huañuchun, paitalla saquishpa huashaman suchuringuichi” nishpami escribirca.

16Chashnami Joab runaca, macanajungapaj pueblo muyundipi shayarirca. Maipi ashtahuan shinlli runacuna shayajujta ricushpami, chai ñaupajpi Uriastaca shayachirca.

17Chai jipami, pueblopi causajcunaca, Joab runahuan macanajungapaj llujshirca. Chaipimi Davidta servishpa macanajuj soldadocunapash, taucacuna huañurca. Shinallata heteopura Urías runapashmi huañurca.

18Chaimandami Joab runaca, chai macanajuipi imalla tucushcata David yachachun, villachun cacharca.

19Villangapaj rij chai runataca, cashna nishpami cacharca: “Cai macanajuipi tucui imalla tucushcata, jatun mandajman can tucuita villashpa tucuchijpi,

20jatun mandaj imashpapash fiñari callarishpaca, cashnami ninga: ‘¿Imashpata macanajungapaca, puebloman yapata quimirircanguichiyari? Pirca jahuamandaca, imata cashpapash cacharishpa huañuchijtaca, ¿nachu yachanguichi?

21Jerobaal shuti runapaj churi Abimelec runataca, ¿pita huañuchirca? ¿Nachu cutana rumi faquirishcata, pirca jahuamanda shuj huarmi cacharijpi, Tebes shuti pueblopi huañurca? ¿Imashpata pirca ladoman yapata quimirircanguichiyari?’ nijpica: ‘Canda servij, heteopura Urías runapashmi huañurca’ ningui” nircami.

22Villangapaj rij runa Davidpajman chayashpaca, Joab runa imatalla villangui nishcatami tucuita villarca.

23Villangapaj rij runaca, cashnami Davidman villajurca:

—Ñucanchihuan macanajungapaj pambaman llujshimuj runacunaca, ñucanchihuanga ninandapachami macanajurca. Ashtahuangarin ñucanchi mishashpami, puebloman yaicuna pungu ladocaman tigrachircanchi.

24Shina cajpipash, flechata cacharij runacuna, pirca jahuamanda canda servijcunapajpi cacharijpimi, can jatun mandajta servijcunaca, taucacuna huañurca. Shinallata canda servij, heteopura Urías runapashmi huañurca— nishpami villajurca.

25Shina villajpimi Davidca, chai runataca cashna nirca:

—Joab runataca, cashna ningui: ‘Ama chaimandaca, ninanda llaquirichu. Espadaca, huaquimbica caishuj ladota, huaquimbica chaishuj ladotami tucuchin. Chai pueblopi causajcunataca, paicunata mishangacaman ashtahuan shinlli tucushpa macanajunguilla’ nircami ningui. Cambash, ali yuyaicunata cungui— nishpami cacharca.

26Urías runapaj huarmica, paipaj cusa Urías huañushcata yachashpami, llaquirishcata ricuchij yana churajunata churajurca.

27Yana churajunata churajuna punllacuna ña yalijpimi Davidca, chai huarmita paipaj huasiman pushamuchun cacharca. Shina cachashpa pushamujpi, paipaj huarmi tucushpami, shuj jari huahuata ungurca. Ashtahuangarin David chashna rurashcapash, Taita Diospaj ñaupajpica nali ricurircachu.