1 JUAN 4 - Quichua Imbabura Bible

Taita Diospaj Espiritumandapash, Cristota fiñaj runapaj espiritumandapashmi villajun

1Juyashca crijcuna, espirituta charinchimi nishpa villajcunataca, na tucuicunata crinallachu canguichi. Ashtahuangarin Taita Diospaj Espirituta charijta, na charijtapash, alipacha rijsinarami canguichi. Cai pachapica, llullashpa villajcunaca, ashtacacunami purinajun.

2Taita Diospaj Espíritu yarichijpi villajcunaca: “Jesucristoca, runa aichayu tucushpami shamurca” ninajunmi. Chashna nishpa villajpillami, Taita Diospaj cajtaca, yachai ushanguichi.

3“Jesucristoca, na runa aichayu tucushpa shamushcachu” nishpa villajcunaca, napacha Taita Diospajchu. Ashtahuangarin Cristota fiñaj runapaj espíritu yuyaita cujpimi, chashna villanajun. Chashnacuna shamunajujtaca, cangunallata uyashcanguichimi. Cunanga, ñamari cai pachapi purinajun.

4Juyashca huahuacuna, cangunaca Taita Diospaj cashpami, paicunataca mishai ushashcanguichi. Cangunapi causajuj Diosca, cai pachapajtalla rurachishpa mandajuj diablota yali ushaita charijpimi, chashna mishashcanguichi.

5Chaicunaca, cai pachamandallami. Shinamandami, cai pachapi imapash tiajmandalla villanajun. Paicunataca, cai pachapajtalla rurashpa causajcunallami uyan.

6Ñucanchica, Taita Diospajmi canchi. Taita Diosta maijambash rijsishpaca, ñucanchi villajujta uyanmi. Na Taita Diospaj cashpaca, ñucanchi villajujtaca na uyanayachinllu. Shinamandami, Diospaj Espíritu yuyaita cujpi na llullashpa villajtapash, pandachishpa villachijuj espirituta charijtapash yachanchi.

Taita Diosca, ninanda juyajmi

7Juyashca crijcuna, caishujhuan chaishujhuan ninanda juyarishpa causashunchi. Juyarishpa tucui causanaca, Taita Diospajmi. Juyarishpa causajcunaca tucuillami, Taita Diospajlla huacharishca huahuacuna tucushca. Paicunaca, Taita Diostapash rijsinmi.

8Na juyashpa causashpaca, Taita Diostaca na rijsinllu. Taita Diosca, ninandapacha juyajmi.

9Causaita causagrinata ñucanchi japigrichunmi Taita Diosca, paipaj shujlla Churita cai pachaman cachamushpa, ñucanchita juyajushcata ricuchirca.

10Ñucanchica, Taita Diosta na juyashpami causarcanchi. Ashtahuangarin pairami ñucanchita juyarca. Paillatami, paipaj Churita ñucanchi juchacunata anchuchingapaj huañuchun cachamurca. Shina cachamushpami, ñucanchita juyajushcataca ricuchijun.

11Juyashca crijcuna, ñucanchitaca Taita Diosmi ninanda juyajushca. Shinamandami ñucanchipash, caishujhuan chaishujhuan ninanda juyarishpa causana canchi.

12Taita Diosca, pipaj ñavipipash ima horapash na ricurishcachu. Ashtahuangarin caishujhuan chaishujhuan juyarishpallami, Taita Dios ñucanchi shungupi causajujtaca yachanchi. Shina causajpimi Diospaj juyaica, ashtahuan ashtahuan ñucanchipi aliguta ricuriajun.

13Dios paipaj Espirituta ñucanchiman cujpimi, Dioshuan ñucanchica causajushcata, paipash ñucanchi shungupi causajujtaca yachanchi.

14Taita Diosca, cai pachapi causajcunata Quishpichij cachunmi, paipaj Churitaca cachamurca. Chaitaca, ñucanchillata ricushcapacha cashpami villanajunchi.

15“Jesusca, Taita Diospaj Churimi” nishpa, tucui villajcunapaj shungupillami, Taita Diosca causajun. Paicunapash, Taita Dioshuanmi causanajun.

16Taita Dios ñucanchita juyajujtaca yachanchimi. Taita Diosca, ñucanchita ninandapacha juyajujtami crishcanchi. Taita Diosca juyajpachami. Maijambash juyaita charishpaca, Taita Dioshuan shujlla tucushpami causajun, Taita Diospash paipaj shungupimi causan.

17Aligutapacha juyarishpa causashpallami, gentecuna imata rurashpa causashcata Cristo ricuchijui punllapica, na manllashpa cushijushun. Ñucanchipash cai pachapica, Jesucristo causajunshnami causanajunchi.

18Dios juyajpi causajcunaca, imatapash na manllanllu. Ñucanchi ama manllashpa causachunmi, paica ninandapacha juyajun. Manllashpa causajushpaca, llaquichi tucunatami charin. Maijambash manllaihuan cashpaca, juyaita nara aligutapacha charishcachu.

19Diosra ñucanchita juyajujpimi, ñucanchipash paitaca juyanchi.

20“Taita Diosta juyanimi” nijushpapash, shuj crijta millanayachishpaca, llullajunmi. Chai crijta ñavihuan ricujushpapash, na juyashpaca, ñavipi na ricurij Taita Diostacarin, ¿imashnata juyai ushangayari?

21“Taita Diosta juyaj cashpaca, shuj crijtapash juyanguichi” nishpami, Cristoca ñucanchita mandarca.