EZEQUIEL 10 - Quichua Imbabura Bible

Diospaj punchapambagumi, Diospaj huasimanda anchurishca

1Querubín nishcacunapaj uma jahuapi shicanyachijuj pushtupica, zafiro nishca rumitashnallami ricurcani. Chai jahuapi ricurijujca, mandangapaj tiarinaman rijchajmi carca.

2Lino churajunata churajushca runataca, cashnami nirca: “Querubingunapaj ucupi tiajuj rueda chaupiman yaicui. Chai querubingunapaj chaupipi rupajuj carbón ninayashcata maqui jundata japishpa, pueblo jahuapi chafsishpa shitai” nijpimi, chai runaca ñuca ricujta yaicurca.

3Chai runa yaicujujpica, querubingunaca chai huasi ali ladomanmi carca. Shinallata chai huasi ucu patiopica, fuyumi jundajurca.

4Shinamandami Mandaj Diospaj punchapambaguca, querubinbaj jahuamanda anchurishpa, pungu umbralman rirca. Chai huasipica, fuyu jundami carca. Shinallata patiopash, Mandaj Diospaj punchapamba punchayachijujhuanmi jundarca.

5Chai querubingunapaj alascuna culun nishcapash, Tucuita Rurai Ushaj Dios caparishpa rimashcashnami, canlla patiocaman shinllipacha uyarirca.

6Chaipimi, cashna tucurca: Lino churajunata churajushca runataca: “Querubingunapaj rueda chaupimanda ninata japi” nishpa cachajpimi, ninata japingapaj yaicushpa, rueda chaupipi shayarirca.

7Chai querubingunapaj chaupimanda shuj querubinga, paicunapaj chaupipi tiaj ninata japishpami, lino churajunata churajushca runapaj maquipi churarca. Chai runaca, ninata japishpami, llujshishpa rirca.

8Querubingunapaj alas ucupica, runapaj maquishnallami ricurirca.

9Querubingunapaj ladopica, chuscu ruedatapashmi ñapash ricurcani. Tucui querubinbaj ladopimi, shuj ruedahuan carca. Chai ruedacunaca, crisólito nishca rumiman rijchajmi carca.

10Chai ruedacunaca chuscundimi, chashnallata carca. Chai rueda ucupillata, shuj ruedata quinraiman churashcashnallami carca.

11Chai ruedacuna purishpaca, chuscundi ladomanmi rin carca. Maijan ladoman ringapajpash, na tigrarinllu carca. Ashtahuangarin punda rueda maiman rijpipash, caishuj ruedacunapash catinajurcallami. Maijan ladoman rijushpapash, na tigrarinllu carca.

12Chai querubingunapaj tucui cuerpopipash, huashapipash, maquipipash, alascunapipash, ruedacunapipash, ñavicunalla jundami carca. Chuscundi ruedacunapimi, chashnallata carca.

13Chai ruedacunataca, ñuca uyajtami: “¡Rueda!” nishpa caparirca.

14Chai querubingunaca, tucuicunami chuscu ñavita charirca. Shuj lado ñavica, querubinbaj ñavimi carca. Caishuj ladopica, runapaj ñavimi carca. Caishuj ladopica, leonbaj ñavimi carca. Caishuj ladopica, jatun angapaj ñavimi carca.

15Chai querubingunaca jatarircallami. Chaicunaca, Quebar shuti jatun yacu manñapi ñuca ricushca, causaita charijcunallatami carca.

16Chai querubinguna purijpica, ruedacunapash paicunahuanmi purinajurca. Shinallata chai querubinguna, alpamanda jahuata jataringapaj paicunapaj alasta pascajpica, ruedacunapash paicunamandaca na anchurircachu.

17Paicuna shayarijpica, ruedacunapash shayarinllami carca. Paicuna jahuata jatarijpica, ruedacunapash paicunahuanmi jahuata jatarinajurca. Chai causaita charijcunapaj espiritullatami, ruedacunapipash carca.

18Chai jipami, Mandaj Diospaj punchapambaguca, huasi umbral jahuamanda jatarishpa, querubingunapaj jahuapi tiarirca.

19Ñuca ricujtami querubingunaca, alascunahuan jahuata jatarishpa, alpamanda rinajurca. Paicuna jahuata jatarishpa rijpica, ruedacunapash jatarishpami, paicunahuan rinajurca. Paicunaca, indi llujshimuj ladota yaicuna, Mandaj Diospaj huasi pungupimi shayarinajurca. Shinallata israelcunapaj Taita Diospaj punchapambaguca, paicunapaj jahuapimi carca.

20Chaicunaca, Quebar shuti jatun yacu manñapi israelcunapaj Taita Dios tiajuj ucupi ñuca ricushca causaita charijcunallatami carca. Chaimandami, querubingunallata cajta rijsircani.

21Tucuicunallatami chuscu ñavita, chuscu alasta charirca. Shinallata paicunapaj alas ucupica, runapaj maquiman rijchajmi carca.

22Paicunapaj ñavicuna, cuerpocunaca, Quebar shuti jatun yacu manñapi ñuca ricushcashnallatami carca. Tucuicunallatami, maiman rishpapash na quingushpa, ñaupajmanlla ricushpa purinajurca.