ISAÍAS 10 - Quichua Imbabura Bible

1Napash mandashca shimicunata churashpa mandajcunalla, ¡aij imachari tucunguichi! Cangunaca, llaquichinajuchunllami mandanguichi.

2Imagutapash na charijcunata llaquipi churangapaj, llaquipi causaj ñuca agllashcacuna japina cashcata quichungapajmi, chashna ruranguichi. Sapalla mamagucuna imatalla charishcatapash quichungapaj, taita mama illaj huahuacunapaj imalla tiashcatapash shuhuangapajmi, chashna ruranguichi.

3Llaquichina punlla chayamujpica, ¿imatashi ruranguichi? Llaquinayaita cangunata tucuchingapaj caru llactamanda shamujpi ayudachunga, ¿pitashi agllanguichi? Imatapash juyailla canguna charishcataca, ¿maipishi saquinguichi?

4Cangunaca, ñuca illajpica, prezu apai tucuj puracunahuanmi ringuichi. Huaquingunaca huañuchi tucunguichimi. Chashna llaquichishpapash Mandaj Diosca, ninanda fiñarishcamandaca, nara ali tucungachu. Ashtahuangarin llaquichingapaj, paipaj maquita chutashcarami canga.

Taita Diosca, Asiria llacta runacunahuanmi llaquichinga

5“Asiria llactalla, ñuca ninanda fiñarishpa, macana varashna, astina angushnami cangui. Ñuca fiñarishcataca, cambaj maquipimi churani.

6Nalita rurajcuna causanajuj llactata llaquichijuchun, ñuca ninanda fiñashca gentecunata llaquichijuchunga, Asiria llactatami cachasha. Paimi, tucui imatalla charishcatapash quichushpa, tucuilla apashpa, ñambi sirij turutashna sarujunga.

7Paica, chashna rurajujtaca na yangachu. Paipaj shungupipash chashnataca, yaritallapash na yaringachu. Paica, ashtaca llactacunata tucuchishpa chingachinatallami yarijunga.

8Paica cashnami nijun: ‘Ñuca churashca mandajcunaca, ¿nachu tucuicuna jatun mandajcuna?

9Ñucapaca, Calno shuti puebloca, Carquemis shuti puebloshnallatami. Hamat shuti pueblopash, Arfad shuti puebloshnallatami. Samaria pueblopash, Damasco puebloshnallatami.

10Ñucaca, Jerusalenbi, Samariapi tiashca yanga dioscunatapash yali ashtaca dioscunata jundachishca llactacunatami japircani.

11Samaria pueblotaca, chaipi tiaj paipaj yanga dioscunandimi tucuchircani. ¿Nachu chashnallata Jerusalendapash, chaipi tiaj paipaj yanga dioscunandi tucuchisha?’ nijunmi” nihuarcami.

12Shina cajpipash, Sion urcupi Jerusalén pueblota, imatalla ruranata Jatun Dios rurashca jipami, cashna tucunga: Asiria llactata jatun mandajtaca, imata cashpapash, paipaj shungupi jariyashpa rurashcamandami llaquichinga. Shinallata ñavitapash alsashpa cushijushcamandami llaquichinga.

13Asiria llactata jatun mandajca, cashnami nijurca: “Ñuca ushaihuan, ñuca ali yachaihuanmi caitaca rurani. Ñucaca, alipacha yachajushcami cashcani. Cai tucui gentecunapaj llactacunatapash, paicuna imatalla charishcatapashmi quichurcani. Mandashpa tiajuj jatun mandajcunatapash, ninan shinlli runacunashnami, fangalla misharcani.

14Chai gentecuna imatalla charishcacunataca, shuj tazindashnami tarircani. Tucui chai llactacunataca, jichushpa saquishca lulungunata tandachinshnami japircani. Chashna japijujpipash, ima animalpash na alascunahuan huactashpa, huacashpa mitsarcachu” nijurcami.

15¿Jachaca, chai jachahuan chijtajuj runata yalishpa jariyai ushanllu? ¿Sierrapash, chai sierrahuan cuchuj runata yalishpa jariyai ushanllu? Shina cashpaca, tauna caspipash, paita apajuj runatarami apai ushanman. Shinallata yamda varapash, napash yamda cajpita apai ushanmanllami.

16Shinamandami, tucuita Mandaj Jatun Diosca, alipacha racu runacunataca, imatapash na rurai ushajcunata saquinga. Paicuna punchapamba cajtapash, ucumanda ninata japichishpami tucuchinga.

17Israelcunapaj michaca, ninami canga. Paicunapaj jucha illaj Diosca, rupajuj ninami canga. Chai ninami, nali jihuacunata, cashacunata rupachishpa, shuj punllapilla tucuchinga.

18Paicunapaj juyailla bosquecunapash, ali fucuj pambacunapash, almandi, cuerpondimi tucuilla chinganga. Banderata apaj runa, jatun macanajuipi mishai tucushcashnami canga.

19Bosquepi huaquinlla puchushca quirucunataca, uchilla huahuapash cuentai ushangallami.

20Chai huatacunapica, cashnami tucunga: Israel puramanda puchushcacuna, Jacobopaj huasi ucu puramanda puchushcacunaca, na ashtahuan paicunata llaquichijcunata yariashpa causanajungachu. Ashtahuangarin israelcunata Mandaj, jucha illaj Diostallami, tucui shunguhuan yariashpa causanajunga.

21Jacobopaj mirai puramanda huaquinlla puchushcacunaca, ninan ushaita charij, Taita Diospajmanmi tigraringa.

22Israel llactalla, cambaj gentecunaca mama cucha manñapi tiaj t'iyu alpashna cashpapash, huaquinllami tigramunga. Cangunata llaquichingapaj Dios yarijushca llaquita cachamushpaca, imatapash cashcatapachami ruranga.

23Tucui cai llactapi causajcunata llaquichingapaj, tucuita Mandaj Jatun Dios yarishcataca rurangapachami.

24Tucuita Mandaj Jatun Diosca, cashnami nin: “Sion shuti pueblopi causanajuj ñuca agllashca gentecunalla, Asiria llacta soldadocunataca, na manllanachu canguichi. Paicunaca, Egiptopi causajcunashnallatami varahuan chugrichishpa, caspihuan macashpa llaquichinajunga.

25Ashtahuangarin cunanmanda asha punlla jipaca, ninanda ñuca fiñarishcapash tucuringami. Chai jipaca, paicunatami tucuchisha.

26Tucuita Mandaj Dios ñucaca, Oreb shuti jatun rumi jaca ladopi, madianita runacunata huañuchishcashnami, paicunataca huañuchisha. Egipto llacta runacunata, ñuca varata alsashpa jatun yacupi pambashcashnallatami, paicunatapash tucuchisha.

27Chai punllacunapica, cashnami tucunga: Cangunapaj rigrapi apachishcashna llashachijuj llaquitaca anchuchishami. Cangunapaj cunga tullupi paicuna apachishca llashaj yugotapashmi anchuchisha. Ñuca aceiteta umapi talishcamandami, chai yugoca ñuturinga” ninmi.

28Ajat shuti pueblocaman chayamushpami, Migrón shuti puebloman yalishpa rirca. Micmas shuti pueblopimi, soldadocunataca cuentanga.

29Chimbai ushanalla huaicuta chimbashpami, Geba shuti pueblopi pacarirca. Ramá shuti pueblopi causajcunaca chujchunajurcami. Saúl runapaj Gabaa shuti pueblomandapash, pacajushpami calpanajurca.

30Galim shuti pueblopi causaj huarmicunalla, Lais shuti puebloman uyarijta ninanda caparichiyari. Anatot shuti pueblopi causajcunapash, llaquinayaimari canguichi.

31Madmena shuti pueblopi causajcunapash, manllarishpami caparinajun. Gebim shuti pueblopi causajcunapash, pacajungapajmi calpanajun.

32Nob shuti puebloman shamushpa, samana punlla chayamungarami. Chai pueblomandami, Jerusalenbi tiaj Sion urcupi causajcunapaj loma ladoman maquita vichai churanajunga.

33Ricuichi, tucuita Mandaj Jatun Diosca fiñarishpami, jatun quiru malquicunataca ñapash fitinga. Jatun quirucunapash, fiti tucungami. Jatun tucushcacunaca, pingaichi tucungami.

34Jatun quirucuna junda bosqueman jachahuan yaicushpami urmachinga. Líbano shuti urcu quirucunaca, culun nishpami urmanga.