ISAÍAS 6 - Quichua Imbabura Bible

Muscuipishna ricurishpami, Isaiasta cayashca

1Jatun mandaj Uzías shuti runa huañushca huatapimi, ñucaca Jatun Diostaca shuj jatun tiarinapi tiajujta ricurcani. Chaipi tiajujpimi, paipaj jahualla churajunapash, Diospaj huasi ucu junda mandarishca carca.

2Paipaj vichaipica, sucta alasyu serafín nishca angelcunami tiarca. Chai angelcunaca, ishcai alascunahuanga, paicunapaj ñavitami quilparinajurca. Caishuj ishcai alascunahuanga, paicunapaj chaquitami quilparinajurca. Shinallata caishuj ishcai alascunahuanga, jahuatami rinajurca.

3Chai angelcunaca, caishuj chaishujmi cashna ninajurca: “Jucha illaj, jucha illaj, jucha illaj, tucuita Mandaj Diosmi. Tucui cai pachaca, paipaj punchapambahuan jundami” ninajurcami.

4Chashna caparinajujpica, Diospaj huasi pungucunata charijuj pungucunapash chujchurcami. Huasi ucupica, cushnimi jundarca.

5Chaita ricushpami, cashna yajurcani: “¡Aij ñucalla, huañugrinimi! Ñucaca, mapa shimicunata rimaj runami cani. Mapa shimicunata rimaj runacunapaj chaupipimi causani. ¿Chashna runa cashpatachu, tucuita Jatun Mandaj Diostaca, ñuca ñavihuambacha ricujuni?” yajurcanimi.

6Shina yajujpimi, serafín nishca ángel puramanda shujca, ñucapajman huairapi shamurca. Paica, altar jahuapi tiajuj ninata shuj tenazahuan japishpami,

7ñuca shimiman chai ninata tacachishpa cashna nihuarca: “Ricui, cambaj shimica cai ninapi tacarircami. Chaimandami, can ima nalita rurashcapash ña anchurishca. Cambaj juchacunapash fichashcami” nihuarcami.

8Chai jipami, Jatun Diosca: “¿Pitata cachashayari, maijanshi ñucanchi imatalla nishcataca villagringa?” nijujta uyarcani. Chaita uyashpami: “Ñucami caipi capani, ñucata cachahuailla” nircani.

9Shina nijpimi, paica cashna nihuarca: “Shina cashpaca rilla. Chai gentecunaman, cashna nigri: ‘Ali uyashpapash, na yuyaita japishpami causanguichi. Ali ricushpapash, ima cajta na yachashpami causanguichi’ nigri.

10Chai jipaca, cai gentecunapaj shunguta shinlliyachingui. Paicunapaj rinritapash, ñavitapash vichangui. Paicunapaj ñavihuambash ama ricuchun, rinrihuambash ama uyachun, shungupipash yuyaita ama japichun, ñucapajmambash ama tigrarichun, chashna rurangui. Shinamandami paicunapaca, ali tucunapash na tianga” nihuarcami.

11Shina nijpimi ñucaca, cashna nircani: “Jatun Dioslla, ¿ima horascamanda chashna cangayari?” nircanimi. Shina nijpimi paica, cashna nihuarca: “Tucui pueblocunapi llaquinayaita tucuchi tucungacaman, pi causangapajpash illaj quedangacaman, huasicunapipash, shuj runallapash na tiangacaman, alpacunapash shitashca quedangacamanmi, chashna canga.

12Caipi causajcunataca, Mandaj Diosca tucuillata shuj llactaman prezu cachashpa, cai llacta chaupipica, jichushca pushtucunata mirachingacamanmi, chashna canga.

13Patsajmanda chungapuralla cai llactapi puchushca cashpapash, chaicunaca tucuchi tucushcami canga. Ashtahuangarin roble nishca, encina nishca quirucunata urmachijpica, tronco puchunrami. Chai troncoshnami, paicuna puramanda puchushcacunaca, Diospajlla canga” nihuarcami.