GÉNESIS 41 - Quichua Imbabura Bible

1Ishcai huata yalishca jipami, cashna tucurca: Faraonga, shuj muscuitami charirca: Paica, jatun yacu manñapimi shayajuni yarijurcami.

2Chai jatun yacumandaca, juyailla ricurijuj, ninan vira, canchis huarmi huagracuna llujshinajujmi ricurirca. Chai huarmi huagracunaca, jihua pambapimi micunajurca.

3Chai huagracunapaj catipica, nali ricurijuj, tullu tullu shuj canchis huarmi huagracunami, jatun yacumanda llujshinajurca. Chai huagracunaca, juyailla huagracunapaj ladopimi, jatun yacu manñapi shayanajurca.

4Chai nali ricurijuj tullu tullu huagracunami, juyailla ninan vira canchis huagracunata langanshna tucuchirca. Shinata muscujushpami, Faraonga rijcharirca.

5Cutin puñushpaca, cashnatami cutin muscurca: Shuj trigo yuramandalla, grano junda juyailla, canchis trigo caspacuna viñanajujtami muscurca.

6Chaipaj catica, rupajlla huairahuan huaglishpa jupayashca, shuj canchis trigo caspacunami llujshirca.

7Chai canchis caspa trigo huaglishpa jupayashcacunaca, grano junda canchis racu trigo caspacunatami langanshna tucuchirca. Shinata muscujushpa Faraón rijcharijpica, chaica muscuillami carca.

8Chashna muscushcamanda cayandi tutamanda paipaj shungupi ninanda llaquilla cashpami, cashna rurarca: Paica, Egiptopi causanajuj tucui yachajcunata, tucuilla alipacha yachajushcacunata cayachunmi cacharca. Paicunamanmi, Faraonga pai muscushcacunata villajurca. Ashtahuangarin chai muscuicuna ima cajta Faraonman villaitaca, pipash na ushanajurcachu.

9Chaimandami, vinota yalichijcunata mandaj runaca, Faraondaca cashna nirca: —Nalicunata ñuca rurashcataca, cunanmi yarini.

10Quiquin Faraonga, canda servijcunata fiñashpami, ñucatapash, tandata rurajcunata mandajtapash, cuidaj soldadocunata mandajpaj huasipi prezu churarcangui.

11Chaipimi paipash, ñucapash chai tutallata shuj muscuita charircanchi. Chai muscuicunaca, ishcandillatami ima tucunata ricuchijurca.

12Chaipica, cuidaj soldadocunata mandaj runata servishpa causaj hebreopura, chairalla viñai shuj runami ñucanchihuan carca. Chai muscuita paiman villajpimi, ñucanchi muscuicuna ima cajtapash villajurca. Ñucanchi imashna muscushcatallatami, chaitapacha villajurca.

13Chaipica cashnami tucurca: Ñucanchi muscuicuna ima tucunata pai villashcapash, shinapachami tucurca. Ñucaca, punda imata rurajushca pushtupillatami, cutin churai tucurcani. Chaishujca, sipishpami huarcui tucurca— nircami.

14Shina nijpimi Faraonga, Joseta cayachun cacharca. Shina cachajpimi, prezuna huasimanda ucha llujchinajurca. Shina llujchijpimi, barbasta muchurishpa, churajunacunatapash shujta churajushpa Faraonbajman shamurca.

15Faraonga, Josetaca cashnami nirca: —Ñucami, shuj muscuita charishcani. Chai muscui ima cajtaca, pipash na villai ushahuanllu. Ashtahuangarin candami, muscuicunata villajpi uyashpa, chai muscuicuna ima cajta villanlla nijta uyashcani— nircami.

16Shina nijpimi Joseca, Faraonman cashna nishpa tigrachirca: —Caitaca, na ñucamandalla villai ushanichu. Taita Diosllami, chashna canatapacha Faraonman tigrachinga— nircami.

17Shina nijpimi Faraonga, Josetaca cashna nijurca: —Ñuca muscuipica, jatun yacu manñapi cashcatashnallami yani:

18Chai jatun yacumandaca, ninan racu, juyailla ricurijuj, canchis huarmi huagracunami vichai llujshinajurca. Chai huagracunaca, jihua pambapimi micunajurca.

19Chai huagracunapaj catica, tullu tullu, ninambacha nali ricurijuj canchis huagracunami, jatun yacumanda vichai llujshinajurca. Chashnapacha nali ricurijuj, tullu tullu huagracunataca, tucui cai Egipto llactapica maipipash na ricushcanichu.

20Chai tullu tullu, nali huagracunaca punda llujshishca, ninan racu, canchis huagracunatami langanshna tucuchinajurca.

21Chai huagracunata micushpa vijsaman yalichijpipash, micushcashnallapash na ricurircachu. Chai tullu tullu huagracunaca, pundashnallata ninan nalillatami ricurinajurca. Shinata muscujushpami rijcharircani.

22Cutin muscushpaca, shuj yuramandalla, grano junda, canchis juyailla trigo caspacuna viñanajujtami ricujurcani.

23Chaipaj catica, rupajlla huairahuan huaglishpa jupayashca shuj canchis trigo caspacunami viñanajurca.

24Huaglishpa jupayashca chai caspacunami, juyailla canchis caspacunataca langanshna tucuchinajurca. Chaitaca yachajcunaman villashcanimi, ashtahuangarin chai muscui ima cajtaca, pipash na villai ushahuanllu— nijurcami.

25Shina nijpimi Joseca, Faraonman cashna nishpa tigrachirca: —Quiquin Faraonbaj muscuicunaca shujllami. Taita Diosmi, pai imata ruranata Faraonman ricuchishca.

26Chai canchis juyailla huarmi huagracunaca, canchis huatami. Juyailla trigo caspacunapash, canchis huatallatami. Chai muscuicunaca shujllami.

27Shinallata juyailla huagracunapaj catipi llujshishca, nali ricurijuj, tullu tullu canchis huarmi huagracunapash canchis huatallatami. Rupajlla huairahuan huaglishpa jupayashca caspacunaca, canchis huatata yarjai tianatami ricuchijun.

28Caitami Faraonman villani. Taita Dios imatalla ruranatami, Faraonman ricuchishca.

29Ricui, tucui Egipto llactapimi, canchis huatacaman granocuna ninanda fucunga.

30Chaipaj catica, canchis huatacaman yarjai tianami catimunga. Egipto llactapica, chai tucui granocuna fucushcataca cungangami. Yarjaimi llactataca tucuchijunga.

31Chashna yarjai huatacuna catimushcamandami, ninanda fucushca granocunaca, imapash na ricuringa. Chai huatacunaca, manllanayai ninan llaquimi canga.

32Taita Diosca chashnatapacha pactachina cajpimi, quiquin Faraonga ishcai muscuita charishcangui. Taita Diosca, chaitaca uchami ruragrijun.

33Shina cashcamanda cunanga, alipacha yarishpa purij, ali yachajushca shuj runata agllashpa, Egipto llactata mandachun, quiquin Faraonllata churailla.

34Quiquin Faraonga, cashna rurai: Cai llactata mandachunga, mandajcunata churai. Canchis huatata Egipto llactapi ninanda fucujujpica, chai fucushca granocunataca, paicunami pichapi shicanyachishpa alichinajunga.

35Shinallata tucui ima tiashca granocunatami, cai shamuj ali huatacunapica tandachinajunga. Quiquin Faraonllata ricushpa mandajujpimi, pueblocunapi causajcunapaj micuna tiachun, trigota alichinajunga.

36Tucui ima tiashca granocunaca, canchis huatata, Egipto llactapi yarjai tiana punllacunapajmi alichishca tiajunga. Granocunata chashna alichijpimi, llactapi causajcunaca yarjaimanda na huañunga— nijurcami. Joseca, Egiptopi mandajmi tucushca

37Shina nishcacunaca Faraonbajpash, paita servijcunapajpash alimi ricurirca.

38Faraonga, paita servijcunataca cashnami nirca: —¿Taita Diospaj Espirituta charij paishnalla shuj runata tarishunllu imashi?— nircami.

39Faraonga, Josetami cashna nirca: —Taita Diosmi tucui caicunata canman yachachishca. Canshnalla entendij, alipacha yachajushca runaca na tianllu.

40Canmi, ñuca huasipi mandangui. Canmi, tucuilla ñuca gentecunataca rimashpa mandangui. Ñuca mandangapaj tiarinapi tiajushcamandallami, candaca yali casha— nircami.

41Faraonga, Josetaca cashnatapashmi nirca: —Ricui, candaca tucui Egipto llactata mandachunmi churani— nircami.

42Shina nishca jipami Faraonga, paipaj maquimanda surtijasta surcushpa, Josepaj maquipi churachirca. Shinallata lino puchata ahuashca alipacha churajunacunata churachishpami, cungapipash oro churajunata churachirca.

43Josetaca, paipaj cati carretapimi vitsiachirca. Chai jipami, paipaj ñaupajpillata: “¡Cungurichi!” nishpa caparinajurca. Chashnami Josetaca, tucui Egipto llactata mandachun churarca.

44Chaipaj jipaca Faraonga, Josetaca cashnami nirca: —Ñucami Faraón cani. Tucui cai Egipto llactapi can na mandajpica, maijanllapash na paipaj maquita, chaquita alsangachu— nircami.

45Faraonga, Josetaca, Zafnat-panea shutitami shutichirca. On shuti pueblopi causaj Potifera shuti curapaj ushi Asenattami, paipaj huarmi cachun curca. Joseca, tucui Egipto llactata muyungapajmi llujshirca.

46Joseca, Egipto llactata jatun mandaj Faraonbaj ñaupajman pushai tucushca punllapica, quimsa chunga huatatami charirca. Joseca, Faraonbaj ñaupajmanda llujshishpami, tucuilla Egipto llactata muyungapaj rijurca.

47Granocuna ninanda fucushca chai canchis huatapica, alpacunapica ninandapachami fucujurca.

48Egipto llactapi canchis huatata ninanda fucushca, micuna tucui granocunataca, Josemi tandachishpa alichijurca. Micuna granocunataca, pueblocunapimi alichijurca. Chai pueblocunapaj muyundi pambacunapi fucushca granotaca, chai tucuilla pueblocunapillatami alichijurca.

49Joseca, mama cucha manñapi t'iyu alpatashnami, trigotaca ninandapacha tandachijurca. Cuentaitapash na ushanalla cajpimi, cuentaitapash na ushangacaman tandachijurca.

50Joseca, yarjai callari huata nara chayamujpillatami, ishcai huahuata charirca. Chai huahuacunataca, On shuti pueblopi causaj Potifera shuti curapaj ushi Asenat shuti huarmimi ungurca.

51Joseca, cashnami nijurca: “Taita Diosmi ñucataca, tucui llaquita cungachihuashca. Shinallata ñuca taitapaj huasi ucu purutapashmi, tucuillata cungachihuashca” nijurcami. Shina nishpami, paipaj punda churitaca, Manasés shutita shutichirca.

52Joseca cashnami nijurca: “Taita Diosmi, llaquilla causajuj llactapi ñuca churicunata mirachinata rurahuashca” nijurcami. Shina nishpami, paipaj cati churitaca Efraín shutita shutichirca.

53Shinami, Egipto llactapi granocuna ninanda fucuna canchis huataca pactarca.

54Chai jipaca, José villashcashnallatami, canchis huatata yarjai tiai callarirca. Shinamandami tucuilla llactacunapi yarjai tiarca, ashtahuangarin tucui Egipto llactapica micuna tiarcami.

55Tucui Egipto llactapi causajcunata yarjai japijpimi, Faraondaca micunamanda caparinajurca. Shina caparinajujpimi Faraonga, Egiptopi tucuilla causajcunataca cashna nijurca: “Josepajman richi. Pai imata nishcata ruranguichilla” nijurcami.

56Yarjaica, tucui llactapimi tiarca. Shina cajpimi Joseca, tucui pueblocunapi granocunata alichishca ucucunata pascashpa, Egiptopi causajcunaman jatujurca. Egipto llactapica, yarjaica ashtahuanmi mirashpa catirca.

57Chaimandami, tucuilla llactacunamandaca, Egiptoman Josepaj maquimanda randingapaj shamunajurca. Tucui cai pachapi yarjai mirashcamandami, chashna shamunajurca. Josepaj huauquicunaca, granocunamanmi shamushca