AMÓS 4 - Quichua Imbabura Bible

1Basán shuti llactamanda huarmi huagracunashna causaj, Samaria urcumanda huarmicuna, caita uyaichi. Cangunaca, imagutapash na charijcunata quichushpa, imagupash illajcunata llaquichishpami causanguichi. Cangunapaj cusacunatapash: “Vinota apamui, ufiashun” nishpami mañanajunguichi.

2Jucha illaj Mandaj Jatun Diosca, cashna nishpami juramenturca: “Ricuichi, cangunata llaquichina punllacunami chayamujun. Chai punllacunapica cangunataca, ganchocunahuan aisashpami rinajunga. Cangunapaj miraicunatapash, pijita japina anzuelocunahuanmi japinajunga.

3Chai punllapica, pirca utujucunatami cati cati llujshinguichi. Mandashpa tiajuna huasimandapashmi, llujchi tucunguichi” nijurcami Mandaj Diosca.

Israelcunaca llaquichijpipash, na yachajunllu

4“Bet-el shuti, Gilgal shuti pueblocunaman rishpa, yachashca jahua ashtahuan na cazushpa catichilla. Tutamandata animalcunata apamushpa, Diosman carashpa huañuchinajuichilla. Chungamanda shujguta cunatapash, cada quimsa punlla cunguichilla.

5Diosta alicachishpa, Diosman cushpa huañuchina animaltapash, levadurahuan rurashca tandahuan caraichilla. Cangunapaj munai imata carashcacunatapash, tucuicunaman villagrichilla. Israelcunalla, cangunaca chashna ruranatami munanguichi” ninmi Mandaj Jatun Diosca.

6Mandaj Diosca, cashnatapashmi nin: “Ñucami, cangunapaj tucui pueblocunapica, ima micunallapash illachun saquircani. Chaimandami, canguna causanajuj tucui pueblocunapica, micunapash na tiarca. Shina cajpipash, napacha ñucapajman tigrarishpami causarcanguichi” ninmi Mandaj Diosca.

7“Shinallata granocunata cozechangapaca, quimsa quilla tiajpillatami, tamiatapash jarcarcani. Shuj pueblopica tamiachishpapash, caishuj pueblopica na tamiachircanichu. Shuj pushtucunapillami tamiarca, maipi na tamiashcapica tucuillami chaquirca.

8Ishcaimanda, na cashpaca quimsa pueblocunamandami, shuj pueblopilla yacuta ufiangapaj shamunajurca. Shina ufiashpapash, amijtaca na ufianajurcachu. Shina llaquita apanajushpapash, napacha ñucapajman tigrarishpami causarcanguichi” ninmi Mandaj Diosca.

9“Canguna tarpushcacunataca, rupajlla huairahuan, oruga nishca jurucunahuanmi huaglichircani. Cangunapaj ashtaca huertacunata, uvas chagracunata, jigos yuracunata, olivos yuracunataca, langosta jurucunami micushpa tucuchirca. Shina llaquichijpipash, napacha ñucapajman tigrarishpami causarcanguichi” ninmi Mandaj Diosca.

10“Cangunamambash, Egiptomanshnami huañuita cachamurcani. Cangunapaj churicunatapash, espadahuanmi huañuchircani. Cangunapaj caballocunatapash, cangunata fiñajcuna apachunmi saquircani. Shinallata tandanajushca ashtaca soldadocuna huañushpa ismushca ashnaitapashmi cachamurcani. Cangunaca, chashna tucui llaquicunata apanajushpapash, napacha ñucapajman tigrarishpami causarcanguichi” ninmi Mandaj Diosca.

11“Sodoma shuti, Gomorra shuti pueblocunata Taita Dios ñuca llaquichishcashnami, ninanda llaquichircani. Chaimandami cangunaca, caspita rupachijpi na tucuilla rupashpa asha puchushcashna canguichi. Chashna llaquita apanajushpapash, napacha ñucapajman tigrarishpami causarcanguichi” ninmi Mandaj Diosca.

12“Israelcunalla. Shinamandami, cangunataca chashna llaquichisha. Cangunata chashna llaquichina cashcamandaca, cangunapaj Taita Dios ñucahuan tuparingapaj alichirishcami shuyana canguichi, israelcunalla” ninmi.

13Ricuichi, paica urcucunatapash, huairatapashmi rurarca. Runacunamambash, pai imata yarijushcatami villan. Paimi, yana yana tutatapash punllayachin. Paica, cai pachapi tiaj tucui urcucunatami purin. Paica, tucuita Mandaj Taita Dios shutimi.