1 TESALONICENSES 4 - Quichua Imbabura Bible

Taita Diostalla cushichishpami causana

1Huauquicuna, panicuna, cangunataca Apunchi Jesusmanda aliguta yarichishpa rimapanchi: Cangunataca, imashna ali causanata, Taita Diostalla cushichishpa causanata ñucanchi yachachijpi yachajushcashna causachunmi, ninanda mañapanchi. Shinami, ashtahuan ashtahuan ali causashpa catinguichi.

2Apunchi Jesús mandajpi, canguna imashna aliguta causanata yachachishcataca ña yachanguichimi.

3Taita Diosca, cangunataca paipajlla causachunmi munan. Huainayashpa causanata saquichunmi munan.

4Tucui cangunaca, quiquin huarmiguta charishpami, Diospajlla causashpa alicachina canguichi.

5Taita Diosta na rijsij gentecunashna jatun nali munaitalla rurashpaca, na causanachu canguichi.

6Maijambash ama paipaj huauquitallata umashpa, nalita rurangachu. Chashna nalita rurajcunataca, Apunchi Jesusmi imashna llaquichishcashnallata llaquichinga. Chaitaca, ñami chashnapachami nishpa villarcanchi.

7Taita Diosca ñucanchitaca, mapayashca causachunga na cayarcachu. Ashtahuangarin paipajlla tucushpa, aliguta causachunmi cayarca.

8Cai yachachishcata yangapi churashpaca, na runacunatalla yangapi churanllu. Ashtahuangarin, jucha illaj paipaj Espirituta caraj Taita Diostami yangapi churan.

9Taita Dios yachachijpimi cangunaca, caishujhuan chaishujhuan juyarishpa causanajunguichi. Shina aliguta causanajujpimi, crijpura juyarinami canguichi nishpaca, na escribimuni.

10Tucui Macedonia llactapi causanajuj tucui crijcunahuambash, cangunaca juyarishpami causanajunguichi. Shina cajpipash huauquicuna, panicuna, ashtahuan ashtahuan juyarishpa causapanguichi nishpami, ninanda mañapanchi.

11Cangunaga, cungaillami causana canguichi. Cangunapaj ima ruranacunatapash cangunapaj maquihuanmi, ñucanchi imashna yachachishcashnallata rurashpa causana canguichi.

12Shina aliguta rurashpa causashpaca, imagutapash charinguichimi. Shina causajpimi, nara crijcunapash cangunataca alicachinga.

Apunchi Jesús tigramunatami villajun

13Huauquicuna, panicuna, huañushcacuna ima tucunatapash yachachunmi munanchi. Causarinata na yachajcunashna ama llaquilla causangapajmi, chaitaca yachanapacha canguichi.

14Ñucanchica, Jesús huañushpa causarishcatapash crinchimi. Chashnallatami Taita Diosca, paita crishpa huañushcacunatapash causachishpa, Jesushuan apamunga.

15Apunchi Jesús yachachijpimi, caita villanchi: Apunchi Jesús tigramuna punllacaman ñucanchi causanajushpaca, huañushcacunataca na ñaupashpa, jahua pachaman rinachu canchi.

16Apunchi Jesusca caparishpa mandashcahuan, angelcunata mandaj ángel caparishcahuan, Taita Diospaj trompetata huacachishcahuanmi, jahua pachamanda urai shamunga. Shina shamujpimi, Cristota crishpa huañushcacunaca, punda causaringa.

17Chai jipaca, ñucanchi causajcunata caipi quedashcacunatami paicunahuan tandachishpa, Apunchi Jesushuan jahua huairapi tuparingapaj fuyupi apanga. Shina apajpimi, Apunchi Jesushuan causaita causagrishun.

18Shinamandami cai shimicunata parlashpa, caishuj chaishuj cushichirina canguichi.