HEBREOS 4 - Quichua Imbabura Bible

1Taita Diosca, ñucanchi paihuan samachun pushashapacha nijunrami. Shina cajpipash canguna puramanda maijanga, chai samangapaj rinata na japigrinashnalla causanajujpimi, manllashpa catina canchi.

2Ñucanchimambashmi, paicunamanshnallata ali villaiguta villajushca. Shina cajpipash chai shimita uyashpapash na crishpa, na chasquishcamandami, paicunapajllata imapajpash na ali cashca.

3Ashtahuangarin paita crishcacunallami, paihuan samangapaca yaicunchi. Shinamandami cashna nishca:

“Paicunahuan ninanda fiñarishpami,

ñucahuan samangapaca napacha yaicungachu

nishpa juramenturcani” nishcami.

Diosca, cai pachata rurai callarishpa tucuchishca jipami, chashna nijushca.

4Diosca, canchis punllamanda rimashpami, shuj pushtupica cashna nijun: “Taita Diosca tucuita churashpami, canchis punllapica samarca” nijunmi.

5Shinallata: “Ñucahuan samangapaca, napacha yaicungachu” nijunmi.

6Shinamandami huaquingunaca, paihuan samangapaca nara yaicun. Ali villaitaca pundata villajujta uyashpapash na cazushcamandami, samangapaca na yaicunajushca.

7Shina cajpipash, cutin shuj punllacunapimi samagrichunga, Diosca churashca. Chai punllacunaca, cunambimi pactamushca. Chai punllacunamanda villachunga, unai huata jipacunapimi Diosca, Davidman yarichishpa, cashna nishca:

“Dios rimajujta cunan uyashpaca,

na shinlli shungu tucunachu canguichi” nishcami.

8Israelcunata, Dioshuan samagrichun Josué pushai ushashca cajpica, jipa punllacunapi samagrina tiangami nishpaca, na villachun mandanmanllu carca.

9Shinamandami, Taita Dios agllashca gentecunapaca, samagrina tian.

10Taita Diosca, cai pachata ruraita tucuchishpaca samarcami. Shinallatami ñucanchipash paihuan samangapaj yaicushcacunaca, imata ruranajushcatapash saquishpa samanata charinchi.

11Shina samagrinata charingapaca, aligutapacha yarishpa catishunchi. Ama ñaupa taitacuna na cazushpa urmashcashna cangapajmi, chashna catina canchi.

12Taita Diospaj Shimica causaj cashpami, ninan ushaita charin. Ishcandi ladoman filo filo tucui espadatapash yali cuchui ushaj cashpami almata, espirituta, mucucunata, ñutujutapash chaupirijta tujsinshna yarichijun. Shinallata yuyaicunatapash, shungu imata yarijujtapash, tucuitami rijsichijun.

13Dios imata rurashcapash, paipaj ñaupajmandaca napacha pacajui ushanllu. Ashtahuangarin paica, ima tiajtapash tucuitami, aligutapacha ricujun. Ñucanchi imata rurashcatapash, paiman villagrinatami charinchi.

Jesusca, curacunata jatun mandaj curami

14Chaimandami Jesusca, Taita Diospaj Churi cashpa, curacunata mandaj ñucanchipaj jatun cura. Paica, jahua pachata yalishpa rishcamandami, paita crishcataca aligutapacha catina canchi.

15Ñucanchica, ñucanchi imata na rurai ushajpipash, curacunata mandaj, ñucanchita llaquij curatami charinchi. Ashtahuangarin ñucanchitashna pandachingapaj munajpipash, na juchata ruraj curatami charinchi.

16Ñucanchica, ninanda juyashpa mandashpa tiajujpaj ñaupajman, paita yariashpapacha quimirishunchi. Ñucanchi ima llaquihuan cajpipash, ninanda llaquishpa juyashpa ayudachunmi, chashna quimirina canchi.