1Chai jipami, cashna tucurca: Davidca, filisteocunata mishashpami, cazuchishpa charirca. Meteg-ama shuti pueblotapashmi, filisteocunapaj maquimanda quichurca.
2Shinallata Moab llactapi causajcunatapash mishashpami, alpapi sirichishpa cabiahuan medirca. Cabiahuan ishcaita quinrai medishca pushtupi sirinajujtaca huañuchircallami. Cabiahuan shujguta quinrai medishca pushtupi sirinajujtaca, na huañuchishpami saquirca. Shinami moabitacunaca, Davidpaj servij tucushpa, impuestotapash cushpa causanajurca.
3Shinallata Soba shuti llactata jatun mandaj Hadad-ezer shuti runatapashmi misharca. Paica, Rehob shuti runapaj churimi carca. Paitaca, Eufrates yacu ladolla llactata cutin japingapaj rishpami misharca.
4Davidca paicuna puramandaca, caballopi purij huaranga canchis patsaj soldadocunata, chaquilla purij ishcai chunga huaranga soldadocunatami japirca. Shinallata macanajuna tucuilla carretacunata aisaj caballocunapaj cunguri angucunatapashmi fitirca. Shina rurashpapash patsaj carretacunata aisangapaca, pactana caballocunatami saquirca.
5Soba shuti llactata jatun mandaj Hadad-ezer shuti runata ayudangapajmi, Damasco pueblopi causaj siriocunaca shamurca. Davidca, chai siriocunataca ishcai chunga ishcai huaranga runacunatami chugrichishpa huañuchirca.
6Chai jipami Davidca, Siria llactapi tiaj Damasco pueblopica, cuidaj soldadocunata churarca. Shinamandami siriocunaca, Davidpaj servijcuna tucushpa, impuestotapash cushpa causanajurca. Mandaj Diosca, David maipi macanajungapaj rijpipash, mishachijllami carca.
7Davidca, Hadad-ezer shuti runata servijcuna apashpa purij jarcarina oro escudocunatapashmi japishpa, Jerusalenman apamurca.
8Shinallata Hadad-ezer shuti runa mandajushca Beta shuti, Berotai shuti pueblocunamandapashmi, jatun mandaj Davidca, ashtaca broncecunata japirca.
9Hamat shuti pueblota jatun mandaj Toi shuti runaca, Hadad-ezer shuti runapaj tucuilla soldadocunata, David mishashcatami yacharca.
10Hadad-ezer runataca, macanajushpa mishashcamandami Toi shuti runaca, alillachu capangui nishpa cushijuihuan bendiciachun, paipaj churi Joram shuti runata, jatun mandaj Davidpajman cachamurca. Toi shuti runapashmi, Hadad-ezer runahuan macanajushpa causajurca. Joram shuti runaca, orota, culquita, bronceta rurashca juyailla charishcacunatami apashpa rirca.
11Chaicunatami, jatun mandaj Davidca, tucuilla llactacunata mishashpa cazuchijpi cushca culquicunandi, orocunandi, Mandaj Diospajlla cachun curca.
12Davidca siriocunata, moabitacunata, amonitacunata, filisteocunata, amalecitacunata, shinallata Soba shuti llactata jatun mandaj Rehob shuti runapaj churi Hadad-ezer runata imatalla quichushcacunatapashmi cushca carca.
13Shinami Davidca, ashtahuan tucuicuna rijsishca tucurca. Siriocunata mishashpa tigramunajushpami, chunga pusaj huaranga edomitacunatapash, Cachi tiaj pugru Pambapi huañuchirca.
14Shina mishashpami, Edom llactapi tiaj tucuilla pueblocunapica, cuidaj soldadocunata churarca. Edomitacunaca tucuicunami, Davidpaj servijcuna tucurca. Mandaj Diosca, David maiman rijpipash macanajuita mishachinllami carca.
David churashca mandajcunamandami villajun(2 Sam. 20:23-26; 1 Crón. 18:14-17)15Davidca, tucui israelcunatami mandajurca. Davidca, imatapash cashcatapacha rurashpami, paipaj gentecunataca aligutapacha ricushpa mandajurca.
16Paipaj soldadocunataca, Sarvia shuti huarmipaj churi Joabmi mandajurca. Ahilud shuti runapaj churi Josafat shuti runaca, imalla tucushcata escribijmi carca.
17Ahitob shuti runapaj churi Sadoc shuti runapash, Ahimelec shuti runapaj churi Abiatar shuti runapash, curacunami carca. Seraías shuti runami, escribij carca.
18Joiada shuti runapaj churi Benaía shuti runaca, cereteo nishca, peleteo nishca runacunatami mandajurca. Davidpaj churicunapash, mandajcunami carca.
Who We AreWhat We EelieveWhat We Do
2025 by iamachristian.org,Inc All rights reserved.
