JOB 31 - Quichua Imbabura Bible

Job runaguca, pai ali cashcatami villashca

1Ñuca ñavihuanga, ima nalitapash ama ricungapajmi, ari nijurcani. Shina cashpaca, ¿imashpata jarihuan nara tacarishca cuitsataca ricushayari?

2Chaimandaca, ¿imatashi Taita Diosca jahua pachamanda carahuanga? ¿Tucui Ushaita Charij Diosca, jahua pachamandaca imata japinatashi carahuanga?

3Diosta na manllaj runata llaquichinaca, ¿nachu tian? Juchata rurajcunapaca, manllanayai llaquicunaca, ¿nachu tian?

4Diosca, ñuca imashna causajujtaca, ¿nachu ricujun? ¿Nachu ñuca chaqui sarushcacunata ricushpa, tucuillata cuentajun?

5Llullashpa purishca cajpipash, umachingapaj ñuca chaquihuan ucha rishca cajpica,

6imatapash cashcatapacha pezaj balanzapi, Taita Diosllata pezahuachunlla. Shina rurashpami ñucataca, ali cajta ricuhuanga.

7Ali ñanmanda caruyashca cajpipash, ñuca ñavi ricushcata, ñuca shungu munashca cajpipash, ñuca maquihuan ima nalita rurashca cajpipash,

8ñuca tarpushcacunataca, shujcuna micuchunlla. Ñuca tarpushcacunataca, fitishpa shitachunlla.

9Shuj huarmihuan ñuca shungupi umachi tucushca cajpipash, llaquichingapaj ñuca cumba runagupaj pungupi pacalla chapajushca cajpipash,

10ñuca huarmica, shujcunaman cutashpa causachunlla. Paihuanga, shuj jaricuna siririchunlla.

11Jatun nali juchata ñuca rurashca cajpica, juezcunami llaquichihuanman carca.

12Chai juchaca, Abadón nishca ucupi rupachijuj ninashnami canman carca. Ñuca jazindatapash, tucuillatami rupachinman carca.

13Ñucata servij runapash, huarmipash, paicuna japina cashcata mañangapaj shayarijpi, yangapi churashpa na cushca cashpaca,

14paicunapaj randi Taita Dios shayarijpica, ¿imatashi ruraiman carcani? Pai imata tapujpipash, ¿imatashi tigrachiman carcani?

15Ñuca mamapaj vijsapi ñucata ruraj Diosca, ¿nachu paitapash Diosllata rurashca? ¿Nachu mamapaj vijsapica, Diosllata tucuicunata rurashca?

16Imagutapash na charij runacuna cushijunata ñuca jarcashca cajpipash, sapalla mamaguta huacachishpa, paipaj ñavita huaglichishca cajpipash,

17taita mama illaj huahuaman na carashpa, ñucalla micushca cajpipash, llaquichihuachunlla.

18(Ñuca, chairalla viñaimandapachami, paica paipaj taitahuanshna ñucahuan viñarca. Ñucaca, ñuca mamapaj vijsapi cashpallatami, sapalla mamaguta cuidangapaj tiajurcani).

19Churajuna illaj maijambash huañuchun ricushcalla cajpipash, imagutapash na charijtaca, jahualla churajuna illajta saquishcalla cajpipash, llaquichihuachunlla.

20Chashna rurashcamanda na bendiciajpipash, ñuca llamacunapaj milmahuanmi cunujyachircani.

21Tandanajuna pungupi ñucata ayudana cajpilla, ñuca maquita alsashpa, taita mama illaj huahuaguta llaquichishca cajpipash,

22ñuca huasha tullupash, ñuca rigra tullupash faquirichunlla.

23Ñucaca, Taita Dios llaquichinatami manllarcani. Jatun Dioshuan chimbapurangapaca, ushaita na charimanllu.

24Orota yariajlla causajushca cashpaca, orotaca: ‘Canda yariajllami causajuni’ nimanmi carcani.

25Ñuca charishcacunata ninanda mirachishcamandalla, ashtacatapacha charishcamandapash na cushijurcanichu.

26Indi punchapamba llujshijpipash, na cashpaca, luna juyailla cajtapash na ricurcanichu.

27Chaicunataca ñuca shungupillapash, na pacalla mañarcanichu. Ñuca maquihuan muchashpapash, na ricuchircanichu.

28Chashna nalita rurashca cashpaca, llaquichi tucuimanmi carcani. Jatun Diostami, cungaiman carcani.

29Ñucata fiñaj runa llaquichi tucujpica, na cushijurcanichu. Paita llaqui japijpica, na asircanichu.

30(Ñuca jalluhuanga, ima juchatapash na rimarcanichu. Paita llaqui japichumbash, na mañarcanichu).

31Ñucata servijcunapash: ‘¿Maijanda aichataca, amijta nara micunguichi?’ nishpaca, na tapunajurcachu.

32(Shuj llactamanda purij runapash, na canllapi pacarinllu carca. Carumanda shamujcuna yaicuchunga, ñuca huasi pungupash pascashcami carca).

33Na cazushpa ima nalicunata rurashcatapash, shujcunashnaca na pacarcanichu. Ñuca nalita rurashcataca, ñuca shungupillapash na pacarcanichu.

34Ashtaca gentecunata manllashpalla, ñuca familiacuna fiñanata manllashpalla, ñuca huasi ucupi na upalla tiajurcanichu.

35¡Ñucata pipash uyashpachari, ali canman! Ricuichi, ñucata fiñaj runa juchachijpipash, Tucui Ushaita Charij Dios ñucamanda villanatami shuyajuni.

36Chaitaca, ñuca rigrapimi apaiman. Coronatashnami, umapi ali churajuiman.

37Ñuca imatalla rurashcacunataca, tucuitami Diosman villaiman. Mandajshnallami, paipaj ñaupajpica ricuriman.

38Ñucata fiñashpa ñuca alpacuna caparishca cajpipash, huachushca pambacuna tucuilla huacashca cajpipash,

39ima fucushcatapash, na randishpata micushca cajpipash, na cashpaca chai alpa dueñocunapaj shunguta llaquichishca cajpipash,

40trigo viñangapaj randica, nali jihuacunara viñachunlla. Cebadapaj randica, cashacunara viñachunlla” nijurcami. Job rimashca shimicunaca, caipimi tucurin.