JOB 30 - Quichua Imbabura Bible

Job runaguca, llaquinayai cashpami huacashca

1Ashtahuangarin cunanga, ñucamanda yali ashtahuan chairalla viñaicunami ñucataca asinajun. Paicunapaj taitacunataca, ñuca animalcunata cuidaj alcucunahuanllapash, na churaimanllu.

2Paicunapaj maquihuan shinlli tucushcapash, ¿ñucapaca imapajta ali canman? Paicunaca, ima ushaitapash na charinllu.

3Imagutapash na charijmanda yarjaimandami, paicunalla purinajurca. Chulunlla pushtuman, manllanayai yana yana pushtuman, llaquinayaita tucuchi tucushca, jichushca pambamanmi pacajushpa rinajurca.

4Chaquishca yura chaupicunapimi, malva yuracunata tandachinajurca. Cunungapajpash, enebro nishca yura sapicunatami pallanajurca.

5Gente puramandaca, llujchishpami shitai tucunajurca. Tucuicunami, shuhuata catinshna caparinajurca.

6Paicunaca, huaicu jaca manñacunapi, alpata utujushcacunapi, jaca rumi ucucunapimi causanajurca.

7Yura ucucunapimi caparinajurca. Casha ucucunapimi, tandanajun carca.

8Paicunaca, imapajpash na valij runacunapaj churicunami. Shutipash illaj runacunami. Paicunaca, alpa ucucaman cumuchi tucushcacunami.

9Cunanga, paicuna asishpa ricuna, yarichij shimicunata paicuna parlanallami cani.

10Ñucata millanayachishpami, ñucamanda anchurinajun. Ñuca ñavipipash t'ucanajunllami.

11Taita Diosmi, paipaj huascata pascashpa astihuarca. Shinamandami ñuca ñaupajpica, cacharishcata rimanajurca.

12Ñuca ali ladopica, na cazuj ashtaca gentecunami jatarinajurca. Paicunami, ñuca chaquitaca t'anganajurca. Ñucata fiñashpami, chingachij ñangunata alichinajurca.

13Ñuca chaqui ñandapashmi huaglichinajurca. Ñuca llaquichi tucujta ricushpallami, chashna ruranajurca. Paicunahuan macanajungapaca, pipash na ayudahuarcachu.

14Ancho pungutashnami yaicumunajurca. Ñuca llaqui jahuapillatami, ashtahuan llaquichinajurca.

15Ñucata pandachingapajmi, chashna ruranajurca. Ñuca alicachi tucushcataca, huairashnami urmachinajurca. Ñuca ali causajushcapash, fuyushnami chingarca.

16Cunanga, ñuca almaca ñucapillatami, jicharinshna tucurijun. Llaquilla causana punllacunami japihuashca.

17Tutapash, ñuca tullucunataca utujunshnami saquirca. Ñuca nanaicunapash micujunshna, na samanllu.

18Ñucata ninanda llaquichishcami, ñuca aichataca maucayachijun. Túnica nishca jahualla churajuna, cuelloshnami sipijun.

19Paimi ñucataca, turupi urmachirca. Shinamandami ñutu alpashna, uchufashna cani.

20Canda caparishpa mañajpipash, napacha uyahuanguichu. Cambaj ñaupajpi ricurijpipash, napacha ricunayachinguichu.

21Ninanda llaquichij runashnami, ñucapaca tucushcangui. Ninan ushaita charij cambaj maquihuanmi catiriajuhuangui.

22Ñucataca, huairapimi jahuata cachahuarcangui. Ñuca causaitaca, tucuillatami yacuyachircangui.

23Ñucataca, huañuiman pushajujtami yachani. Causaita tucui charijcuna rina huasimanmi pushajuhuangui.

24Ashtahuangarin pambana utujuman ama richunga, paipaj maquihuan na jarcangachu. ¿Pai llaquichijujpica, huañushpa pambai tucushcacunaca, caparinajungachu imashi?

25Ñucaca, llaquita apajmandaca, ¿nachu huacajurcani? Ñuca almapash, imagutapash na charijtaca, ¿nachu llaquirca?

26Alita ñuca shuyajujpica, llaquirami shamurca. Michata shuyajujpipash, yana tutami shamurca.

27Ñuca chunllulicunapash, na samashpa cuyurijunllami. Ñucataca, jatun llaqui punllacunami cungashcapi japihuashca.

28Ñucaca, napash indi rupachijpitami, yanayashca purijuni. Tandanajuipipash jatarishpami, caparishpa villajurcani.

29Ñucaca, chacal nishca animalcunapaj huauquishnami tucushcani. Avestruz nishca animalcunapaj cumbashnami tucushcani.

30Ñuca aicha carapash, yanayashpami urmajun. Ñuca tullucunatapash, rupashpami raurajun.

31Ñuca arpaca, huañuipi tocana tonota tocanamanmi tigrashca. Ñuca gaitapash, yarishpa yarishpa huacanamanmi tigrashca.