2 SAMUEL 5 - Quichua Imbabura Bible

Davidtaca, Israel llactata jatun mandaj cachunmi churashca(1 Crón. 11:1-3)

1Chai jipami, tucuilla Israel aillucuna, Hebrón shuti pueblopi Davidpajman shamushpa, cashna ninajurca: “Ricui, ñucanchica cambaj tullu, cambaj aichallatami canchi.

2Saúl ñucanchita mandajui punda punllacunapipash, israelcunataca canmi macanajuiman pushan carcangui. Canllatami cutin pushashpa tigramun carcangui. Candaca, Mandaj Diosllatami cashna nirca: ‘Canmi, ñuca agllashca israelcunataca michingui. Canmi, Israel llactapica mandangui’ nircami” ninajurcami.

3Israelcunata mandaj rucucuna, Hebrón pueblopi jatun mandajpajman tucuilla shamujpimi, jatun mandaj Davidca, Mandaj Diospaj ñaupajpi, paicunahuan Hebrón pueblopi ari nijurca. Chaipimi paicunaca, israelcunata jatun mandaj cachun Davidtaca, aceiteta talishpa javinajurca.

4Davidca, quimsa chunga huatata charishpami, mandai callarirca. Paica, chuscu chunga huatatami mandajurca.

5Davidca, Judá llactataca canchis huata sucta quillatami, Hebrón pueblopi mandajurca. Shinallata Israel llactatapash, Judá llactatapashmi, quimsa chunga quimsa huatacaman Jerusalenbi mandajurca.

Shinlli torrehuan jarcashca Sion shuti pueblotami, Davidca quichushca(1 Crón. 11:4-9)

6Chai jipami jatun mandaj Davidca, paipaj runacunata pushashpa, Jerusalenbi causaj jebuseo nishca runacunahuan macanajungapaj rirca. Paicunami, Davidtaca cashna ninajurca: “Canga, caiman yaicumuitaca, na ushanguichu. Can ama caiman yaicumuchunga ñausacuna, suchu runacunami jarcanga” ninajurcami. (Paicunaca, Davidca na caiman yaicumui ushangachu yashpami, chashna ninajurca).

7Shina ninajujpipash Davidca, shinlli torrehuan jarcashca Sion pueblotaca quichurcallami. Chai puebloca, Davidpaj pueblomi.

8Chai punllapillatami Davidca, cashna nirca: “Jebuseocunata huañuchingapaj tucuilla rijcunaca, yacu rijuj larca ucuta vichai rishpa, David ninanda na ricunayachij suchucunatapash, ñausacunatapash huañuchigrichi” nircami. Chaimandami: “Ñausapash, suchupash Diospaj huasiman yaicuitaca na ushangachu” ninajun carca.

9Davidca, shinlli torrehuan jarcashca chai pueblopi causai callarishpami, “Davidpaj Pueblo” nishpa shutichirca. Shinallata Milo nishca pushtumanda callarishpami, pai mandashpa tiajuj huasicaman, shuj jatun pircata muyundi rurachirca.

10Davidca, ashtahuan ñaupajman rishpami, jatunyachi tucujurca. Tucuita Mandaj Taita Diosmi, paihuan carca.

Hiram shuti runaca, paipaj randi parlajcunatami Davidpajman cachashca(1 Crón. 14:1-2)

11Tiro shuti pueblota jatun mandaj Hiram shuti runaca, paipaj randi parlajcunatami, Davidpajman cachamurca. Shinallata cedro caspicunatapash, carpinterocunatapash, rumita juyaillata rurashpa imatalla rurajcunatapashmi cachamurca. Paicunami, Davidpaj huasitaca rurarca.

12Chaita ricushpami, israelcunata jatun mandaj cachunga, Mandaj Diosllata shinllitapacha churashcata Davidca yacharca. Shinallata Dios agllashca israelcunata juyaimandaca, pai mandanata jatunyachishcatapashmi yacharca.

Jerusalenbi David charishca churicunamandami villajun(1 Crón. 3:5-9; 14:3-7)

13Davidca, Hebrón shuti pueblomanda shamushpaca, ashtahuan caishuj huarmicunahuambash, Jerusalenbi causaj huarmicunahuambashmi cazararca. Chai huarmicunahuanmi churicunatapash, ushicunatapash, ashtahuan charirca.

14Jerusalenbi pai charishca churicunapaj shuticunaca, caicunami: Samúa, Sobab, Natán, Salomón,

15Ibhar, Elisúa, Nefeg, Jafía,

16Elisama, Eliada, Elifelet shuticunami carca.

Davidmi, filisteocunata mishashca(1 Crón. 14:8-17)

17Israelcunata jatun mandaj cachun, Davidta aceiteta talishpa javishcata filisteocuna uyashpami, tucuilla filisteocuna, Davidta mascangapaj vichai shamunajurca. Chaita David yachashpami, jatun pircahuan jarcashca ucupi pacajungapaj urai rirca.

18Filisteocuna shamushpaca, Refaim shuti pugru pambapimi, pamba junda tianajurca.

19Chaimandami Davidca, Mandaj Diostaca cashna nishpa tapurca:

—¿Filisteocunahuan macanajungapaj, vichai rinallachu capani? ¿Paicunataca, ñuca maquipi churanachu cangui?— nircami.

Shina nijpimi Mandaj Diosca, Davidtaca:

—Rilla, filisteocunataca cambaj maquipi churashapachami— nirca.

20Shina nijpimi Davidca, Baal-perazim shuti pambaman shamurca. Davidca, chaipi filisteocunahuan macanajushpa mishashpami, cashna nirca: “Mandaj Diosca, ñucata fiñajcunataca jatun yacu apanshnami, ñuca ñaupajpica tucuchirca” nishpami, chai pambataca, “Baal-perazim” nishpa shutichirca.

21Filisteocunaca, paicunapaj yanga dioscunata saquishpami rinajurca. Chaicunatami Davidpash, paipaj runacunapash rupachinajurca.

22Filisteocunaca, Refaim shuti pugru pambaman cutin tigramushpami, pamba junda tianajurca.

23Chaimandami Davidca, Mandaj Diosta cutin tapujpi cashna nirca:

—Ama vichai ringuichu, ashtahuangarin huashata muyushpa, bálsamo nishca yuracunapaj chimba purata, paicunapajman shamungui.

24Bálsamo nishca fanga jahuata purinshnalla uyarijpica, macanajungapaj llujshinguilla. Mandaj Dios ñucami, chai filisteo soldadocunata chugrichishpa huañuchingapaj ñaupasha— nircami.

25Shina nijpimi Davidca, Mandaj Dios mandashcashnallata chashna rurashpa filisteocunataca, Geba shuti pueblomanda Gezer shuti pueblocaman huañuchijurca.