NÚMEROS 9 - Quichua Imbabura Bible

Pascua punllapimi, cushijushpa micunajushca

1Mandaj Diosca, Sinaí shuti jichushca pambapimi, israelcuna Egipto llactamanda llujshimushcapash, ña ishcai huatapaj callari quillapi, Moisesman cashna nishpa villajurca:

2“Israelcunaca, pascua punllapi micuitaca, chai micuita rurana punllapillatami ruranajunga.

3Cai callari quillapi chunga chuscu punlla tucujpica, chishimanda amsayangacaman chai micuna punllallata cushijushpa micunguichilla. Tucuita imashna rurana cashcashnallata, tucuita imashna mandashcashnallata cushijushpa micunguichilla” nircami.

4Shina nijpimi Moisesca, israelcunataca pascua punllapi cushijushpa micunajuchun mandarca.

5Shinamandami israelcunaca, Sinaí shuti jichushca pambapica, huata callari quillapi chunga chuscu punllapica, chishimanda amsayangacaman, pascua punllata cushijushpa, jatun micuita ruranajurca. Mandaj Dios, Moisesman tucuita mandashcashnallatami, israelcunaca chashnatapacha ruranajurca.

6Ashtahuangarin huaquingunaca, huañushcapi tacarishcamanda mapa cashpami, pascua punllapi micuitaca na ushanajurca. Chaimandami, chai punllallata Moisespaj ñaupajman, Aaronbaj ñaupajman shamushpa,

7paicunaca cashna ninajurca:

—Ñucanchica, huañushcapi tacarishpallami mapayashcanchi. ¿Imashpata caishuj israelcunahuan pascua punllapi, Mandaj Diosman imagutapash caranamandaca jarcai tucushunyari?— ninajurcami.

8Shina nijpimi Moisesca, cashna nishpa tigrachirca:

—Caipi shuyaichi, Mandaj Dios cangunamanda imata mandajtara uyasha— nircami.

9Chaipimi Mandaj Diosca, Moisestaca cashna nirca:

“Israelcunaman cashna nishpa villangui:

10‘Canguna puramandapash, cangunapaj mirai puramandapash, huañushcapi maijambash tacarishpa mapayashca cashpa, na cashpaca caruman rijushpa, na micui ushashca cashpaca, Mandaj Dios ñucata yarishpa pascua punllapi cushijushpa micunataca micuchunlla.

11Paicunaca, cati quilla chunga chuscu punllapimi, chishimanda amsayangacaman cushijushpa micunajunga. Chai punllapica jayaj jihuahuan, levadura illaj tandahuanmi micunajunga.

12Diosman cushpa huañuchishca animalpaj aichataca, cayandi punllapaca imatallapash na saquingachu. Chai huañuchishca animalpaj tullucunatallapash, na faquingachu. Pascua punllapi imashna tucuita rurana cashcashcashnallatami cushijushpa micunajunga.

13Ashtahuangarin maijambash mapa illaj cashpata, maimambash na rishca cashpata, pascua punllapi micunata na micushpaca, Israel puracunamandaca anchuchi tucungapachami. Mandashca punllapi, Mandaj Diosman imagutapash na carashcamandami, chai runaca juchamanda llaquita apanga.

14Shuj llactamanda shamushca runa cangunahuan causajushpa, paipash Mandaj Dios ñucata yarishpa, pascua punllapi micushpaca, pascua punllapi imashna rurana cashcashnallata, cushijushpa micuchun mandashcashnallata rurachun. Shuj llactamanda cashpa, chai llactapillata huacharishca cashpapash, imashna rurana cashcashcashnallata ruranguichi’ nishpa villangui” nijurcami.

Diospaj jatun carpa jahuapimi, fuyu tiarishca(Éx. 40:34-38)

15Diospaj jatun carpata shayachinajui punllapica, imashna causanata yachachishca shimicunata alichishca arca tiajuj jatun carpa jahuapimi, fuyu quilparca. Chishi amsayajujmanda cayandi tutamandacamanmi, Diospaj jatun carpapica ninashnalla tiajuj ricurijurca.

16Chashnami punllandi ricurijurca. Punllapica, fuyumi quilpajurca. Tutaca, nina rupajunshnami ricurijurca.

17Diospaj jatun carpa jahuamanda fuyu ña vichai rijpica, israelcunapashmi rinajurca. Fuyu maipi shayarijpipash chaipimi, paicunapaj carpacunata shayachishpa tianajurca.

18Israelcunaca, Mandaj Dios mandajpillami rinajurca. Mandaj Dios mandajpillatami, carpacunatapash shayachishpa tianajurca. Diospaj jatun carpa jahuapi fuyu tiajui punllacunaca, paicunaca carpacunapi tianajurcallami.

19Diospaj carpa jahuapi fuyu unai punllacunata tiajujpica, israelcunaca Mandaj Dios mandashcata cazushpami, maimambash na rinajurca.

20Diospaj carpa jahuapi fuyu ashalla punllacunata tiajujpica israelcunaca, Mandaj Dios mandajpimi, carpacunata shayachishpa tianajurca. Shinallata Mandaj Dios mandajpillatami rinajurca.

21Chishimandapacha tutamandacaman fuyu tiajujpi, na cashpaca tutamanda fuyu vichai rijpica, israelcunaca rinllami carca. Na cashpaca, shuj punllata chishashpa tutayajpi, fuyu vichai rijpica rinllami carca.

22Fuyuca, huaquimbica ishcai punllatalla, huaquimbica shuj quillata, na cashpaca shuj huatatami, Diospaj carpa jahuapica tiajurca. Fuyu chaipi tiajujpica, israelcunapash na maimambash rishpami, chaipi tianajun carca. Ashtahuangarin fuyu vichai rijpica, paicunapashmi rinajurca.

23Mandaj Dios mandajpillami, carpacunata shayachishpa tiarinajurca. Mandaj Dios mandajpillatami rinajurca. Mandaj Dios mandashpa, Moiseshuan villachishcashnallatami paicunaca, Mandaj Dios mandashcata cazunajurca.