1 REYES 19 - Quichua Imbabura Bible

Eliasca, Horeb shuti urcupimi pacajungapaj rishca

1Acab shuti runaca, Elías tucui imatalla rurashcatapash, chai villaj runacunata imashna espadahuan tucuillata huañuchishcatapashmi, Jezabel shuti huarmiman villarca.

2Shina villajpimi Jezabel huarmica, Eliasta cashna nichun shuj villajta cacharca: “Chai villajcunata huañuchishcashnallata, candapash caya cai horascaman na huañuchijpica, ñucatapash dioscunaca ninandapacha llaquichihuachun” nichunmi cacharca.

3Chashna villajpimi Eliasca, llaqui japinata yachashpa, ama huañuchi tucungapaj, Judá llactapi tiajuj Beerseba shuti puebloman shamurca. Chai pueblopimi, paita servij runataca saquirca.

4Paica, jichushca pambata tucui punlla rishpami, enebro nishca yura ladoman chayamushpa, chai yura ucupi tiarirca. Chaipi tiajushpami, paica huañungapaj munashpa, cashna nijurca: “Mandaj Dioslla, caicamanllami causangapaj munani. Ñuca causaita quichuhuailla. Ñucaca, ñuca ñaupa taitacunata yali ashtahuan alipash na canichu” nijurcami.

5Eliasca, enebro nishca yura ucupi siririshpami, puñushpa quedarca. Shina puñujujpimi, shuj ángel paita tacarishpaca: “Jatarishpa micui” nirca.

6Shina nijpi Elías ñapash ricushpami, paipaj uma ladopica, tulpapi cusashca shuj tortilla, shinallata shuj uchilla mangapi yacu tiajujta ricurca. Chaita micushpa ufiashpami, paica cutin puñungapaj siririrca.

7Chashna puñujujpimi, Mandaj Diospaj ángel cutin tigramushpa tacarishpaca: “Jatarishpa micui. Can rina ñanga, ashtaca tianrami” nirca.

8Shina nijpimi jatarishpa micurca, yacutapash ufiarca. Chai micunata micushpa, ña shinlli tucushpami, chuscu chunga punlla, chuscu chunga tutata, Taita Diospaj Horeb shuti urcuman chaquilla rijurca.

9Ña chaipi cashpami paica, shuj jatun utujuman yaicushpa, tutaca chaipi pacarirca. Chaipimi Mandaj Diosca, Eliasta cai shimicunata nirca: “Elías, ¿imatata caipica rurajungui?” nircami.

10Shina nijpimi paica, cashna nirca: “Ñucaca, Mandaj Diosta ninandapacha juyaimandami, ninanda llaquirini. Israelcunaca, canhuan ari ninajushcatapash, cambaj altarcunatapash shitashpami saquishca. Canmanda villajcunatapashmi, espadahuan huañuchishca. Chai villaj puramandaca, ñucallami puchushcani. Shinallata ñucatapashmi huañuchingapaj mascanajun” nircami.

11Shina nijpimi Diosca, cashna nirca: “Canllaman llujshishpa cai urcupillata, Mandaj Dios ñuca ñaupajpi shayari” nircami.

Mandaj Dios chai ladota yalijujpica, jatun, ninan shinllipacha huairami ñapash shamurca. Chai huairami, Mandaj Diospaj ñaupajpica lomacunatapash t'unirca, jaca rumicunatapash faquirca. Ashtahuangarin Mandaj Diosca, na chai huairapichu carca. Chai huairapaj jipaca, alpa mamami chujchurca. Ashtahuangarin Mandaj Diosca, chai alpa mama chujchuipipash na carcachu.

12Alpa mama chujchushca jipaca, ninami ricurirca. Ashtahuangarin Mandaj Diosca, chai ninapipash na carcachu. Ninapaj jipaca, alillaguta huaira huacajujmi uyarirca.

13Chaita Elías uyashpami, pai jahualla churajushcahuan ñavita quilparishpa, canllaman llujshishpa chai jatun utuju pungupi shayarirca. Elías chaipi shayajujpimi: “Elías, ¿imatata caipica rurajungui?” nishpa, ñapash rimaj uyarirca.

14Chashna nijta uyashpami, paica cashna nirca: “Ñucaca, Mandaj Diosta ninandapacha juyaimandami, ninanda llaquirini. Israelcunaca, canhuan ari ninajushcatapash, cambaj altartapash shitashpami saquishca. Canmanda villajcunatapashmi, espadahuan huañuchishca. Chai villaj puramandaca, ñucallami puchushcani. Shinallata ñucatapashmi huañuchingapaj mascajun” nircami.

15Shina nijpimi Mandaj Diosca, cashna nirca: “Damasco pueblo ladolla jichushca pamba ñanda shamushcatallata tigrashpa rilla. Chaiman chayashpaca Hazael shuti runataca, Siria llactata jatun mandaj cachun, aceiteta talishpa javingui.

16Nimsi shuti runapaj churi Jehú shuti runataca, Israel llactata jatun mandaj cachun, aceiteta talishpa javingui. Shinallata Abel-mehola shuti pueblopi causajuj Safat shuti runapaj churi Eliseotaca, cambaj randi ñuca ima nishcata villaj cachun, aceiteta talishpa javingui.

17Chashna rurajpimi, Hazael runapaj espadahuan huañuchi tucunamanda pacajushpa rijtaca, Jehú shuti runa huañuchinga. Jehú shuti runapaj espadahuan huañuchi tucunamanda pacajushpa rijtaca, Eliseomi huañuchinga.

18Ñucami, Israel puramandaca Baal shuti diosta na cungurijcunata, chai diosta paicunapaj shimihuambash na muchajcunata, canchis huaranga runacunata saquigrini” nircami.

Eliseo runatami, Diosca cayashca

19Chaimanda ña rishpami Eliasca, Safat shuti runapaj churi Eliseotaca, chunga ishcai yuntacunahuan yapushpa, paica huashata catijujta tuparigrirca. Eliasca, Eliseopaj ñaupajta yalijushpami pai jahualla churajunata, Eliseopaj jahuapi shitarca.

20Chashna rurajpimi Eliseoca, yapujushca huagracunata saquishpa, Eliaspaj ladoman calpashpa shamushpaca, cashna nirca:

—Ñuca taitata, ñuca mamata muchashpa cayacaman nishpa tigramugringapaj saquihuai. Chai jipaca, canda catishpa rishallami— nircami.

Shina nijpimi Eliasca, cashna nirca:

—Shina cashpaca tigramungapaj rilla. Imata ñuca rurashcatapash yaringui— nircami.

21Shina nijpi Eliseo rishpaca, ishcai huagracunata japishpami huañuchirca. Shinallata yapuna arado caspicunata yamdata rurashpami, aichata cusashpa gentecuna micuchun cararca. Chai jipaca, Eliseoca jatarishpa, Eliasta catishpa rishpami paita servijurca.